കൽപ്പറ്റ: ഉരുളൊഴുകിയ വഴികളിൽ വിദഗ്ധസമിതി നാട്ടിയ കല്ലുകളാൽ 'സുരക്ഷിത'രായവരുടെ ആധിക്ക് ഒരാണ്ടു പിന്നിടുമ്പോഴും അറുതിയില്ല. സർക്കാർ പ്രസിദ്ധീകരിച്ച ഗുണഭോക്തൃ പട്ടികകളിലൊന്നും ഇടമില്ലാതായ അട്ടമല സ്വദേശിനി 73കാരിയായ ദേവയാനിയും ഭിന്നശേഷിക്കാരിയായ മകൾ രജനിയും (40) ഇപ്പോഴും കാത്തിരിപ്പ് തുടരുകയാണ്. പലതവണ ജില്ലാ കലക്ടർക്ക് പരാതി നൽകിയെങ്കിലും പരിഹാരമുണ്ടായിട്ടില്ല. 

ദുരന്തത്തിനുശേഷം അട്ടമലയിലും ജനവാസമില്ലാത്ത സ്ഥിതിയാണ്. ജന്മനാ ഭിന്നശേഷിക്കാരിയായ മകളെയും കൊണ്ട് ഇനി ദുരന്തമേഖലയിലേക്ക് പോകാനാകില്ലെന്ന് ദേവയാനി പറയുന്നു. അട്ടമലയിൽ പുഴയോരത്താണ് ഇവരുടെ വീടുള്ളത്. ജോൺ മത്തായിയുടെ നേതൃത്വത്തിലുള്ള വിദ്ഗധസമിതി ദുരന്തസാധ്യതാ മേഖലകൾ അടയാളപ്പെടുത്തി കല്ലിട്ടപ്പോൾ ഇവരുടെ വീട് 'സുരക്ഷിത' മേഖലയിലായി. ഇതോടെ നിലവിലെ സർക്കാർ മാനദണ്ഡങ്ങൾ പ്രകാരം പരിഗണിക്കാനാകില്ലെന്നാണ് അധികൃതർ പറയുന്നത്.  

ALSO READ: ഗോവിന്ദ ചാമിയുടെ ജയില്‍ചാട്ടം; വകുപ്പ് തല അന്വഷണ റിപ്പോര്‍ട്ട് ഇന്ന് സമര്‍പ്പിച്ചേക്കും 

'മകളുടെ കൺമുന്നിൽ തന്നെ എപ്പോഴും വേണം. ജോലിക്ക് പോലും പോകാൻ കഴിയില്ല. സർക്കാർ നൽകുന്ന ഉപജീവന സഹായവും മകളുടെ പെൻഷനുമാണ് ആശ്രയം. ഭർത്താവ് വർഷങ്ങൾക്ക് മുമ്പ് മരിച്ചു. താനും മകളും മാത്രമാണുള്ളത്. കണ്ണടയ്ക്കും വരെ മകളെ നോക്കണം. അതുകഴിഞ്ഞാൽ എന്താകും സ്ഥിതിയെന്ന് അറിയില്ല. ടൗൺഷിപ്പിലാകുമ്പോൾ അയൽക്കാരൊക്കെ ഉണ്ടാകുമല്ലോ. പദ്ധതിയിൽ ഞങ്ങളെ കൂടി ഉൾപ്പെടുത്താൻ ദയ കാണിക്കണം'- ദേവയാനി വിങ്ങലോടെ പറഞ്ഞുനിർത്തി. 

താൽക്കാലിക പുനരധിവാസത്തിന്റെ ഭാഗമായി കൽപ്പറ്റ നഗരസഭയുടെ മുണ്ടേരിയിലെ ഷെൽട്ടർ ഹോമിലാണ് ഈ അമ്മയും മകളും കഴിയുന്നത്. മാനദണ്ഡങ്ങൾ ഇരുമ്പുലക്കയല്ലെന്നായിരുന്നു റവന്യു മന്ത്രി കെ. രാജന്റെ വാക്കുകൾ. എന്നാൽ, അതിനേക്കാൾ കരുത്തുറ്റതാണെന്ന് തെളിയിക്കുന്നതാണ് ദുരന്തബാധിതരായ ഇവരടക്കമുള്ള പല കുടുംബങ്ങളുടെയും ജീവിതം.

"Mundakkai Rehabilitation: Government shows no mercy towards Devayani and her daughter."