2026 ഐപിഎല്ലിൽ രാജസ്ഥാൻ റോയൽസിൽ നിന്നും സഞ്ജു സാംസൺ മറ്റൊരു ടീമിലേക്ക് പോവുമെന്ന വാർത്തകളാണ് ഇപ്പോൾ ക്രിക്കറ്റ് ആരാധകർക്കിടയിൽ നിലനിൽക്കുന്നത്. രാജസ്ഥാൻ വിടാൻ സഞ്ജു സാംസൺ താത്പര്യം പ്രകടപ്പിച്ചുവെന്നാണ് ക്രിക് ബസ് റിപ്പോർട്ട് ചെയ്തത്. സഞ്ജു രാജസ്ഥാനിൽ തുടരുമെന്ന വാർത്തകൾ കഴിഞ്ഞ ദിവസങ്ങളിൽ പുറത്തുവന്നിരുന്നു. ഇതിന് പിന്നാലെയാണ് തന്നെ ലേലത്തിൽ വിടാൻ രാജസ്ഥനോട് സഞ്ജു ആവശ്യപ്പെട്ടുവെന്ന വാർത്ത പുറത്തു വന്നത്. 

സഞ്ജു രാജസ്ഥാൻ വിട്ടാൽ രാജസ്ഥാൻ റോയൽസിന്റെ അടുത്ത ക്യാപ്റ്റൻ ആരാവുമെന്ന ചർച്ചകളും നിലനിൽക്കുന്നുണ്ട്. സഞ്ജുവിന്റെ പകരക്കാരനായി റിയാൻ പരാഗ് രാജസ്ഥാന്റെ ക്യാപ്റ്റനാവാൻ ഏറെ സാധ്യത കല്പിക്കപെടുന്ന താരമാണ്. 2025 ഐപിഎൽ സീസണിൽ പരുക്ക് മൂലം സഞ്ജുവിന് ധാരാളം മത്സരങ്ങൾ നഷ്ടമായിരുന്നു. ഈ മത്സരങ്ങളിൽ രാജസ്ഥാനെ നയിച്ചിരുന്നത് പരാഗ് ആയിരുന്നു. എന്നാൽ ഇപ്പോൾ സഞ്ജുവിന്റെ പകരക്കാരനായി രാജസ്ഥാന്റെ ക്യാപ്റ്റൻസി ഏറ്റെടുക്കാൻ സാധ്യത പരാഗിനെക്കാൾ കൂടുതൽ യശ്വസി ജെയ്‌സ്വാളിന് ആണെന്നാണ് ലഭിക്കുന്ന വിവരങ്ങൾ. റേവ് സ്പോർട്സാണ് ഇക്കാര്യം റിപ്പോർട്ട് ചെയ്യുന്നത്. 

ഇന്ത്യൻ ടെസ്റ്റ്, ടി-20 ടീമുകളിൽ നിലവിൽ സ്ഥിര സാന്നിധ്യമായ ജെയ്‌സ്വാൾ ഇതുവരെ സീനിയർ ക്രിക്കറ്റിൽ ക്യാപ്റ്റനായി കളിച്ചിട്ടില്ല. നിലവിൽ ഇന്ത്യൻ ടീമിൽ മികച്ച പ്രകടനം പുറത്തെടുക്കുന്ന ജെയ്‌സ്വാൾ ഭാവിയിൽ ക്യാപ്റ്റനാവുമോ എന്നും കണ്ടുതന്നെ അറിയണം. കഴിഞ്ഞ സീസണിൽ പരാഗിന്റെ കീഴിൽ നിരാശ നിറഞ്ഞ പ്രകടനമായിരുന്നു രാജസ്ഥാൻ നടത്തിയത്. സഞ്ജുവിന്റെ അഭാവത്തിൽ എട്ട് മത്സരങ്ങളിൽ രാജസ്ഥാനെ നയിച്ച പരാഗിന് ടീമിനെ രണ്ട് മത്സരങ്ങളിൽ മാത്രമേ വിജയത്തിലെത്തിക്കാൻ സാധിച്ചിട്ടുള്ളൂ. 

അതേസമയം  സഞ്ജുവിന്റെ ട്രേഡുമായി ബന്ധപ്പെട്ട് ചെന്നൈയും രാജസ്ഥാനും തമ്മിൽ ചർച്ച നടക്കുന്നുവെന്നാണ് വൃത്തങ്ങൾ സൂചിപ്പിക്കുന്നത്. സഞ്ജുവിന് പകരമായി ഋതുരാജ് ഗെയ്ക്വാദ്, രവീന്ദ്ര ജഡേജ എന്നിവരിൽ ഒരാളെ രാജസ്ഥാൻ ചെന്നൈയിൽ നിന്നും ആവശ്യപ്പെട്ടിട്ടുണ്ട്. 

Reports suggest that youngster Yashwasi Jaiswal will be the next captain of Rajasthan Royals if Sanju Samson leaves the team