തിരുവനന്തപുരം: എഡിജിപി എം.ആർ. അജിത്കുമാറുമായി ബന്ധപ്പെട്ട ട്രാക്ടർ വിവാദത്തിൽ ശ്രദ്ധേയമായ നടപടിയുമായി കേരള സർക്കാർ. എഡിജിപി എം.ആർ. അജിത്കുമാറിനെ പൊലിസ് വകുപ്പിൽ നിന്ന് മാറ്റി എക്സൈസ് കമ്മിഷണറായി നിയമിച്ചു. നിലവിൽ ബറ്റാലിയൻ എഡിജിപിയായ അജിത്കുമാറിനെതിരെ ഡിജിപി ശിപാർശ ചെയ്ത നടപടിയുടെ അടിസ്ഥാനത്തിലാണ് ഈ മാറ്റം. പുതിയ നിയമനത്തിന് ഉത്തരവ് പുറത്തിറങ്ങി. നിലവിലെ എക്സൈസ് കമ്മീഷണർ മഹിപാൽ യാദവ് ആരോ​ഗ്യകാരണങ്ങളാൽ 40 ദിവസത്തേക്ക് അവധിയിലാണ്. തുടർന്നാണ് അജിത്കുമാറിനെ എക്സൈസ് കമ്മീഷണറായി നിയമിച്ചത്.

ALSO READ: നിമിഷപ്രിയയുടെ വധശിക്ഷ റദ്ദാക്കാൻ ധാരണ; മോചന ചർച്ചകൾ തുടരും ; ഔദ്യോ​ഗികമായി സ്ഥിരീക്കരിക്കാതെ വിദേശകാര്യ മന്ത്രാലയം

സ്വാമി അയ്യപ്പൻ റോഡിൽ നടന്ന ട്രാക്ടർ യാത്രയുമായി ബന്ധപ്പെട്ട വിവാദമാണ് നടപടിക്ക് കാരണം. ഹൈക്കോടതി നേരത്തെ തന്നെ ഈ റോഡിലൂടെയുള്ള ട്രാക്ടർ യാത്ര നിരോധിച്ചിരുന്നു. എന്നാൽ, പമ്പ ഗണപതി ക്ഷേത്രത്തിൽ ദർശനം നടത്തിയ ശേഷം എം.ആർ. അജിത്കുമാർ സ്വാമി അയ്യപ്പൻ റോഡിൽ പൊലിസിന്റെ ഉടമസ്ഥതയിലുള്ള ട്രാക്ടറിൽ യാത്ര ചെയ്തു. സിസിടിവി ക്യാമറകൾ പ്രവർത്തിക്കാത്ത സ്ഥലത്തായിരുന്നു ഈ നിയമവിരുദ്ധ യാത്ര. അജിത്കുമാറിന്റെ വിശദീകരണം തൃപ്തികരമല്ലെന്ന് ഡിജിപി സർക്കാരിന് റിപ്പോർട്ട് നൽകിയിരുന്നു. കാലുവേദന മൂലമാണ് ട്രാക്ടറിൽ കയറിയതെന്നായിരുന്നു അജിത്കുമാറിന്റെ വാദം. എന്നാൽ, ഈ വിശദീകരണം ഹൈക്കോടതിയെ തൃപ്തിപ്പെടുത്തിയില്ല. ട്രാക്ടർ യാത്ര ചട്ടലംഘനമാണെന്ന് സ്പെഷ്യൽ കമ്മീഷണർ ഹൈക്കോടതിക്ക് റിപ്പോർട്ട് സമർപ്പിച്ചിരുന്നു.

ALSO READ: തൃശ്ശൂരിൽ മരം മുറിച്ച് മാറ്റുന്നതിനിടെ വനം വകുപ്പ് ജീവനക്കാരന് ദാരുണാന്ത്യം

ഹൈക്കോടതി ഈ വിഷയത്തിൽ രൂക്ഷ വിമർശനം ഉയർത്തിയിരുന്നു. അജിത്കുമാറിനെതിരെ ഉചിതമായ നടപടി സ്വീകരിച്ച് കോടതിയെ അറിയിക്കണമെന്ന് ഡിജിപി സർക്കാരിനോട് നിർദേശിച്ചിരുന്നു. ഇതിന്റെ ഭാഗമായാണ് എഡിജിപിയെ എക്സൈസ് കമ്മിഷണറായി മാറ്റി നിയമിച്ചിരിക്കുന്നത്.

Following a tractor controversy and High Court criticism, ADGP M.R. Ajitkumar has been transferred from the police department to the position of Excise Commissioner