2025 വേൾഡ് ലെജന്റ്സ് ചാമ്പ്യൻഷിപ്പ് ജേതാക്കളായി സൗത്ത് ആഫിക്ക ചാമ്പ്യൻസ്. ഫൈനൽ പോരാട്ടത്തിൽ പാകിസ്താൻ ചാമ്പ്യൻസിനെ ഒമ്പത് വിക്കറ്റുകൾക്ക് കീഴടക്കിയാണ് സൗത്ത് ആഫ്രിക്ക കിരീടം ചൂടിയത്. മത്സരത്തിൽ ആദ്യം ബാറ്റ് ചെയ്ത പാകിസ്താൻ 20 ഓവറിൽ അഞ്ചു വിക്കറ്റ് നഷ്ടത്തിൽ 195 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ സൗത്ത് ആഫ്രിക്ക 16.5 ഓവറിൽ ഒരു വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു.

സെഞ്ച്വറി നേടിയ എബി ഡിവില്ലിയേഴ്‌സിന്റെ കരുത്തിലാണ് സൗത്ത് ആഫ്രിക്ക അനായാസ വിജയം സ്വന്തമാക്കിയത്. 60 പന്തിൽ പുറത്താവാതെ 120 റൺസ് നേടിയാണ് എബിഡി സൗത്ത് ആഫ്രിക്കക്ക് വിജയം സമ്മാനിച്ചത്. 12 ഫോറുകളും ഏഴ് സിക്സുകളും ആണ് ഡിവില്ലിയേഴ്സ് അടിച്ചെടുത്തത്. ടൂർണമെന്റിലെ എബിഡിയുടെ മൂന്നാം സെഞ്ച്വറി ആയിരുന്നു ഇത്. നേരത്തെ ഓസ്ട്രേലിയ, ഇംഗ്ലണ്ട് എന്നീ ടീമുകൾക്കെതിരെയും ഡിവില്ലിയേഴ്സ് സെഞ്ച്വറി നേടിയിരുന്നു. 

ഓസ്‌ട്രേലിയൻ ചാമ്പ്യൻസിനെതിരെ 46 പന്തിൽ 123 റൺസ് നേടിയാണ് ഡിവില്ലിയേഴ്സ് തിളങ്ങിയത്. 15 ഫോറുകളും എട്ട് കൂറ്റൻ സിക്സുകളുമാണ് ഡിവില്ലിയേഴ്‌സിന്റെ ബാറ്റിൽ നിന്നും പിറന്നത്. ഇംഗ്ലണ്ട് ചാമ്പ്യൻസിനെതിരെ 51 പന്തിൽ പുറത്താവാതെ 116 റൺസാണ് എബിഡി നേടിയത്. 15 ഫോറുകളും ഏഴ് സിക്‌സും അടങ്ങുന്നതാണ് താരത്തിന്റെ പ്രകടനം.

മത്സരത്തിൽ എബിഡിക്ക് പുറമെ ജെപി ഡുമിനി അർദ്ധ സെഞ്ച്വറി നേടിയും സൗത്ത് ആഫ്രിക്കയുടെ കിരീട നേട്ടത്തിൽ വലിയ പങ്കാണ് വഹിച്ചത്. 28 പന്തിൽ നാല് ഫോറുകളും രണ്ട് സിക്സുകളും അടക്കം 50 റൺസാണ് ഡുമിനി നേടിയത്. 

നേരത്തെ ആദ്യം ബാറ്റ് ചെയ്ത പാകിസ്താനായി ഷർജീൽ ഖാൻ അർദ്ധ സെഞ്ച്വറി നേടി. 44 പന്തിൽ 76 റൺസാണ് ഷർജീൽ ഖാൻ നേടിയത്. ഒമ്പത് ഫോറുകളും നാല് സിക്സുകളും ആണ് താരം നേടിയത്. 

South Africa Champions have won the 2025 World Legends Championship. South Africa won the title by defeating Pakistan Champions by nine wickets in the final.