തിരുവനന്തപുരം: ഒട്ടേറെ കൗമാര താരങ്ങളാണ് ഇത്തവണ കെ.സി.എൽ ടീമുകളിൽ ഇടം പിടിച്ചത്. അഹ്മദ് ഇമ്രാൻ, ആദിത്യ ബൈജു, ഏദൻ ആപ്പിൾ ടോം, ജോബിൻ ജോബി, വിഷ്ണു മേനോൻ രഞ്ജിത്, രോഹിത് .കെ.ആർ എന്നിവർ ചെറുപ്രായത്തിൽ തന്നെ ലീഗിന്റെ ഭാഗമായി. രണ്ടാം സീസണിന്റെ താരങ്ങളാകാനുള്ള തയ്യാറെടുപ്പിലാണ് ഇവർ.

ഈ സീസണിൽ കെ.സി.എൽ കളിക്കുന്ന ഏറ്റവും പ്രായം കുറഞ്ഞ താരം തൃപ്പൂണിത്തുറ സ്വദേശി കെ.ആർ രോഹിത് ആണ്. 16ാം വയസ്സിൽ കേരളത്തിനായി അണ്ടർ 19 കളിച്ചു. എൻ.എസ്.കെ ട്രോഫിയിൽ ഫൈനലിലെ പ്ലെയർ ഓഫ് ദി മാച്ചായി തെരഞ്ഞെടുക്കപ്പെട്ടതും രോഹിത് ആണ്. രോഹിത് 75,000 രൂപയ്ക്കാണ് തൃശൂർ ടീമിലെത്തിയത്.

കഴിഞ്ഞ സീസണിൽ കേരളത്തിന്റെ അണ്ടർ 19 ക്യാപ്റ്റനായിരുന്ന അഹ്മദ് ഇമ്രാനാണ് മറ്റൊരു യുവതാരം. രഞ്ജി സെമിയിലൂടെ കേരള സീനിയർ ടീമിനായും അരങ്ങേറ്റം കുറിച്ചു. തിരുവനന്തപുരം പാപ്പനംകോട് സ്വദേശിയായ അഹ്മദ് കേരളത്തിനായി അണ്ടർ 14, 16, 19, 23 വിഭാഗങ്ങളിൽ കളിച്ചിട്ടുണ്ട്. ബാറ്റിങ്ങിനൊപ്പം ഓഫ് സ്പിന്നറെന്ന നിലയിലും അഹ്മദ് മികവ് തെളിയിച്ചിട്ടുണ്ട്. കഴിഞ്ഞ സീസണിൽ തൃശൂർ ടൈറ്റൻസിനായി മികച്ച പ്രകടനം കാഴ്ച വച്ച അഹ്മദ് ഇമ്രാൻ 229 റൺസും അഞ്ച് വിക്കറ്റുകളും നേടിയിരുന്നു. മൂന്ന് ലക്ഷം രൂപയ്ക്കാണ് അഹ്മദിനെ തൃശൂർ തിരികെപ്പിടിച്ചത്.

ALSO READ: മാഞ്ചസ്റ്ററിൽ പുതിയ ചരിത്രം പിറന്നു; ലോക ക്രിക്കറ്റിന്റെ നെറുകയിലേക്ക് റൂട്ട്

കേരളത്തിന്റെ ഭാവി ഫാസ്റ്റ് ബൗളിങ് പ്രതീക്ഷകളാണ് ഏദൻ ആപ്പിൾ ടോമും ആദിത്യ ബൈജുവും. പതിനാറാം വയസ്സിൽ കേരളത്തിനായി രഞ്ജി ട്രോഫിയിൽ അരങ്ങേറ്റം കുറിച്ച താരമാണ് ഏദൻ ആപ്പിൾ ടോം. ആദ്യ മത്സരത്തിൽ മാൻ ഓഫ് ദി മാച്ച് പുരസ്‌കാരവും നേടി. രഞ്ജിയിൽ വിദർഭയ്‌ക്കെതിരായ രഞ്ജി ഫൈനലിലടക്കം കേരളത്തിനുവേണ്ടി കളിച്ചിരുന്നു. ഒന്നര ലക്ഷം രൂപയ്ക്കാണ് തിരുവനന്തപുരം സ്വദേശിയായ ഏദനെ കൊല്ലം ഇത്തവണ ടീമിലെത്തിച്ചത്. മറുവശത്ത് എം.ആർ.എഫ് പേസ് ഫൗണ്ടേഷനിൽ പരിശീലനം നേടിയ താരമാണ് ആദിത്യ ബൈജു. കഴിഞ്ഞ സീസണിൽ കുച്ച് ബിഹാർ ട്രോഫി, വിനു മങ്കാദ് ട്രോഫി ജൂനിയർ ടൂർണ്ണമെന്റുകളിൽ മികച്ച പ്രകടനം കാഴ്ച വച്ചു. ആദിത്യയെ ഒന്നര ലക്ഷത്തിനാണ് ആലപ്പി റിപ്പിൾ സ്വന്തമാക്കിയത്.

നിലവിൽ കേരളത്തിന്റെ അണ്ടർ 19 ടീമംഗമായ ജോബിൻ ജോബി കഴിഞ്ഞ കെ.സി.എൽ സീസണിൽ ശ്രദ്ധിക്കപ്പെട്ട യുവതാരമാണ്. കൂറ്റനടികളിലൂടെ ശ്രദ്ധേയനായ ജോബിൻ ഫാസ്റ്റ് ബൗളിങ് ഓൾറൗണ്ടർ കൂടിയാണ്. കെ.സി.എ പ്രസിഡൻസ് കപ്പിൽ ബാറ്റിങ്ങിലും ബൗളിങ്ങിലും തിളങ്ങിയ ജോബിനായിരുന്നു പരമ്പരയുടെ താരമായും ബെസ്റ്റ് പ്രോമിസിങ് യങ്സ്റ്റാറായും തിരഞ്ഞെടുക്കപ്പെട്ടത്. കഴിഞ്ഞ സീസണിൽ 252 റൺസുമായി മികച്ച പ്രകടനം കാഴ്ച വച്ച ജോബിനെ 85,000 രൂപയ്ക്ക് കൊച്ചി ലേലത്തിലൂടെ നിലനിർത്തി. തൊടുപുഴ കാഞ്ഞിരമറ്റം സ്വദേശിയാണ് ജോബിൻ. തൃശൂർ ടൈറ്റൻസിന്റെ വിഷ്ണു മേനോനും വെടിക്കെട്ട് ബാറ്ററെന്ന നിലയിൽ ശ്രദ്ധേയനാണ്. ഇരുപതുകാരനായ വിഷ്ണുവിനെ 1.40 ലക്ഷത്തിനാണ് തൃശൂർ ലേലത്തിൽ സ്വന്തമാക്കിയത്.

Many teenage players made it to the KCL teams this time Ahmed Imran Aditya Baiju Eden Apple Tom Jobin Joby Vishnu Menon Ranjith and Rohit KR became part of the league at a young age