ദുബൈ: എമിറേറ്റിലെ ഒരു റെസിഡൻഷ്യൽ അപ്പാർട്ട്‌മെന്റിൽ വെച്ച് നിയമവിരുദ്ധമായി കോസ്മെറ്റിക് ശസ്ത്രക്രിയകളും വൈദ്യചികിത്സയും നടത്തിയ മൂന്ന് സ്ത്രീകളെ ദുബൈ പൊലിസ് അറസ്റ്റ് ചെയ്തു. പിടിയിലായവരുടെ പ്രവൃത്തികൾ പൊതുജനങ്ങളുടെ ആരോഗ്യത്തിനും സുരക്ഷയ്ക്കും ഗുരുതരമായ ഭീഷണി ഉയർത്തുന്നതാണെന്ന് അധികൃതർ വ്യക്തമാക്കി.

ALSO READ: സ്വാതന്ത്ര്യ ദിനം; ഓഗസ്റ്റ് 15ന് ബുർജ് ഖലീഫ ഇന്ത്യൻ ത്രിവർണ പതാകയുടെ നിറങ്ങളിൽ തിളങ്ങും 

ദുബൈ ഹെൽത്ത് അതോറിറ്റിയുമായി (ഡിഎച്ച്എ) സഹകരിച്ച് ആന്റി-ഇക്കണോമിക് ക്രൈം വിഭാഗം നടത്തിയ അന്വേഷണത്തിനൊടുവിലാണ് പ്രതികളെ പിടികൂടിയത്. അപ്പാർട്ട്‌മെന്റിൽ സംശയകരമായ പ്രവർത്തനങ്ങൾ നടക്കുന്നതായി രഹസ്യവിവരം ലഭിച്ചതിനെ തുടർന്ന് പൊലിസ് നടത്തിയ റെയ്ഡിൽ ലൈസൻസ് ഇല്ലാത്ത മരുന്നുകളും മെഡിക്കൽ ഉപകരണങ്ങളും കണ്ടെടുത്തിരുന്നു.

പ്രതികളെ നിയമനടപടികൾക്കായി പബ്ലിക് പ്രോസിക്യൂഷന് കൈമാറിയതായി പൊലിസ് അറിയിച്ചു. ലൈസൻസ് ഇല്ലാത്ത സ്ഥാപനങ്ങളിൽ നിന്ന് ചികിത്സ തേടുന്നത് ഗുരുതര ആരോഗ്യ പ്രശ്നങ്ങൾക്ക് കാരണമാകുമെന്ന് ഉദ്യോഗസ്ഥർ മുന്നറിയിപ്പ് നൽകി. "ലൈസൻസുള്ള മെഡിക്കൽ കേന്ദ്രങ്ങളിൽ നിന്ന് മാത്രം ചികിത്സ തേടുക, സേവനദാതാക്കളുടെ യോഗ്യത പരിശോധിക്കുക, വിലകുറഞ്ഞ ഓഫറുകളിൽ വഞ്ചിതരാകാതിരിക്കുക," ദുബൈ പൊലിസ് പൊതുജനങ്ങളോട് അഭ്യർത്ഥിച്ചു.

ALSO READ: തട്ടിപ്പുകളൊന്നും ഇനി വിലപ്പോവില്ല; ഗതാഗതം നിരീക്ഷിക്കാൻ സ്മാർട്ട് ഡിജിറ്റൽ സംവിധാനവുമായി ദുബൈ ആർടിഎ 

നിയമവിരുദ്ധമായ എന്തെങ്കിലും മെഡിക്കൽ പ്രവർത്തനങ്ങൾ ശ്രദ്ധയിൽപ്പെട്ടാൽ 'പൊലിസ് ഐ' സേവനത്തിലൂടെയോ 901 എന്ന നമ്പറിൽ വിളിച്ചോ റിപ്പോർട്ട് ചെയ്യാൻ പൊലിസ് ആഹ്വാനം ചെയ്തു. സമൂഹത്തിന്റെ സുരക്ഷ ഉറപ്പാക്കാനും നിയമവിരുദ്ധ പ്രവർത്തനങ്ങൾക്കെതിരെ ശക്തമായ നടപടികൾ സ്വീകരിക്കാനുമുള്ള തങ്ങളുടെ പ്രതിബദ്ധത ദുബൈ പൊലിസ് അടിവരയിട്ടു.

Dubai Police have arrested three women for illegally performing and undergoing cosmetic surgeries inside an apartment. Authorities warn against unlicensed medical practices and urge the public to seek certified clinics.