കണ്ണൂർ: സൗമ്യ കേസ് പ്രതി ഗോവിന്ദച്ചാമി ജയിൽ ചാടിയതിന് ശേഷം ജയിലിന് മുന്നിലൂടെ നടന്നുപോകുന്ന ദൃശ്യങ്ങൾ പുറത്ത്. രണ്ട് തവണയാണ് കൊടുംകുറ്റവാളി ജയിൽ ചാടിയതിന് ശേഷം പൊലിസിന്റെ മൂക്കിന് തുമ്പത്ത് കൂടെ നടന്നുപോയത്.  ദിശ തെറ്റി ആദ്യം തളിപ്പറമ്പ് ഭാഗത്തേക്കാണ് ഇയാൾ ആദ്യം സഞ്ചരിച്ചത്. പിന്നീട് വീണ്ടും ജയിലിന് മുന്നിലൂടെ ഇയാൾ നടന്നു പോകുന്ന ദൃശ്യങ്ങൾ കാണാം. നേരം പുലർന്നു തുടങ്ങിയ ആറ് മണിയോടെയാണ് ഇയാൾ നടന്നുപോകുന്നത്.

കണ്ണൂർ സെൻട്രൽ ജയിലിലെ സെല്ലിന്റെ സമീപത്തുള്ള ദൃശ്യങ്ങൾ നേരത്തെ പുറത്ത് വന്നിരുന്നു. പൊലിസിന്റെ കനത്ത അനാസ്ഥ വെളിപ്പെടുത്തുന്ന ദൃശ്യങ്ങളാണ് പുറത്തുവന്നത്. പുലർച്ചെ 1.15 നാണ് ഗോവിന്ദച്ചാമി സെല്ലിൽ നിന്ന് പുറത്തേക്ക് ചാടുന്നത്. രണ്ടു കമ്പികൾ ദിവസങ്ങൾ നീണ്ട പ്രയത്നത്തിലൂടെ അറുത്തുമാറ്റിയാണ് പുറത്തേക്ക് കടക്കുന്നത്. സെല്ലിന്റെ ഏറ്റവും താഴെ ഭാഗത്ത് നിന്ന് ഇഴഞ്ഞ് നീങ്ങി പുറത്തെത്തുന്ന ദൃശ്യങ്ങളാണ് ആദ്യം കാണുന്നത്. സെല്ലിനുള്ളിൽ മൂന്ന് തവണ തുണി ഉൾപ്പെടെയുള്ള ചില സാധനങ്ങൾ എടുത്തു. 

ALSO READ: ജയിൽ സുരക്ഷ; സർക്കാരിനെ തിരുത്താൻ പഠനം; ഭരണാനുകൂല സംഘടന റിപ്പോർട്ട് തയാറാക്കുന്നു

1.20 കഴിയുന്നതോടെയാണ് ഇയാൾ സെല്ലിന്റെ ഭാഗത്ത് നിന്ന് പുറത്തേക്ക് ഇറങ്ങുന്നത്. പിന്നീട് പത്താം ബ്ലോക്കിൻറെ മതിൽ ചാടിക്കടന്നു. ശേഷം വലിയ മതിലായ പുറം മതിൽ ചാടിക്കടന്നു. ജയിലിന്റെ പ്രധാന മതിൽ ചാടിക്കടക്കുമ്പോഴേക്കും സമയം നാല് മണി ആയിരുന്നു. 

സെല്ലിന് പുറത്തേക്ക് ഇറങ്ങി രണ്ടുമണിക്കൂറോളം ജയിലിനുള്ളിൽ നിന്ന് പുറത്തേക്ക് കടക്കാൻ ശ്രമങ്ങൾ നടത്തിയിട്ടും പൊലിസുകാർ മാത്രം ഒന്നും അറിഞ്ഞില്ല. സിസിടിവി ഉണ്ടായിട്ടും അത് മോണിറ്റർ ചെയ്യാൻ ആരും ഉണ്ടായില്ല. ജയിൽ സുരക്ഷാ സംവിധാനങ്ങളിലെ പോരായ്മയും അധികൃതരുടെ ഭാഗത്ത് നിന്നുണ്ടായ വീഴ്ചകളും തുറന്നുകാട്ടുന്നതാണ് ഗോവിന്ദച്ചാമിയുടെ ജയിൽ ചാട്ടം.