തിരുവനന്തപുരം: അന്തരിച്ച മുൻ മുഖ്യമന്ത്രി വി.എസ് അച്യുതാനന്ദന്റെ മൃതദേഹം ഇന്ന് രാവിലെ ഒമ്പത് മണിക്ക് വീട്ടിൽ നിന്നും ദർബാർ ഹാളിലേക്ക് പൊതുദർശനത്തിനായി കൊണ്ടുപോകും. ദർബാർ ഹാളിലെ പൊതുദർശനത്തിനുശേഷം ഉച്ചയോടെ തിരുവനന്തപുരത്തുനിന്നും ദേശീയപാത വഴി വിലാപയാത്രയായി ആലപ്പുഴയിൽ എത്തും. രാത്രി ഒമ്പത് മണിക്ക് പുന്നപ്ര പറവൂരിൽ മൃതദേഹം എത്തിക്കും. ബുധനാഴ്ച രാവിലെ വീട്ടിൽ നിന്നും ജില്ലാ കമ്മിറ്റി ഓഫീസിലേക്ക് മൃതദേഹം എത്തിച്ചു പൊതുദർശനത്തിന് അനുവദിക്കും.ഉച്ചക്ക് ശേഷം ആലപ്പുഴ വലിയ ചുടുകാട്ടിൽ ആണ് വിഎസിന്റെ സംസ്കാരം. 

ഇന്നലെ എസ്‌യുടി ആശുപത്രിയിൽ നിന്നും വിഎസിന്റെ മൃതദേഹം തിരുവനന്തപുരത്തെ എകെജി പഠന കേന്ദ്രത്തിൽ എത്തിക്കുകയായിരുന്നു. പൊതുദർശനത്തിനുശേഷം രാത്രി 12 മണിയോടെയാണ് ബാർട്ടൻ ഹില്ലിലെ വേലിക്കകത്തെ വസതിയിലേക്ക് വിഎസിന്റെ മൃതദേഹം കൊണ്ടുവന്നത്, മുൻ മുഖ്യമന്ത്രിയെ കാണാൻ ആയിരങ്ങളാണ് എകെജി സെന്ററിൽ എത്തിയിരുന്നത്.

വിഎസ് അച്യുതാനന്ദന്റെ വിയോഗത്തിൽ ആദരസൂചകമായി കേരളത്തിൽ ഇന്ന് സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കും അവധിയായിരിക്കും. മൂന്ന് ദിവസത്തെ ഔദ്യോഗിക ദുഃഖാചരണവും സർക്കാർ പ്രഖ്യാപിച്ചു. ഇന്നലെ വൈകീട്ട് 3.20ന് തിരുവനന്തപുരം എസ്‌യുടി ആശുപത്രിയിൽ വെച്ചായിരുന്നു വിഎസ് അച്യുതാനന്ദന്റെ അന്ത്യം. അസുഖത്തെ തുടർന്ന് ദീർഘനാളായി ചികിത്സയിലായിരുന്നു.