തിരുവനന്തപുരം: കേരള തീരത്ത് കാലവർഷ കാറ്റ് മണിക്കൂറിൽ 80 കിലോമീറ്റർ വേഗതയിൽ വീശുന്നതായി കേന്ദ്ര കാലാവസ്ഥ വകുപ്പ് (IMD) മുന്നറിയിപ്പ് നൽകി. ജാർഖണ്ഡിലെ തീവ്രന്യൂനമർദ്ദവും ഗുജറാത്ത് മുതൽ വടക്കൻ കേരളം വരെയുള്ള ന്യൂനമർദ്ദപാത്തിയും മൂലം ശക്തമായ മഴയ്ക്കും കാറ്റിനും സാധ്യതയുണ്ട്. എറണാകുളം, ഇടുക്കി, തൃശൂർ ജില്ലകളിൽ റെഡ് അലർട്ട് പ്രഖ്യാപിച്ചു. പത്തനംതിട്ട, കോട്ടയം, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ടും, ആലപ്പുഴ, കൊല്ലം, തിരുവനന്തപുരം ജില്ലകളിൽ മഞ്ഞ അലർട്ടും നൽകിയിട്ടുണ്ട്.

ഇന്നും നാളെയും (26/07/2025 & 27/07/2025) ഒറ്റപ്പെട്ട പ്രദേശങ്ങളിൽ മണിക്കൂറിൽ 50-60 കിലോമീറ്റർ വേഗതയിലും, ജൂലൈ 28, 29 (28/07/2025 & 29/07/2025) തീയതികളിൽ 40-50 കിലോമീറ്റർ വേഗതയിലും ശക്തമായ കാറ്റിന് സാധ്യതയുണ്ട്. രാത്രികാലങ്ങളിൽ പ്രത്യേക ജാഗ്രത പാലിക്കണമെന്ന് IMD മുന്നറിയിപ്പ് നൽകി.

ഉയർന്ന തിരമാല ജാഗ്രതാ നിർദേശം

ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അനുസരിച്ച്, കണ്ണൂർ (വളപട്ടണം മുതൽ ന്യൂ മാഹി വരെ) തീരങ്ങളിൽ 26/07/2025 വൈകുന്നേരം 5:30 മുതൽ 27/07/2025 പകൽ 5:30 വരെ 2.8-3.1 മീറ്റർ ഉയർന്ന തിരമാലകൾക്കും കടലാക്രമണത്തിനും സാധ്യതയുണ്ട്. കണ്ണൂർ-കാസർകോട് (കുഞ്ചത്തൂർ മുതൽ കോട്ടക്കുന്ന് വരെ) തീരങ്ങളിൽ 26/07/2025 വൈകുന്നേരം 5:30 മുതൽ 28/07/2025 വൈകുന്നേരം 5:30 വരെ 3.2-3.5 മീറ്റർ ഉയർന്ന തിരമാലകൾക്കും സാധ്യതയുണ്ട്.

ALSO READ: മാസം 20,000 ശമ്പളത്തില്‍ മില്‍മയില്‍ വീണ്ടും ജോലിയവസരം; അതും പരീക്ഷയില്ലാതെ; കൂടുതലറിയാം  

ജാഗ്രതാ നിർദേശങ്ങൾ

മരങ്ങൾക്ക് ചുവട്ടിൽ നിൽക്കരുത്: കാറ്റിൽ മരങ്ങൾ കടപുഴകുകയോ ചില്ലകൾ വീഴുകയോ ചെയ്യാം. വാഹനങ്ങൾ പാർക്ക് ചെയ്യരുത്.
അപകടകരമായ വസ്തുക്കൾ: പരസ്യ ബോർഡുകൾ, ഇലക്ട്രിക് പോസ്റ്റുകൾ, കൊടിമരങ്ങൾ എന്നിവ ബലപ്പെടുത്തുക.

വീടുകളിൽ: വാതിലുകളും ജനലുകളും അടയ്ക്കുക. ടെറസിൽ നിൽക്കരുത്. ദുർബലമായ കെട്ടിടങ്ങളിൽ താമസിക്കുന്നവർ സുരക്ഷിത സ്ഥലങ്ങളിലേക്ക് മാറണം.

വൈദ്യുതി അപകടങ്ങൾ: പൊട്ടിവീണ വൈദ്യുതി ലൈനുകൾ KSEB (1912) അല്ലെങ്കിൽ ജില്ലാ ദുരന്ത നിവാരണ അതോറിറ്റി (1077) നമ്പറിൽ അറിയിക്കുക.

കാലാവസ്ഥ അപ്ഡേറ്റ്: http://mausam.imd.gov.in/thiruvananthapuram/എന്ന വെബ്സൈറ്റിൽ NOWCAST അപ്ഡേറ്റുകൾ പരിശോധിക്കുക.