ന്യൂഡൽഹി: കേരളത്തിൽ നിർമാണം പുരോഗമിക്കുന്ന ദേശീയപാത 66-ൽ വിവിധയിടങ്ങളിൽ കണ്ടെത്തിയ നിർമാണ തകരാറുകൾക്ക് ഉത്തരവാദികളായ കരാറുകാർക്കെതിരെ കർശന നടപടി സ്വീകരിച്ചതായി കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി അറിയിച്ചു. രാജ്യസഭയിൽ അഡ്വ. ഹാരിസ് ബീരാൻ എം.പി ഉന്നയിച്ച ചോദ്യത്തിന് രേഖാമൂലം നൽകിയ മറുപടിയിലാണ് മന്ത്രി ഇക്കാര്യം വ്യക്തമാക്കിയത്.

നാഷനൽ ഹൈവേ അതോറിറ്റി ഓഫ് ഇന്ത്യ (എൻ.എച്ച്.എ.ഐ) നടത്തിയ പരിശോധനയിൽ, ദേശീയപാത 66-ന്റെ വിവിധ ഭാഗങ്ങളിൽ വിള്ളലുകളും ഭാഗിക തകർച്ചകളും കണ്ടെത്തിയിരുന്നു. 2025 ജൂൺ 11 മുതൽ ജൂലൈ 14 വരെ നടത്തിയ സമഗ്ര പരിശോധനയിൽ ചെങ്കള-നീലീശ്വരം സെക്ഷനിൽ മണ്ണെടുപ്പ് പരാജയപ്പെടുകയും പ്രധാന കാരിയേജ് വേയിലും സർവിസ് റോഡുകളിലും വിള്ളലുകൾ പ്രത്യക്ഷപ്പെടുകയും ചെയ്തതായി റിപ്പോർട്ട് ചെയ്തു.

കർശന നടപടികളും പിഴകളും

ചെങ്കളനീലീശ്വരം സെക്ഷൻ: ഉത്തരവാദികളായ മേഘ എൻജിനീയറിങ് ആൻഡ് ഇൻഫ്രാസ്ട്രക്ചർ ലിമിറ്റഡിന് കാരണം കാണിക്കൽ നോട്ടിസ് നൽകി. പിഴ ഈടാക്കുകയും പുതിയ കരാറുകളിൽനിന്ന് താൽക്കാലികമായി മാറ്റിനിർത്തുകയും ചെയ്തു. കായലുകൾ, മറ്റ് ദുർബല മേഖലകൾ എന്നിവിടങ്ങളിലെ സുരക്ഷാ നടപടികൾ വിലയിരുത്താൻ നിയോഗിച്ച സമിതിയുടെ റിപ്പോർട്ടിനായി കാത്തിരിക്കുകയാണ്.

രാമനാട്ടുകര-വളാഞ്ചേരി: രണ്ടിടങ്ങളിൽ സംരക്ഷണഭിത്തി ഇടിഞ്ഞുവീണതിനെ തുടർന്ന് കരാറുകാരായ കെ.എൻ.ആർ കൺസ്ട്രക്ഷൻസിനെ ഒരു മാസത്തേക്ക് ലേലത്തിൽനിന്ന് സസ്‌പെൻഡ് ചെയ്തു. 11.8 കോടി രൂപ പിഴ ചുമത്തുകയും ഒരു വർഷത്തേക്ക് ഡീബാർ ചെയ്യാനുള്ള സാധ്യത പരിഗണിച്ച് കാരണം കാണിക്കൽ നോട്ടിസ് നൽകുകയും ചെയ്തു.

തുറവൂർ-പറവൂർ: ഭാരത്മാല പദ്ധതിയുടെ ഭാഗമായ ആറുവരിപാതയിൽ നാല് ഗർഡറുകൾ തകർന്ന സംഭവത്തിൽ 15.4 ലക്ഷം രൂപ പിഴ ചുമത്തി. ഉത്തരവാദികളായ കൺസൾട്ടന്റിനെയും കോൺട്രാക്ടർ പ്രതിനിധികളെയും സസ്‌പെൻഡ് ചെയ്തു.

കൊല്ലം ബൈപാസ്: കടമ്പാട്ടുകോണം പദ്ധതിയിൽ മൈനർ പാലത്തിന്റെ സ്‌കാഫോൾഡിങ് തകർന്നതിനെ തുടർന്ന് 9.55 ലക്ഷം രൂപ പിഴ ഈടാക്കി. കരാറുകാരനെയും ഉത്തരവാദിയായ എൻജിനീയറെയും പിരിച്ചുവിട്ടു.

ALSO READ: ബിഹാറിൽ വോട്ടർ പട്ടിക പരിഷ്കരണം: 52 ലക്ഷം പേരെ ഒഴിവാക്കി തെരഞ്ഞെടുപ്പ് കമ്മിഷൻ; ഇൻഡ്യാ സഖ്യം തെരഞ്ഞെടുപ്പ് ബഹിഷ്കരിക്കുമോ?

രാജ്യവ്യാപകമായി എട്ടിടങ്ങളിൽ തകർച്ച

കഴിഞ്ഞ നാല് വർഷത്തിനിടെ രാജ്യത്തെ ദേശീയപാത നിർമാണത്തിനിടെ എട്ടിടങ്ങളിൽ തകർച്ചകൾ റിപ്പോർട്ട് ചെയ്തതായി മന്ത്രി നിതിൻ ഗഡ്കരി വി. ശിവദാസൻ എം.പിയുടെ ചോദ്യത്തിന് മറുപടിയായി വ്യക്തമാക്കി. 2020-21ൽ ഹരിയാനയിൽ രണ്ടിടങ്ങളിലും, 2021-22ൽ തമിഴ്‌നാട്ടിൽ രണ്ടിടങ്ങളിലും, ആന്ധ്രാപ്രദേശിൽ ഒരിടത്തും, 2023-24ൽ ഡൽഹിയിലും ആസാമിലും ഓരോ തവണയും, കേരളത്തിൽ ഒരിടത്തും പാത തകർന്നതായി മന്ത്രി അറിയിച്ചു.

ALSO READ: ഓടിക്കൊണ്ടിരുന്ന ഓട്ടോയിലേക്ക് കുതിര ഇടിച്ചുകയറി അപകടം; യാത്രക്കാർക്കും ഡ്രൈവർക്കും പരുക്ക്

Union Minister Nitin Gadkari has announced strict action against those responsible for issues in Kerala's national highway construction projects, addressing delays and inefficiencies