ദുബൈ: വിസയ്ക്ക് അപേക്ഷിക്കുന്നവര്‍ തങ്ങളുടെ അപേക്ഷകളില്‍ നല്‍കുന്ന വിവരങ്ങളുടെ കൃത്യത ഉറപ്പാക്കണമെന്ന് ജനറല്‍ ഡയരക്ടറേറ്റ് ഓഫ് ഐഡന്റിറ്റി ആന്‍ഡ് ഫോറീനേഴ്‌സ് അഫയേഴ്‌സ് (Dubai GDRFA). അപേക്ഷകര്‍ ഇക്കാര്യത്തില്‍ നിരന്തരം അശ്രദ്ധ വരുത്തുന്ന സാഹചര്യത്തിലാണ് അധികൃതര്‍ ഈ നിര്‍ദേശവുമായി രംഗത്തെത്തിയത്.
വിസാ സേവനങ്ങള്‍ തേടുന്ന ആളുകള്‍ അവ്യക്ത വിവരങ്ങള്‍ നല്‍കുന്നത് നടപടിക്രമങ്ങള്‍ക്ക് സ്വാഭാവികമായും കാലതാമസം വരുത്തുമെന്ന് അധികൃതര്‍ ചൂണ്ടിക്കാട്ടി. ശരിയായതും കൃത്യവുമായ വിവരങ്ങള്‍ വിസാ നടപടികള്‍ കൂടുതല്‍ വേഗത്തിലാക്കാന്‍ സഹായിക്കുമെന്നും ജി.ഡി.ആര്‍.എഫ്.എ കൂട്ടിച്ചേര്‍ത്തു.

ദുബൈയില്‍ ആളുകള്‍ ആമര്‍ സെന്ററുകള്‍ വഴിയോ വകുപ്പിന്റെ സ്മാര്‍ട്ട് ചാനലുകള്‍ മുഖേനയോ എമിഗ്രേഷന്‍ വകുപ്പിലേക്ക് സമര്‍പ്പിക്കുന്ന സേവന അപേക്ഷകളില്‍ വ്യക്തി വിവരങ്ങള്‍, ഇമെയില്‍ ഐഡി, മൊബൈല്‍ നമ്പര്‍, പേരുകളിലെ സ്‌പെല്ലിംഗ് എന്നിവയെല്ലാം കൃത്യമാണെന്ന് പരിശോധിച്ച് ഉറപ്പു വരുത്തണം. അപേക്ഷ നടപടിയുടെ ഓരോ ഘട്ടവും വകുപ്പ് ഉപയോക്താക്കളെ അറിയിക്കുന്നത് ഈ വിവരങ്ങളുടെ അടിസ്ഥാനത്തിലാണ്. അതിനാല്‍, അപേക്ഷിച്ച വിവരങ്ങള്‍ ശരിയാണെന്ന് സേവനം തേടുന്നവര്‍ എപ്പോഴും ശ്രദ്ധിക്കണമെന്ന് ജി.ഡി.ആര്‍.എഫ്.എ പൊതുജനങ്ങളെ ഓര്‍മിപ്പിച്ചു.

'ഏറ്റവും വേഗത്തിലാണ് ദുബൈയില്‍ വിസാ നടപടികള്‍ പൂര്‍ത്തിയാക്കി നല്‍കുന്നത്. ഉപയോക്താക്കള്‍ക്ക് എല്ലായ്‌പ്പോഴും സന്തോഷകരമായ സേവനങ്ങള്‍ നല്‍കാനാണ് ജനറല്‍ ഡയരക്ടറേറ്റ് ശ്രദ്ധിക്കുന്നത്' ജി.ഡി.ആര്‍.എഫ്.എ ദുബൈ മേധാവി ലഫ്റ്റനന്റ് ജനറല്‍ മുഹമ്മദ് അഹ്മദ് അല്‍ മര്‍റി പറഞ്ഞു. എന്നാല്‍, ഉപയോക്താക്കള്‍ നല്‍കുന്ന തെറ്റായ വിവരങ്ങള്‍ കാരണം ചില സമയങ്ങളില്‍ അപേക്ഷകള്‍ക്ക് മേല്‍ നടപടികള്‍ക്ക് കാലതാമസം വരുന്നുണ്ട്. അതിനാല്‍, അപേക്ഷകര്‍ വ്യക്തമായ വിവരങ്ങള്‍ നല്‍കാനും, അപേക്ഷിച്ചത് ശരിയായാണെന്ന് ആവര്‍ത്തിച്ചുറപ്പു വരുത്താനും ശ്രദ്ധിക്കണമെന്നും അദ്ദേഹം നിര്‍ദേശിച്ചു.

അപേക്ഷയിലെ വിവരങ്ങള്‍ ശരിയാണെന്ന് ഉറപ്പു വരുത്തേണ്ടത് അപേക്ഷകന്റെ ഉത്തരവാദിത്തമാണ്. അപേക്ഷകള്‍ ടൈപ് ചെയ്ത ശേഷം എമിഗ്രേഷനിലേക്ക് സമര്‍പ്പിക്കുന്നതിന് മുന്‍പ് ശരിയാണെന്ന് ശ്രദ്ധിക്കുന്നത് ഏറ്റവും വേഗത്തില്‍ സന്തോഷകരമായ സേവനങ്ങള്‍ ഉറപ്പു വരുത്തുമെന്ന് അധികൃതര്‍ വിശദീകരിച്ചു.

ALSO READ: ഇന്ത്യന്‍ രൂപയും മറ്റ് ആഗോള കറന്‍സികളും തമ്മിലെ ഇന്നത്തെ വിനിമയ നിരക്ക് | India Rupee Value Today

Unclear information in visa applications will delay procedures: GDRFA warns