മൂവാറ്റുപുഴ: ടാറിങ് പൂര്‍ത്തിയായതിന് പിന്നാലെ മാത്യൂ കുഴല്‍നാടന്‍ എംഎല്‍എയുടെ നിര്‍ദേശ പ്രകാരം റോഡ് തുറന്ന് നല്‍കിയ ട്രാഫിക് പൊലിസ് ഇന്‍സ്‌പെക്ടര്‍ക്ക് സസ്‌പെന്‍ഷന്‍. മൂവാറ്റുപുഴ ട്രാഫിക് പൊലിസ് ഇന്‍സ്‌പെക്ടര്‍ കെ.പി സിദ്ദീഖിനെയാണ് അന്വേഷണ വിധേയമായി സസ്‌പെന്‍ഡ് ചെയ്തത്. 

നഗരറോഡ് വികസനത്തിന്റെ ഒന്നാംഘട്ട ടാറിങ് പൂര്‍ത്തിയായ വെള്ളിയാഴ്ച്ച വൈകീട്ടാണ് എംഎല്‍എ, മുനിസിപ്പില്‍ ചെയര്‍മാന്‍ പിപി എല്‍ദോസ് എന്നിവരുടെ നേതൃത്വത്തില്‍ റോഡ് തുറന്ന് നല്‍കിയത്. സംഭവ സമയത്ത് ട്രാഫിക് ഡ്യൂട്ടിയില്‍ ഉണ്ടായിരുന്ന സിദ്ദീഖിനെ മാത്യൂകുഴല്‍നാടന്‍ എംഎല്‍എ വിളിച്ച് നാട മുറിപ്പിക്കുകയായിരുന്നു. 

ALSO READ: നിവേദനം നല്‍കാനെത്തിയ വയോധികനെ സുരേഷ് ഗോപി അപമാനിച്ച സംഭവം; ഇടപെട്ട് സിപിഐഎം; കൊച്ചുവേലായുധന്റെ വീട് നിര്‍മ്മാണം പാര്‍ട്ടി ഏറ്റെടുത്തു 

നിര്‍മ്മാണം പൂര്‍ത്തിയാക്കുന്നതിന് മുമ്പ് റോഡ് ഉദ്ഘാടനം ചെയ്‌തെന്നാണ് ആക്ഷേപമുയരുന്നത്. ടൗണ്‍ റോഡ് വികസനം പൂര്‍ത്തിയാക്കും മുന്‍പ് ഉദ്ഘാടനം ചെയ്തത് എംഎല്‍എയുടെയും, നഗരസഭ ചെയര്‍മാന്റെയും നാടകം പ്രഹസനമാണെന്ന് ആരോപിച്ച് സിപി ഐഎം ഏരിയ നേതൃത്വം രംഗത്ത് വന്നിരുന്നു. എംഎല്‍എയുടെ നിര്‍ദേശപ്രകാരം റോഡ് ഉദ്ഘാടനം നടത്തിയ എസ്.ഐക്കെതിരെ മുഖ്യമന്ത്രിക്ക് പരാതി നല്‍കുകയും ചെയ്തു. 

സംഭവത്തില്‍ ട്രാഫിക് എസ്.ഐയോട് ഡിവൈഎസ്പി വിശദീകരണം തേടിയിരുന്നു. ഉന്നത പൊലിസ് അധികാരികളെയും, മറ്റും അറിയിക്കാതെയാണ് ഉദ്ഘാടനം നടന്നതെന്ന് കൂടി പരിഗണിച്ചാണ് സസ്‌പെന്‍ഷന്‍.

Traffic police inspector suspended for opening road based on the instruction of MLA Mathew Kuzhalnadan.