തൃശൂര്‍: തൃശൂര്‍ ലോക്‌സഭാ മണ്ഡലത്തിലെ വോട്ട് കൊള്ളയില്‍ ബി.ജെ.പിക്കെതിരേ കൂടുതല്‍ തെളിവുകള്‍ പുറത്ത്. ആലത്തൂര്‍ മണ്ഡലത്തിന്റെ ഭാഗമായ വേലൂര്‍ പഞ്ചായത്തില്‍ ബി.ജെ.പി സ്ഥാനാര്‍ഥിയായി മത്സരിച്ച ഹരിദാസന്‍, സുരേഷ് ഗോപിയുടെ ഡ്രൈവറായിരുന്ന അജയകുമാര്‍ എന്നിവര്‍ പൂങ്കുന്നം കാപ്പിറ്റല്‍ വില്ലേജ് ഫഌറ്റിലെ വോട്ടര്‍മാരാണ്. കോട്ടയം സ്വദേശിയും സുരേഷ് ഗോപിയുടെ അനുയായിയുമായ ബിജു പുളിക്കകണ്ടത്തിലിനും ഭാര്യക്കും തൃശൂരില്‍ വോട്ടുള്ളതായി കണ്ടെത്തി. ബി.ജെ.പി സംസ്ഥാന ഉപാധ്യക്ഷന്‍ മലപ്പുറം സ്വദേശിയായ വി. ഉണ്ണികൃഷ്ണന്‍ തൃശൂരില്‍ വോട്ട് ചെയ്തു എന്ന ആരോപണവുമായി കോണ്‍ഗ്രസ് നേതാവ് സന്ദീപ് വാര്യര്‍ രംഗത്തെത്തി.

പൂങ്കുന്നം, ശങ്കരംകുളങ്ങര ഫഌറ്റുകളില്‍ 117 വ്യാജവോട്ടുകള്‍ ചേര്‍ത്തുവെന്നും പരാതിയുണ്ട്. ഒരിടത്തുമാത്രം വ്യാജവിലാസം നല്‍കി 79 പേരുകള്‍ ചേര്‍ത്തു. പൂങ്കുന്നത്തെ ഇന്‍ലാന്റ് ഉദയ നഗര്‍ അപ്പാര്‍ട്ട്‌മെന്റിന്റെ വിലാസത്തിലും വ്യാജവോട്ട് ചേര്‍ത്തു. ഓരേ ഫഌറ്റ് നമ്പര്‍ ഉപയോഗിച്ചും ഫഌറ്റ് നമ്പര്‍ കൃത്യമായി രേഖപ്പെടുത്താതെയും നിരവധി പേരാണ് വോട്ടര്‍പട്ടികയില്‍ കയറിക്കൂടിയത്.

കൂടുതല്‍ പുതിയ വോട്ടര്‍മാര്‍ തൃശൂരില്‍

2024ലെ ലോക്‌സഭാ തെരഞ്ഞെടുപ്പില്‍ സംസ്ഥാനത്ത് ഏറ്റവും കൂടുതല്‍ പുതിയ വോട്ടര്‍മാര്‍ പട്ടികയില്‍ ഇടംപിടിച്ചത് തൃശൂരിലാണെന്ന് കണക്കുകള്‍. 1,46,673 വോട്ടര്‍മാരാണ് 2019 നേക്കാള്‍ അധികമായി തൃശൂരില്‍ ഉണ്ടായിരുന്നത്. കന്നിവോട്ടര്‍മാരായി കഴിഞ്ഞ ലോക്‌സഭാ തെരഞ്ഞെടുപ്പുകാലത്ത് ചേര്‍ക്കപ്പെട്ടത് 34,000 ത്തോളമാണ്. 2021 ലെ നിയമസഭാ തെരഞ്ഞെടുപ്പ് കാലത്തും ഏകദേശം ഇത്രത്തോളം കന്നിവോട്ടര്‍മാര്‍ പട്ടികയില്‍ ഉണ്ടായിരുന്നുവെന്നാണ് വിവരം. 2019നേക്കാള്‍ 2024ല്‍ സംസ്ഥാനത്ത് ആകെ കൂടിയത് 16,02,172 വോട്ടര്‍മാരാണ്. തൃശൂരിന് പുറമേ വടകര, കോഴിക്കോട്, മലപ്പുറം, പൊന്നാനി മണ്ഡലങ്ങളിലും ലക്ഷത്തില്‍ അധികം കന്നിവോട്ടര്‍മാരെത്തിയെങ്കിലും തൃശൂരിന്റെ അത്രയുമുണ്ടായിരുന്നില്ല.

പൊലിസ് അന്വേഷിക്കും

തൃശൂര്‍: ലോക്‌സഭാ തെരഞ്ഞെടുപ്പിനു തൊട്ടുമുന്‍പ് കേന്ദ്ര സഹമന്ത്രി സുരേഷ് ഗോപി തൃശൂരിലേക്ക് വോട്ട് മാറ്റി ചേര്‍ത്തതില്‍ അന്വേഷണം. വോട്ടു മാറ്റിയത് നിയമവിരുദ്ധവും ക്രിമിനല്‍ ഗൂഢാലോചനയുമാണെന്ന് ചൂണ്ടിക്കാണിച്ച് കെ.പി.സി.സി രാഷ്ട്രീയ കാര്യ സമിതി അംഗം ടി.എന്‍ പ്രതാപന്‍ തൃശൂര്‍ സിറ്റി പൊലിസ് കമ്മിഷണര്‍ ആര്‍.ഇളങ്കോയ്ക്കു പരാതി നല്‍കിയിരുന്നു. പരാതി എ.സി.പിയുടെ നേതൃത്വത്തിലുള്ള സംഘം അന്വേഷിക്കും. തുടര്‍നടപടികളില്‍ നിയമപദേശം തേടുമെന്നും പൊലിസ് കമ്മിഷണര്‍ വ്യക്തമാക്കി. വിഷയത്തില്‍ സുരേഷ് ഗോപി ഇനിയും പ്രതികരിച്ചിട്ടില്ല.

സുരേഷ് ഗോപി ഇന്ന് തൃശ്ശൂരില്‍

വിവാദങ്ങളില്‍ മൗനം തുടരുന്ന കന്ദ്രമന്ത്രി സുരേഷ് ഗോപി ഇന്ന് തൃശ്ശൂരിലെത്തും. രാവിലെ ട്രെയിന്‍ മാര്‍ഗ്ഗം തൃശൂരില്‍ എത്തുന്ന സുരേഷ് ഗോപി ഇന്നലത്തെ മാര്‍ച്ചില്‍ പരിക്കേറ്റ ബിജെപി പ്രവര്‍ത്തകരെ കാണും. സുരേഷ് ഗോപിയുടെ ഓഫീസിലേക്കുള്ള വഴിയിലെ ബോര്‍ഡില്‍ സിപിഎം മാര്‍ച്ചിനിടെ കരി ഓയില്‍ ഒഴിച്ച സംഭവത്തില്‍ സംസ്ഥാന വ്യാപകമായി പ്രതിഷേധം ശക്തമാക്കാന്‍ ഒരുങ്ങുകയാണ് ബിജെപി. ഇതുപ്രകാരം നടത്തുന്ന മാര്‍ച്ചില്‍ സുരേഷ് ഗോപി പങ്കെടുക്കും. വോട്ടുകൊള്ളയില്‍ പ്രതിഷേധിച്ച് തൃശൂര്‍ പെരിങ്ങാവിലെ സുരേഷ് ഗോപി എം.പിയുടെ ക്യാംപ് ഓഫിസിലേക്ക് ഇന്നലെ സി.പി.എം മാര്‍ച്ച് നടത്തിയിരുന്നു. സുരേഷ്‌ഗോപി തൃശൂര്‍ എടുത്തതല്ലെന്നും കട്ടതാണെന്നും, പ്രതിഷേധ മാര്‍ച്ച് ഉദ്ഘാടനം ചെയ്ത സി.പി.എം ജില്ലാ സെക്രട്ടറി കെ.വി അബ്ദുള്‍ ഖാദര്‍ ആരോപിച്ചു.

Voting irregularities in Thrissur: More evidence against BJP, police will investigate