തെല്‍ അവീവ്: ഗസ്സ നഗരം പൂര്‍ണമായി പിടിച്ചെടുക്കാനുള്ള പ്രധാനമന്ത്രി ബെഞ്ചമിന്‍ നെതന്യാഹുവിന്റെ പദ്ധതിക്ക് ഇസ്‌റാഈല്‍ സുരക്ഷാ കാബിനറ്റിന്റെ അംഗീകാരം. ബന്ദികളെ മുഴുവന്‍ തിരികെ എത്തിക്കുക, (ജീവനോടെയോ അല്ലാതെയോ)  ഹമാസിനെ നിരായുധീകരിക്കുക, ഗസ്സ മുനമ്പില്‍ ഇസ്‌റാഈലിന്റെ നിയന്ത്രണം, ബദല്‍ സിവിലിയന്‍ സര്‍ക്കാര്‍ രൂപീകരിക്കുക, സൈനികവത്കരണം എന്നിങ്ങനെ യുദ്ധം അവസാനിപ്പിക്കുന്നതിനായി നെതന്യാഹു മുന്നോട്ട് വെക്കുന്ന തത്വങ്ങളും സുരക്ഷാ കാബിനറ്റ് അംഗീകരിച്ചു. 

ഈ ഓപറേഷന്‍ ശേഷിക്കുന്ന ബന്ദികളുടെ ജീവന്‍ അപകടത്തിലാക്കുകയും ഒരു മാനുഷിക ദുരന്തത്തിന് കാരണമാവുകയും ചെയ്യുമെന്ന ഇസ്‌റാഈല്‍ പ്രതിരോധ സേനയുടെ മുന്നറിയിപ്പുകള്‍ അവഗണിച്ചുകൊണ്ടാണ് സുരക്ഷാ കാബിനറ്റിന്റെ നീക്കം. ഫലസ്തീനികളെ വടക്കന്‍ നഗരത്തില്‍ നിന്ന് മധ്യഗസ്സയിലെ ക്യാംപുകളിലേക്ക് മാറ്റാനാണ് ഇസ്‌റാഈല്‍ നീക്കമെന്നാണ് റിപ്പോര്‍ട്ടുകള്‍ നല്‍കുന്ന സൂചന. 

ഗസ്സ പൂര്‍ണമായും പിടിച്ചെടുക്കുമെന്നാണ് കഴിഞ്ഞ ദിവസം നെതന്യാഹു പറഞ്ഞിരുന്നത്. ഗസ്സയില്‍ ആക്രമണം ശക്തമാക്കുമെന്നും എന്നാല്‍, ഗസ്സ ഇസ്റാഈലിനോട് കൂട്ടിച്ചേര്‍ക്കില്ലെന്നും നെതന്യാഹു കൂട്ടിച്ചേര്‍ത്തു. അതേസമയം, ഗസ്സയ്ക്കകത്ത് പുതിയ ഒരു സുരക്ഷാ മേഖലയുണ്ടാക്കാന്‍ തയാറെടുക്കുകയാണെന്നും ദേശീയ മാധ്യമത്തിനനുവദിച്ച അഭിമുഖത്തില്‍ നെതന്യാഹു വെളിപ്പെടുത്തി.

ALSO READ: 'ബി.ജെ.ഡിയല്ല, ഭരിക്കുന്നത് ബി.ജെ.പി; ഇവിടെ ആരേയും ക്രിസ്ത്യാനികളാകാന്‍ അനുവദിക്കില്ല' ബജ്‌റംഗ്ദള്‍ സംഘം ആക്രമിച്ചത് ഇതും പറഞ്ഞെന്ന് മലയാളി വൈദികന്‍

ഗസ്സയുടെ ഭരണം ക്രമേണ പുതിയൊരു ഇടക്കാല സര്‍ക്കാരിന് കൈമാറും. ഹമാസ് ആയുധങ്ങള്‍ താഴെവയ്ക്കുകയും കീഴടങ്ങുകയും ബന്ദികളെ നിരുപാധികം മോചിപ്പിക്കുകയും ചെയ്താല്‍ ആ നിമിഷം യുദ്ധം നിര്‍ത്താമെന്നും നെതന്യാഹു പറഞ്ഞു. അതേസമയം, ഇസ്റാഈല്‍ സൈന്യം പൂര്‍ണമായി പിന്‍വാങ്ങിയാലേ വെടിനിര്‍ത്തലിനുള്ളൂവെന്നാണ് ഹമാസിന്റെ നിലപാട്. ഓപറേഷന്‍ സിന്ദൂറില്‍ ഇന്ത്യ ഇസ്റാഈലി ആയുധങ്ങള്‍ ഉപയോഗിച്ചതായും അവ വിജയം കണ്ടതായും നെതന്യാഹു പറഞ്ഞു. ഗസ്സ നഗരത്തിന്റെ നിയന്ത്രണം ഏറ്റെടുക്കുന്നതിനൊപ്പം യുദ്ധമേഖലകള്‍ക്ക് പുറത്തുള്ള സാധാരണക്കാര്‍ക്ക് മാനുഷിക സഹായം നല്‍കാനും ഇസ്‌റാഈല്‍ പ്രതിരോധ സേന (ഐ.ഡി.എഫ്) തയാറാകുമെന്ന് നെതന്യാഹുവിന്റെ ഓഫിസ് പ്രസ്താവനയില്‍ പറഞ്ഞു.

ബന്ദികളായ ഇസ്‌റാഈല്‍ പൗരന്മാരായ ബ്രാസ്ലാവ്സ്‌കിയുടെയും എവ്യാതര്‍ ഡേവിഡിന്റെയും ദൃശ്യങ്ങള്‍ ഹമാസ് പുറത്തുവിട്ടതിന് പിന്നാലെയാണ് ഗസ്സ മുനമ്പ് പൂര്‍ണമായും പിടിച്ചടക്കാന്‍ നെതന്യാഹു സൈന്യത്തോട് ഉത്തരവിട്ടത്. ശേഷിക്കുന്ന ബന്ദികളെ മോചിപ്പിക്കാന്‍ ഹമാസിനുമേല്‍ സമ്മര്‍ദം ചെലുത്തുക എന്ന ലക്ഷ്യമാണ് നെതന്യാഹുവിന്റെ പുതിയ നീക്കത്തിനു പിന്നിലെന്നായിരുന്നു റിപ്പോര്‍ട്ട്. 

ഇതിനകം ഗസ്സയിലെ 75 ശതമാനം പ്രദേശവും ഇസ്‌റാഈല്‍ സൈന്യത്തിന്റെ നിയന്ത്രണത്തിലാണ്. അതേസമയം, ഗസ്സയിലെ ആക്രമണങ്ങളും ഉപരോധവും ഇസ്‌റാഈല്‍ ശക്തമായി തുടരുകയാണ്. ഭക്ഷ്യ ക്ഷാമവും പോഷകാഹാരക്കുറവും മൂലം കഴിഞ്ഞ ദിവസം രണ്ടു കുട്ടികളടക്കം നാലുപേര്‍ കൂടി ഗസ്സയില്‍ മരിച്ചു. ഇതോടെ പട്ടിണിമൂലമുള്ള ഗസ്സയിലെ മരണം 200 ആയി. ഇതില്‍ 96ഉം കുട്ടികളാണ്.

Israel's security cabinet has approved Prime Minister Benjamin Netanyahu’s plan to capture Gaza City, disarm Hamas, recover all hostages, and establish a new civilian government under Israeli oversight.