മലപ്പുറം: ധനകാര്യ വകുപ്പ് അലോട്ട്‌മെന്റ് നൽകാത്തത് മൂലം സംസ്ഥാനത്ത് സർക്കാർ, എയ്ഡഡ് വിദ്യാലയങ്ങളിലെ താൽക്കാലിക അധ്യാപകരുടെ ശമ്പളം മുടങ്ങി. കഴിഞ്ഞ ജൂണിലാണ് താൽക്കാലിക  അധ്യാപകരെ നിയമിച്ചത്. ഇവർക്ക് വേതനം അനുവദിക്കുന്ന ധനകാര്യ വകുപ്പിന്റെ ഹെഡ് ഓഫ് അകൗണ്ടിലേക്ക് ഫണ്ട് നൽകാത്തതാണ് വേതനം മുടങ്ങാൻ കാരണം. 

അധ്യാപകർ ജോലി ചെയ്യുന്ന സ്‌കൂളുകളിൽ നിന്നും നടപടികൾ പൂർത്തിയാക്കി സ്പാർക്ക് വഴി ബിൽ പ്രൊസസ് ചെയ്‌തെങ്കിലും ട്രഷറികളിൽ നിന്ന് അധ്യാപകരുടെ അകൗണ്ടിലേക്ക് വേതനം കൈമാറാൻ സാധിക്കുന്നില്ല. മുൻ വർഷങ്ങളിൽ സ്ഥാപന മേധാവിയുടെ നിയമന ഉത്തരവ് ധനകാര്യ വകുപ്പിന് കൈമാറിയാൽ തൊട്ടടുത്ത മാസം തന്നെ താൽക്കാലിക  അധ്യാപകർക്ക് വേതനം ലഭിച്ചിരുന്നു. ട്രഷറികളിൽ സമർപ്പിക്കപ്പെടുന്ന അലവൻസ് പോലെയുള്ള ബില്ലുകൾക്കേ ഇവർക്ക് പ്രതേകമായി അലോട്ട്‌മെന്റ് ആവശ്യമായി വരുന്നുള്ളു.

ALSO READ: അബൂദബിയിലും അല്‍ഐനിലും ഇന്നും നാളെയും റോഡുകള്‍ ഭാഗികമായി അടച്ചിടും | UAE Traffic Alert

വിദ്യാലയങ്ങളിലെ ഒഴിവുള്ള തസ്തികകളിൽ താൽക്കാലിക അധ്യാപകരെ നിയമക്കണമെന്ന് കഴിഞ്ഞ മെയ് 23നാണ് സർക്കാർ പ്രത്യേക ഉത്തരവിറക്കിയത്. കർശന നിബന്ധനകളും നിർദേശങ്ങളും പാലിച്ചായിരുന്നു നിയമനങ്ങൾ. ഓരോ പ്രദേശത്തേയും പത്രങ്ങളിൽ ഒഴിവുകൾ പരസ്യപ്പെടുത്തി, വിദ്യാഭ്യാസ ഓഫിസുകളിൽ വിവരം അറിയിച്ച്, വിദഗ്ധരായ  ഇന്റർവ്യൂ ബോർഡ് ഓരോ ഉദ്യോഗാർഥിയെയും അഭിമുഖം നടത്തി, റാങ്ക് ലിസ്റ്റ് പ്രസിദ്ധപ്പെടുത്തി, സംവരണ തത്വങ്ങൾ പാലിച്ചാണ് അധ്യാപകരെ നിയമിച്ചത്. മുടങ്ങിയ വേതനം അടിയന്തരമായി നൽകണമെന്ന് ആവശ്യപ്പെട്ട് പ്രതിഷേധത്തിനൊരുങ്ങുകയാണ് താൽക്കാലിക അധ്യാപക കൂട്ടായ്മ.