കാസർഗോഡ്: സംസ്ഥാനത്ത് വൈദ്യുതി കമ്പിയിൽ നിന്ന് ഷോക്കേറ്റ് വീണ്ടും മരണം. കാസർഗോഡാണ് പൊട്ടിവീണ വൈദ്യുതി കമ്പിയിൽ നിന്നു ഷോക്കേറ്റ് കർഷകൻ മരിച്ചത്. വയലാംകുഴിയിലെ മേലത്ത് കുഞ്ഞുണ്ടൻ നായർ ആണ് മരിച്ചത്. ഇദ്ദേഹത്തിന്‍റെ പശുവിനെയും ഷോക്കേറ്റ് ചത്ത നിലയില്‍ കണ്ടെത്തി.

ചെമ്മനാട്, കോളിയടുക്കം വയലാംകുഴി പഞ്ചിലാങ്കൽ വയലിലാണ് ദാരുണ സംഭവം. ക്ഷീര കർഷകനായ കുഞ്ഞുണ്ടൻ നായർ വയലില്‍ പശുവിനെ പുല്ല് മേക്കാനായി പോയതായിരുന്നു. എന്നാൽ ഏറെ നേരമായിട്ടും വീട്ടില്‍ തിരിച്ചെത്താത്തതിനെ വീട്ടുകാർ അന്വേഷണം നടത്തുകയായിരുന്നു. ഇതിനിടെയാണ് വയലിൽ ഷോക്കേറ്റ് കുഞ്ഞുണ്ടൻ നായരെയും പശുവിനെയും മരിച്ച നിലയില്‍ കണ്ടെത്തിയത്.

കഴിഞ്ഞ ദിവസം പൊട്ടീവീണ വൈദ്യുതി കമ്പിയില്‍ നിന്ന് ഷോക്കേറ്റ് മലപ്പുറത്ത് പതിനെട്ടുകാരന് ജീവൻ നഷ്ടമായിരുന്നു. വേങ്ങര കണ്ണമംഗലം അച്ചനമ്പലം സ്വദേശി അബ്ദുല്‍ വദൂദാണ് മരിച്ചത്. വെട്ടുതോട് തോട്ടില്‍ കുളിക്കാന്‍ ഇറങ്ങിയപ്പോഴാണ് യുവാവിന് ഷോക്കേറ്റത്. അറിയാതെ വൈദ്യുതി ലൈനില്‍ പിടിക്കുകയായിരുന്നു. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം തിരുരങ്ങാടി താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.