ന്യൂഡൽഹി: പ്രധാനമന്ത്രി നരേന്ദ്ര മോദി രണ്ട് ദിവസത്തെ സന്ദർശനത്തിനായി ബ്രിട്ടനിലേക്ക് യാത്ര തിരിച്ചു. യുകെ പ്രധാനമന്ത്രി കെയർ സ്റ്റാർമറിന്റെ ക്ഷണപ്രകാരം നടക്കുന്ന രണ്ട് ദിവസത്തെ യുകെ സന്ദർശനത്തിന്റെ പ്രധാന ലക്ഷ്യം ഇന്ത്യ-യുകെ സ്വതന്ത്ര വ്യാപാര കരാറിൽ ഒപ്പുവെക്കലാണ്. നാലുവർഷത്തെ ചർച്ചകൾക്കൊടുവിൽ യാഥാർത്ഥ്യമാകുന്ന ഈ കരാർ പ്രകാരം, ഇന്ത്യയിൽ നിന്ന് കയറ്റുമതി ചെയ്യുന്ന 99 ശതമാനം സാധനങ്ങൾക്കും ബ്രിട്ടൻ തീരുവ ഒഴിവാക്കും. വ്യാപാരം, നിക്ഷേപം, സാങ്കേതികവിദ്യ, പ്രതിരോധം, വിദ്യാഭ്യാസം, ഗവേഷണം, ആരോഗ്യം, സുസ്ഥിരത തുടങ്ങിയ മേഖലകളിൽ ഇരു രാജ്യങ്ങളും തമ്മിലുള്ള സഹകരണം വർധിപ്പിക്കാൻ ഈ കരാർ വഴിയൊരുക്കും.

സാമ്പത്തിക കുറ്റകൃത്യങ്ങളിൽ പ്രതിയായ വ്യവസായി വിജയ് മല്യയെ ഇന്ത്യയ്ക്ക് കൈമാറണമെന്നും ഖാലിസ്ഥാൻ ഭീകരവാദവുമായി ബന്ധപ്പെട്ട വിഷയങ്ങളും ചർച്ചയാകുമെന്നാണ് സൂചന. ബ്രിട്ടീഷ് പ്രധാനമന്ത്രി കെയർ സ്റ്റാർമറുമായുള്ള കൂടിക്കാഴ്ചയിൽ തൊഴിലവസര സൃഷ്ടിയും സാമ്പത്തിക വളർച്ചയും പ്രോത്സാഹിപ്പിക്കുന്ന വിഷയങ്ങൾ മോദി ചർച്ച ചെയ്യും. യുകെ രാജാവ് ചാൾസ് മൂന്നാമനുമായും പ്രധാനമന്ത്രി കൂടിക്കാഴ്ച നടത്തും. “ഈ സന്ദർശനത്തിനായി ഞാൻ ആകാംക്ഷയോടെ കാത്തിരിക്കുകയാണ്,” മോദി പറഞ്ഞു.

മാലിദ്വീപ് സന്ദർശനം

യുകെ സന്ദർശനത്തിന് ശേഷം ജൂലൈ 25-ന് മോദി മാലിദ്വീപിലേക്ക് യാത്ര തിരിക്കും. മാലിദ്വീപ് പ്രസിഡന്റ് മുഹമ്മദ് മുയിസുവിന്റെ ക്ഷണപ്രകാരം നടക്കുന്ന ഈ സന്ദർശനത്തിൽ, മാലിദ്വീപിന്റെ 60-ാം സ്വാതന്ത്ര്യദിനാഘോഷങ്ങളിൽ മുഖ്യാതിഥിയായി മോദി പങ്കെടുക്കും. ഇന്ത്യ-മാലിദ്വീപ് നയതന്ത്ര ബന്ധത്തിന്റെ 60-ാം വാർഷികം ആഘോഷിക്കുന്ന ഈ വർഷം, ഇന്ത്യൻ മഹാസമുദ്ര മേഖലയിൽ സമാധാനവും സ്ഥിരതയും ഉറപ്പാക്കാൻ ലക്ഷ്യമിട്ടുള്ള ചർച്ചകൾ പ്രധാനമന്ത്രി നടത്തും.  പ്രസിഡന്റ് മുയിസുവുമായുള്ള ഉഭയകക്ഷി ചർച്ചകളിൽ സാമ്പത്തിക സഹകരണവും സമുദ്ര സുരക്ഷയും ശക്തിപ്പെടുത്തുന്നതിനുള്ള നടപടികൾ ചർച്ചയാകും. “ഈ സന്ദർശനം ഇന്ത്യ-മാലിദ്വീപ് ബന്ധത്തിൽ പുതിയ അധ്യായം തുറക്കുമെന്നും, ‘അയൽപക്കം ആദ്യം’ നയത്തെ ശക്തിപ്പെടുത്തുമെന്നും ഞാൻ വിശ്വസിക്കുന്നു,” മോദി പറഞ്ഞു.

ALSO READ: ഉപരാഷ്ട്രപതി തിരഞ്ഞെടുപ്പിനുള്ള നടപടിക്രമങ്ങൾ ആരംഭിച്ചു കേന്ദ്ര തിരഞ്ഞെടുപ്പ് കമ്മീഷൻ; നിതീഷ് കുമാർ ഉൾപ്പെടെ സ്ഥാനാർത്ഥി പട്ടികയിൽ

2023-ലെ മാലിദ്വീപ് പ്രസിഡന്റ് തിരഞ്ഞെടുപ്പിൽ “ഇന്ത്യയെ പുറത്താക്കുക” എന്ന മുദ്രാവാക്യവുമായി അധികാരത്തിലെത്തിയ മുയിസുവിന്റെ ആദ്യകാല നയങ്ങൾ ഇന്ത്യ-മാലിദ്വീപ് ബന്ധത്തിൽ വിള്ളലുണ്ടാക്കിയിരുന്നു. എന്നാൽ, 2024-ൽ മോദിയുടെ മൂന്നാം ടേം സത്യപ്രതിജ്ഞാ ചടങ്ങിലേക്ക് മുയിസുവിനെ ക്ഷണിച്ചതോടെ ബന്ധം മെച്ചപ്പെടാൻ തുടങ്ങി. മാലിദ്വീപിന്റെ സാമ്പത്തിക പ്രതിസന്ധി മറികടക്കാൻ ഇന്ത്യ നൽകിയ സഹായവും ബന്ധം ഊഷ്മളമാക്കുന്നതിന് കാരണമായി.

Prime Minister Narendra Modi has embarked on a four-day visit to the UK and Maldives to strengthen trade, economic ties, and maritime security. In the UK, he will sign a Free Trade Agreement and discuss key issues, while in the Maldives, he will attend the 60th Independence Day celebrations as the chief guest.