ലക്‌നൗ: അമ്മയെ തല്ലിയ ആളെ പത്ത് വര്‍ഷത്തിന് ശേഷം കാത്തിരുന്ന് കൊലപ്പെടുത്തി മകന്‍. ഉത്തര്‍പ്രദേശിലെ ലക്‌നൗവിലാണ് സംഭവം. സോനു കശ്യപ് എന്ന യുവാവാണ് തന്റെ അമ്മയെ മര്‍ദ്ദിച്ച മനോജെന്ന ആളെ സുഹൃത്തുക്കളുടെ സഹായത്തോടെ അടിച്ച് കൊലപ്പെടുത്തിയത്. 

പത്ത് വര്‍ഷങ്ങള്‍ക്ക് മുന്‍പ് മനോജ് സോനുവിന്റെ അമ്മയെ അടിക്കുകയും, പരസ്യമായി അപമാനിക്കുകയും ചെയ്തിരുന്നു. പിന്നാലെ ഇയാള്‍ താമസിച്ചിരുന്ന പ്രദേശം വിട്ട് മറ്റൊരിടത്തേക്ക് താമസം മാറി. കാലം കഴിയുന്തോറും സോനുവിന്റെ ഉള്ളില്‍ മനോജിനോടുള്ള പകയും വളര്‍ന്നു. എങ്ങനെയെങ്കിലും മനോജിനെ കണ്ടെത്താനായി പിന്നീട് ശ്രമം. ഒടുവില്‍ മൂന്ന് മാസങ്ങള്‍ക്ക് മുന്‍പ് മുന്‍ഷി പുലിയ ഏരിയയില്‍ സോനു തന്റെ ശത്രുവിനെ കണ്ടെത്തി. 

ഇളനീര്‍ കട നടത്തുകയായിരുന്നു മനോജ്. മൂന്ന് മാസം മനോജിനെ നിരീക്ഷിച്ച സോനു ഇയാളുടെ ദിനചര്യയും മറ്റ് കാര്യങ്ങളും മനസിലാക്കി. മനോജിനെ ആക്രമിക്കുന്നതിന് സഹായിച്ചാല്‍ പാര്‍ട്ടി നല്‍കാമെന്ന് പറഞ്ഞാണ് സോനു സുഹൃത്തുക്കളെ ഒപ്പം കൂട്ടുന്നത്. മുന്‍കൂട്ടി നിശ്ചയിച്ച പ്രകാരം മേയ് 22ന് മനോജ് കടയടച്ച് ഇറങ്ങിയ സമയം നോക്കി സോനുവും സുഹൃത്തുക്കളും ആക്രമണം നടത്തി. ഇരുമ്പ് വടികൊണ്ടാണ് ആക്രമിച്ച ശേഷം സംഭവ സ്ഥലത്ത് നിന്ന് പ്രതികള്‍ മുങ്ങി. ഗുരുതരമായി പരിക്കേറ്റ നിലയില്‍ കണ്ടെത്തിയ മനോജിനെ ആശുപത്രിയില്‍ പ്രവേശിപ്പിച്ചെങ്കിലും, ചികിത്സയിലിരിക്കെ മരിക്കുകയായിരുന്നു.

ALSO READ: വി.എസ് അച്യുതാനന്ദന് വിട നൽകാൻ കേരളം; ഉച്ചയോടെ വിലാപയാത്ര ആരംഭിക്കും 

സംഭവത്തില്‍ കേസെടുത്ത് അന്വേഷണം ആരംഭിച്ച പൊലിസിന് ആദ്യ ഘട്ടത്തില്‍ തെളിവൊന്നും കണ്ടെത്താനായില്ല. സിസിടിവി ദൃശ്യങ്ങള്‍ പരിശോധിച്ചെങ്കിലും പ്രതികളെ തിരിച്ചറിയാന്‍ സാധിച്ചിരുന്നില്ല. കൊലപാതകത്തിന് പിന്നാലെ സുഹൃത്തുക്കള്‍ക്ക് മദ്യപാര്‍ട്ടി നടത്തി സോനു സോഷ്യല്‍ മീഡിയയില്‍ പങ്കുവെച്ച ചിത്രങ്ങള്‍ പരിശോധിച്ചാണ് പൊലിസ് പ്രതികളിലേക്കെത്തിയത്.