താമരശ്ശേരി: താമരശ്ശേരി ചുരത്തിൽ നിന്നും പൊലിസിനെ കണ്ട് കൊക്കയിലേക്ക് ചാടിയ യുവാവിനെ കണ്ടെത്തി. മലപ്പുറം നന്നമ്പ്ര സ്വദേശിയായ ഷഫീഖിനെയാണ് കണ്ടെത്തിയത്. വൈത്തിരിക്കടുത്തുള്ള ഓറിയൻറൽ കോളജിന് പുറകുവശത്ത് ഒളിച്ചിരിക്കുകയായിരുന്നു യുവാവ്. ചുരത്തിൽ നിന്ന് ചാടിയ ഇയാൾക്ക് പരുക്കേറ്റിട്ടുണ്ട്. ഇന്നലെയാണ് ചുരത്തിലെ ഒമ്പതാം വളവിൽ നിന്നും കൊക്കയിലേക്ക് ചാടിയത്.

പ്രദേശവാസികളാണ് ഷഫീഖിനെ ആദ്യം കണ്ടത്. രാവിലെ കോളജിന് പിറകിൽ നിന്ന് യുവാവ് ഇറങ്ങി വരുന്നത് കണ്ട ഇവർ വിവരം പൊലിസിനെ അറിയിക്കുകയായിരുന്നു. പിന്നാലെ പൊലിസ് എത്തി ഷഫീഖിനെ അറസ്റ്റ് ചെയ്തു. യുവാവിനെ വിശദമായി ചോദ്യം ചെയ്യുമെന്ന് പൊലിസ് അറിയിച്ചു. 

ഇന്നലെയാണ് വയനാട് ചുരത്തിലെ വ്യൂ പോയിന്റിന് സമീപത്ത് നിന്നും യുവാവ് താഴേക്ക് ചാടിയത്. ഒൻപതാം വളവിന് മുകളിൽ പതിവ് വാഹന പരിശോധന നടത്തുകയായിരുന്നു പൊലിസ് സംഘം. ഇതുകണ്ട യുവാവ് തന്റെ കാറുപേക്ഷിച്ച് താഴേക്ക് എടുത്ത് ചാടിയെന്നാണ് റിപ്പോർട്ട്. ഇയാളുടെ കാറിൽ നിന്ന് പിന്നീട് പൊലിസ് ലഹരി വസ്തുക്കൾ കണ്ടെത്തിയിരുന്നു. മൂന്ന് പാക്കറ്റ് എംഡിഎംഎയാണ് കണ്ടെത്തിയത്. കാറിനകത്ത് കൂടുതൽ മയക്കുമരുന്ന് ഉണ്ടോ എന്ന സംശയം പൊലിസിന് ഉണ്ട്. രഹസ്യ അറകളുണ്ടാക്കി എംഡിഎംഎ സൂക്ഷിക്കാൻ സാധ്യതയുള്ളതിനാൽ കാർ വെട്ടിപ്പൊളിച്ച് പരിശോധിക്കാനാണ് പൊലിസിന്റെ തീരുമാനം.

ALSO READ: ഗോവിന്ദച്ചാമിയെ വിയ്യൂരിലേക്ക് കൊണ്ടുപോയി; യാത്ര കനത്ത സുരക്ഷയിൽ

അതേസമയം, ഷഫീക്ക് ഉപയോഗിച്ചിരുന്നത് ഇയാളുടെ കാർ അല്ലെന്ന് പൊലിസ് അറിയിച്ചു. ഇയാളുടെ ബന്ധുവിന്റെ കാറാണ് ഇയാളുടെ കൈവശം ഉണ്ടായിരുന്നത്. ഇതിൽ നിന്നാണ് ലഹരി വസ്തുക്കൾ കണ്ടത്തിയത്. വാഹനത്തിന്റെ ഉടമയെ പൊലിസ് തിരിച്ചറിഞ്ഞിട്ടുണ്ട്.