ജെഎസ്‍ഡബ്ല്യു എംജി മോട്ടോർ ഇന്ത്യ, ഇന്ത്യൻ വിപണിയിൽ എംജി സൈബർസ്റ്റർ എന്ന ഇലക്ട്രിക് സ്‌പോർട്‌സ് കാർ ഔദ്യോഗികമായി അവതരിപ്പിച്ചു. ആകർഷകമായ ഡിസൈനും ശക്തമായ ബാറ്ററി പാക്കും ഉൾക്കൊള്ളുന്ന ഈ കൺവേർട്ടിബിൾ സ്‌പോർട്‌സ് കാറിന്റെ പ്രാരംഭ എക്സ്-ഷോറൂം വില 74.99 ലക്ഷം രൂപയാണ്. 2025 ലെ ഭാരത് മൊബിലിറ്റി ഗ്ലോബൽ എക്സ്പോയിൽ ഈ കാർ പ്രദർശിപ്പിച്ചിരുന്നു, ബുക്കിംഗ് ആരംഭിച്ചതായും കമ്പനി അറിയിച്ചു. 2025 ഓഗസ്റ്റ് 10 മുതൽ ഡെലിവറി ആരംഭിക്കും.

ലോകത്തിലെ ഏറ്റവും വേഗതയേറിയ എംജി കാറായി കമ്പനി അവകാശപ്പെടുന്ന ഈ ഇലക്ട്രിക് റോഡ്സ്റ്റർ, 1960-കളിലെ എംജി ബി റോഡ്സ്റ്ററിൽ നിന്ന് പ്രചോദനം ഉൾക്കൊണ്ടാണ് രൂപകൽപ്പന ചെയ്തിരിക്കുന്നത്. റെട്രോ ശൈലിയും ആധുനിക സാങ്കേതികവിദ്യയും സമന്വയിപ്പിച്ച ഈ കാറിന് സ്ലോപ്പിംഗ് ബോണറ്റും സിസർ ഡോറുകളും ഉൾപ്പെടുന്നു. എംജി സെലക്ട് പ്രീമിയം ഷോറൂമുകൾ വഴി മാത്രമാണ് ഈ രണ്ട് സീറ്റുകളുള്ള കൺവേർട്ടിബിൾ വിൽപ്പനയ്ക്ക് എത്തുക.

ബാറ്ററിയും പ്രകടനവും

എംജി സൈബർസ്റ്റർ 77 kWh ബാറ്ററി പാക്ക് ഉപയോഗിക്കുന്നു, ഇത് ഒറ്റ ചാർജിൽ 580 കിലോമീറ്റർ റേഞ്ച് വാഗ്ദാനം ചെയ്യുന്നു (CLTC). വെറും 3.2 സെക്കൻഡിൽ 0-100 കിലോമീറ്റർ വേഗത കൈവരിക്കുന്ന ഈ കാർ, എംജിയുടെ ഏറ്റവും വേഗതയേറിയ മോഡലാണ്. ബാറ്ററിയുടെ കനം 110 മില്ലിമീറ്റർ മാത്രമാണ്, ഇത് ഭാരം കുറഞ്ഞതും ഉയർന്ന പ്രകടനം നൽകുന്നതുമാണ്. കമ്പനി ബാറ്ററിക്ക് ലൈഫ്‌ടൈം വാറന്റിയും, കാറിന് മൂന്ന് വർഷത്തെ അൺലിമിറ്റഡ് കിലോമീറ്റർ വാറന്റിയും നൽകുന്നു.

ഡിസൈനും സവിശേഷതകളും

സൈബർസ്റ്ററിന്റെ മുൻവശത്ത് ആകർഷകമായ എൽഇഡി ഹെഡ്‌ലൈറ്റുകൾ, ഷാർപ്പ് ഡിആർഎല്ലുകൾ, നീളമേറിയ ബോണറ്റ് എന്നിവ ഉൾപ്പെടുന്നു. പിന്നിൽ, ഇന്റഗ്രേറ്റഡ് ഇൻഡിക്കേറ്ററുകളുള്ള ഫുൾ-വിഡ്ത്ത് എൽഇഡി ലൈറ്റ് ബാറും ആരോ-ഷേപ്പ്ഡ് ടെയിൽ ലൈറ്റുകളും ഉണ്ട്. 20 ഇഞ്ച് ലൈറ്റ് അലോയ് വീലുകളിൽ പിറെല്ലി പി-സീറോ ടയറുകൾ ഘടിപ്പിച്ചിരിക്കുന്നു, ഇത് മികച്ച ഗ്രിപ്പും പ്രകടനവും ഉറപ്പാക്കുന്നു.

സിസർ ഡോറുകൾ 5 സെക്കൻഡിൽ താഴെ സമയത്തിനുള്ളിൽ തുറക്കുന്നു, സുരക്ഷാ സെൻസറുകളും ആന്റി-പിഞ്ച് സംവിധാനവും ഉൾപ്പെടുത്തിയിട്ടുണ്ട്. ഇത് വാതിലുകൾ തുറക്കുമ്പോഴോ അടയ്ക്കുമ്പോഴോ വസ്തുക്കൾ കുടുങ്ങുന്നത് തടയുന്നു. കാറിന്റെ ഉൾഭാഗം വിമാന കോക്പിറ്റിന്റെ മാതൃകയിൽ രൂപകൽപ്പന ചെയ്തിരിക്കുന്നു. ത്രീ-വേ ഡിജിറ്റൽ ഡിസ്‌പ്ലേ, 10.2 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 7 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ബോസ് ഓഡിയോ സിസ്റ്റം, ഡ്യുവൽ-സോൺ ക്ലൈമറ്റ് കൺട്രോൾ, പിഎം 2.5 എയർ ഫിൽട്രേഷൻ, റീജനറേറ്റീവ് ബ്രേക്കിംഗ് എന്നിവ ഇതിൽ ഉൾപ്പെടുന്നു.

പവർട്രെയിനും സുരക്ഷയും

ഇരട്ട മോട്ടോർ സജ്ജീകരണമുള്ള ഈ കാർ 503 എച്ച്പി പവറും 725 എൻഎം ടോർക്കും ഉൽപ്പാദിപ്പിക്കുന്നു. 8-ലെയർ ഫ്ലാറ്റ് വയർ വൈൻഡിംഗ്, വാട്ടർഫാൾ ഓയിൽ കൂളിംഗ് തുടങ്ങിയ നൂതന സാങ്കേതികവിദ്യകൾ ഉപയോഗിച്ചാണ് മോട്ടോറുകൾ രൂപകൽപ്പന ചെയ്തിരിക്കുന്നത്. പരമാവധി വേഗത മണിക്കൂറിൽ 200 കിലോമീറ്ററാണ്. എച്ച് ആകൃതിയിലുള്ള ഫുൾ ക്രാഡിൽ ഘടന ഉയർന്ന വേഗതയിൽ റോൾഓവർ കുറയ്ക്കുന്നു.

സുരക്ഷയ്ക്കായി, ലെവൽ 2 എഡിഎഎസ്, റിയൽ-ടൈം ഡ്രൈവർ മോണിറ്ററിംഗ്, ഡ്യുവൽ ഫ്രണ്ട്, സൈഡ് എയർബാഗുകൾ, ഇലക്ട്രോണിക് സ്റ്റെബിലിറ്റി കൺട്രോൾ (ESC), ഇലക്ട്രോണിക് ഡിഫറൻഷ്യൽ ലോക്ക് എന്നിവ ഉൾപ്പെടുത്തിയിട്ടുണ്ട്. നാല് ഡ്രൈവിംഗ് മോഡുകൾ—കംഫർട്ട്, സ്‌പോർട്ട്, കസ്റ്റം, സൂപ്പർ സ്‌പോർട്ട്—ഡ്രൈവിംഗ് അനുഭവം മെച്ഛപ്പെടുത്തുന്നു.

വിപണിയിലെ സ്ഥാനം

എംജി സൈബർസ്റ്റർ, ബിഎംഡബ്ല്യു Z4, മെർസിഡസ്-ബെൻസ് എഎംജി E53 കാബ്രിയോലെ എന്നിവയുമായി മത്സരിക്കുന്നു, എന്നാൽ വിലനിർണയത്തിലും ഇലക്ട്രിക് സാങ്കേതികവിദ്യയിലും ഇത് മുൻതൂക്കം നേടുന്നു. എംജിയുടെ പ്രീമിയം ഇവി ശ്രേണിയിൽ ZS EV, Comet EV, Windsor EV എന്നിവയ്‌ക്കൊപ്പം സൈബർസ്റ്റർ ഒരു ഹൈ-പെർഫോമൻസ് ഓപ്ഷനായി നിലകൊള്ളുന്നു.

JSW MG Motor India launched the MG Cyberster, its fastest electric roadster, at Rs 74.99 lakh (ex-showroom). Featuring a 77 kWh battery with a 580 km range and dual motors producing 510 bhp, it accelerates from 0-100 kmph in 3.2 seconds. The convertible sports car, inspired by the 1960s MG B Roadster, boasts scissor doors, a triple-screen cockpit, and Level 2 ADAS. Bookings are open, with deliveries starting August 10, 2025.