ഗസ്സ: ഗസ്സയില്‍ കൂട്ടക്കുരുതിക്ക് യാതൊരു  അയവുമില്ല. ഇന്ന് പുലര്‍ച്ചെ മുതല്‍ 78 പേരാണ് ഗസ്സയില്‍ കൊല്ലപ്പെട്ടത്. ഭക്ഷണത്തിനായി വരിനിന്നവരാണ് ഇതില്‍ 32 പേര്‍. 2023 ഒക്ടോബറില്‍ ഇസ്‌റാഈല്‍ വംശഹത്യാ യുദ്ധം ആരംഭിച്ചതിനുശേഷം മരണസംഖ്യ 63,459 ആയി ഉയര്‍ന്നതായും 160,256 ല്‍ അധികം പേര്‍ക്ക് പരുക്കേറ്റതായും ഗസ്സ മുനമ്പിലെ ഫലസ്തീന്‍ ആരോഗ്യ മന്ത്രാലയം അറിയിച്ചു. ഗസ്സയിലെ ആശുപത്രികളില്‍ ഞായറാഴ്ച ഏഴ് പുതിയ പട്ടിണി മരണങ്ങള്‍ റിപ്പോര്‍ട്ട് ചെയ്യപ്പെട്ടു. ഇതോടെ പോഷകാഹാരക്കുറവ് മൂലം മരിച്ചവരുടെ ആകെ എണ്ണം 339 ആയി, ഇതില്‍ 124 കുട്ടികളും ഉള്‍പ്പെടുന്നു.

പത്രപ്രവര്‍ത്തകന്‍ ഇസ്‌ലാം ആബെദിന്റെ മരണത്തോടെ കൊല്ലപ്പെട്ട മാധ്യമപ്രവര്‍ത്തകരുടെ എണ്ണം 247 ആയി ഉയര്‍ന്നതായി ഗസ്സയിലെ ഗവണ്‍മെന്റ് മീഡിയ ഓഫിസ് അറിയിച്ചു.

ALSO READ: കരുതിയിരുന്നോ വന്‍നാശം കാത്തിരിക്കുന്നു, ഇസ്‌റാഈലിന് അബു ഉബൈദയുടെ താക്കീത്; പിന്നാലെ സൈനിക കേന്ദ്രങ്ങളെ ലക്ഷ്യമിട്ട് പോരാളികളുടെ തിരിച്ചടി, സൈനികന്‍ കൊല്ലപ്പെട്ടു, നിരവധി പേര്‍ക്ക് പരുക്ക്, നാലുപേരെ കാണാതായി

അതിനിടെ, അല്‍ ഖസ്സാം വക്താവ് അബൂ ഉബൈദയെ വധിച്ചെന്ന് അവകാശപ്പെട്ട് കഴിഞ്ഞ ദിവസം ഇസ്‌റാഈല്‍ രംഗത്തെത്തിയിരുന്നു. ഇന്നലെ നടന്ന ഒരു സര്‍ക്കാര്‍ യോഗത്തിനിടെ പ്രധാനമന്ത്രി ബെന്യാമിന്‍ നെതന്യാഹുവാണ് ഇക്കാര്യം പ്രഖ്യാപിച്ചതെന്നാണ് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തത്. എന്നാല്‍, ഗസ്സയുടെ ഔദ്യോഗിക വക്താവായ അബു ഉബൈദ എന്ന പേരിലറിയപ്പെടുന്ന ഹുദൈഫ സമീര്‍ അബ്ദുല്ല അല്‍-കഹ്ലൗത്തിന്റെ മരണം ഹമാസോ അല്‍ ഖസ്സാമോ ഇതുവരെ സ്ഥിരീകരിച്ചിട്ടില്ല. ഗസ്സ സിറ്റിയിലെ റിമാല്‍ മേഖലയില്‍ ശനിയാഴ്ച ഇസ്‌റാഈല്‍ നടത്തിയ വ്യോമാക്രമണത്തിലാണ് അബു ഉബൈദ കൊല്ലപ്പെട്ടതെന്നാണ് ഇസ്‌റാഈല്‍ മാധ്യമങ്ങള്‍ റിപ്പോര്‍ട്ട് ചെയ്തത്. ഒരു അപ്പാര്‍ട്ട്‌മെന്റിന് നേരെ ഇസ്‌റാഈല്‍ നടത്തിയ ആക്രമണത്തില്‍ എല്ലാ താമസക്കാരും കൊല്ലപ്പെട്ടതായി ഒരു ഫലസ്തീന്‍ വൃത്തത്തെ ഉദ്ധരിച്ച് സഊദി മാധ്യമം റിപ്പോര്‍ട്ട് ചെയ്തിരുന്നു.

ALSO READ: ഹമാസിന്റെ അൽ-ഖസ്സാം ബ്രിഗേഡ്‌സ് വക്താവ് അബു ഉബൈദ കൊല്ലപ്പെട്ടു? ആക്രമണത്തിൽ കൊല്ലപ്പെട്ടതായി ഇസ്‌റാഈൽ മാധ്യമങ്ങൾ

അതിനിടെ, മുന്‍ ഹമാസ് തലവന്‍ യഹ്യ സിന്‍വാറിന്റെ സഹോദരന്‍ മുഹമ്മദ് സിന്‍വാര്‍ കൊല്ലപ്പെട്ടതായി ഹമാസ് സ്ഥിരീകരിച്ചു. ഇന്നലെ ഇസ്മാഈല്‍ ഹനിയ്യ, യഹ്യ സിന്‍വാര്‍, മുഹമ്മദ് ദൈഫ് തുടങ്ങിയ നേതാക്കളുടെ ചിത്രങ്ങള്‍ക്കൊപ്പം മുഹമ്മദ് സിന്‍വാറിന്റെയും ചിത്രവും 'സൈനിക കൗണ്‍സിലിന്റെ രക്തസാക്ഷികള്‍' എന്ന തലക്കെട്ടേടെ ഹമാസ് പുറത്തുവിട്ടിരുന്നു. 2023 ഒക്ടോബര്‍ ഏഴിന് ഹമാസ് നടത്തിയ പോരാട്ടത്തിന്റെ സൂത്രധാരനാണെന്ന് ഇസ്‌റാഈല്‍ ആരോപിച്ച യഹ്യ സിന്‍വാറിന്റെ ഇളയ സഹോദരനായിരുന്നു മുഹമ്മദ് സിന്‍വാര്‍. കമാന്‍ഡര്‍ മുഹമ്മദ് ദെയ്ഫിന്റെ മരണശേഷം അല്‍ ഖസ്സാം ബ്രിഗേഡുകളുടെ സൈനിക കൗണ്‍സിലിന്റെ നേതൃത്വം അദ്ദേഹത്തിനായിരുന്നെന്ന് റിപ്പോര്‍ട്ടുണ്ടായിരുന്നു. 2021ല്‍ മുഹമ്മദ് സിന്‍വാറിനെ വധിക്കാന്‍ ഇസ്‌റാഈല്‍ ആറ് തവണ ശ്രമിച്ചിരുന്നെങ്കിലും എല്ലാം പരാജയപെടുകയായിരുന്നു. 2014ല്‍ സിന്‍വാര്‍ മരിച്ചുവെന്ന് വാര്‍ത്ത പ്രചരിച്ചിരുന്നെങ്കിലും പിന്നീട് ആ വിവരങ്ങള്‍ തെറ്റാണെന്ന് കണ്ടെത്തി. മുഹമ്മദ് സിന്‍വാര്‍ എവിടെയാണെന്ന് വിവരങ്ങള്‍ നല്‍കുന്നവര്‍ക്ക് ഇസ്‌റാഈല്‍ 3,00,000 ഡോളര്‍ പാരിതോഷികം പ്രഖ്യാപിച്ചിരുന്നു.

ഇന്നലെയും ഗസ്സയില്‍ ഇസ്‌റാഈല്‍ ശക്തമായ ആക്രമണമാണ് നടത്തിയത്. കുഞ്ഞുങ്ങളുള്‍പ്പെടെ 80ഓളം പേരെയാണ് ഇന്നലെ മാത്രം കൊലപ്പെടുത്തിയത്. ഗസ്സയില്‍ ഹമാസ് പ്രത്യാക്രമണത്തില്‍ ഒരു ഉയര്‍ന്ന സൈനിക ഉദ്യോഗസ്ഥന്‍ കൊല്ലപ്പെട്ടതായി ഇസ്‌റാഈല്‍ സ്ഥിരീകരിച്ചിട്ടുണ്ട്. ഭക്ഷണവും വൈദ്യസഹായവും നിഷേധിച്ച് ഗസ്സ സിറ്റിയില്‍ നിന്ന് ഫലസ്തീനികളെ പുറന്തള്ളാന്‍ ആസൂത്രിത നീക്കമാണ് അരങ്ങേറുന്നതെന്ന് യു.എന്‍ ഏജന്‍സികള്‍ കുറ്റപ്പെടുത്തി. വെടിനിര്‍ത്തല്‍ ആവശ്യപ്പെട്ട് ഇന്നലെയും ഇസ്‌റാഈലിലെ അമ്പതോളം കേന്ദ്രങ്ങളില്‍ ജനകീയ പ്രക്ഷോഭ പരിപാടികളാണ് നടന്നത്.

at least 78 people were killed in gaza today, including 32 standing in line for food. since israel's offensive began in october 2023, the death toll has risen to 63,459, with over 160,256 injured, according to the gaza health ministry.