വൃക്കരോഗികളെ അലട്ടുന്ന ഒരു പ്രശ്‌നമാണ് ഭക്ഷണക്രമം. സുരക്ഷിതവും ആരോഗ്യകരവുമെന്നും തോന്നുന്ന പല ഭക്ഷണങ്ങളും ഇവര്‍ക്ക് ഒഴിവാക്കേണ്ടതായി വരും. അതില്‍ ഏറ്റവും പ്രധാനപ്പെട്ടതാണ് തേങ്ങയും വാഴപ്പഴവും. ഇവ ഒറ്റയ്ക്ക് കഴിക്കുന്നതും ചേര്‍ത്തു കഴിക്കുന്നതും അപകടമാണെന്നാണ് ആരോഗ്യവിദഗ്ധരുടെ അഭിപ്രായം.

ശരീരത്തിലെ ഹൃദയമിടിപ്പ് ക്രമമാക്കാനും നാഡീ പ്രവര്‍ത്തനത്തിനും പേശി പ്രവര്‍ത്തനത്തിനുമൊക്കെ ആവശ്യമായ അവശ്യ ധാതുവാണ് പൊട്ടാസ്യം. ശരീരത്തിന് ആവശ്യമായ ഈ പൊട്ടാസ്യം ആഗിരണം ചെയ്ത ശേഷം അധികം വരുന്നത് വൃക്കകള്‍ മൂത്രത്തിലൂടെ പുറന്തള്ളുകയാണ് പതിവ്. എന്നാല്‍ വൃക്കരോഗികളില്‍ ഈ പ്രക്രിയ മന്ദഗതിയിലായിരിക്കുകയും ചെയ്യും. ഇത് ശരീരത്തില്‍ പൊട്ടാസ്യത്തിന്റെ അളവു കൂടാനും കാരണമാകും.

വാഴപ്പഴത്തില്‍ ധാരാളമായി പൊട്ടാസ്യമുണ്ട്. പൊട്ടാസ്യം ധാരാളമടങ്ങിയ വാഴപ്പഴവും തേങ്ങയും ഇത്തരത്തില്‍ വളരെ ചെറിയ അളവില്‍ വൃക്ക രോഗി കഴിക്കുന്നത് പോലും അവരുടെ രക്തത്തിലെ പൊട്ടാസ്യത്തിന്റെ അളവു കൂട്ടാനും ഹൃദയാഘാതം ഉള്‍പ്പെടെയുള്ള നിരവധി ആരോഗ്യ സങ്കീര്‍ണതകളിലേക്കു നയിക്കുമെന്നുമാണ് പറയപ്പെടുന്നത്.

രക്തത്തിലെ പൊട്ടാസ്യത്തിന്റെ അളവു കൂടിയാലുണ്ടാകുന്ന ലക്ഷണങ്ങളാണ് പേശി ബലഹീനത അല്ലെങ്കില്‍ മലബന്ധം എന്നിവ. ക്ഷീണവും ഛര്‍ദ്ദിയും ക്രമരഹിതമായ ഹൃദയമിടിപ്പും ഹൃദയാഘാതം പോലുള്ള ഗുരുതരമായ ഹൃദയ പ്രശ്‌നങ്ങളും ഹൃദയസ്തംഭനവുമൊക്കെ ഇവയുടെ ലക്ഷണങ്ങളാവാം. 

കഠിനമായ വൃക്കരോഗമുള്ളവര്‍ ഒഴിവാക്കേണ്ട പൊട്ടാസ്യം അടങ്ങിയ ഭക്ഷണങ്ങള്‍

വാഴപ്പഴവും അവോക്കാഡോയും തേങ്ങയും കരിക്കിന്‍ വെള്ളവും ഓറഞ്ചും തക്കാളിയും ഉരുളക്കിഴങ്ങും ചീരയും ഇവര്‍ കഴിക്കുന്നത് ഒഴിവാക്കേണ്ടതാണ്. 

സുരക്ഷിതമായി ഇവര്‍ക്ക് കഴിക്കാവുന്നത് 

ആപ്പിള്‍, ബെറിപ്പഴങ്ങള്‍,പൈനാപ്പിള്‍, മുന്തിരി എന്നിവ വൃക്കരോഗികള്‍ക്ക് കഴിക്കാവുന്നവയാണ്.