മസ്‌കത്ത്: സമുദ്രത്തില്‍ നിന്നും നെയ്മീനെ പിടിക്കുന്നതിനും വ്യാപാരം ചെയ്യുന്നതിനും രണ്ട് മാസത്തെ വിലക്ക് ഏര്‍പ്പെടുത്തുമെന്ന് ഒമാന്‍ കാര്‍ഷിക, ജലവിഭവ മന്ത്രാലയം. 2025 ഓഗസ്റ്റ് 15 വെള്ളിയാഴ്ച മുതല്‍ 2025 ഒക്ടോബര്‍ 15 ബുധനാഴ്ച വരെ മന്ത്രിസഭാ തീരുമാന പ്രകാരം നിരോധനം പ്രാബല്യത്തില്‍ വരും. നെയ്മീന്‍ സമ്പത്ത് സംരക്ഷിക്കുന്നതിനും സുസ്ഥിര മത്സ്യബന്ധന രീതികള്‍ പ്രോത്സാഹിപ്പിക്കുന്നതിനും ലക്ഷ്യമിട്ടാണ് നടപടി.

എല്ലാ മത്സ്യത്തൊഴിലാളികളും അനുബന്ധ ബിസിനസ് ചെയ്യുന്നവരും ഇക്കാര്യങ്ങള്‍ പാലിക്കണമെന്ന് മന്ത്രാലയം അഭ്യര്‍ത്ഥിച്ചു:

• നിരോധന കാലയളവില്‍ നെയ്മീന്‍ പിടിക്കാനോ, കൊണ്ടുപോകാനോ, വാങ്ങാനോ, വില്‍ക്കാനോ, വ്യാപാരം ചെയ്യാനോ, കയറ്റുമതി ചെയ്യാനോ പാടില്ല.
• നിരോധനം ആരംഭിക്കുന്നതിന് മുമ്പ് നിലവിലുള്ള നെയ്മീന്‍ സ്റ്റോക്കുകള്‍ ബന്ധപ്പെട്ട അധികാരികളുടെ പക്കല്‍ രജിസ്റ്റര്‍ ചെയ്യുക. രജിസ്റ്റര്‍ ചെയ്യാത്ത സ്റ്റോക്കുകള്‍ വ്യാപാരത്തിനോ കയറ്റുമതി ചെയ്യാനോ അനുവദിക്കില്ല.

മത്സ്യത്തൊഴിലാളികള്‍, മത്സ്യക്കച്ചവടക്കാര്‍, നെയ്മീന്‍ പിടിക്കല്‍, കൊണ്ടുപോകല്‍, വാങ്ങല്‍, വില്‍പ്പന അല്ലെങ്കില്‍ കയറ്റുമതി എന്നിവയില്‍ ഏര്‍പ്പെട്ടിരിക്കുന്ന കമ്പനികള്‍ എന്നിവര്‍ക്കാണ് നിരോധനം ബാധകമാകുക. നിയമം ലംഘിച്ചാലുള്ള നിയമപരമായ ശിക്ഷകള്‍ ഒഴിവാക്കാന്‍ എല്ലാ പങ്കാളികളുടെയും സഹകരണം അത്യന്താപേക്ഷിതമാണെന്ന് മന്ത്രാലയം അടിവരയിട്ടു.

ALSO READ: ഒമാനില്‍ 100 റിയാല്‍ നോട്ടുകള്‍ പുറത്തിറക്കുമെന്ന പ്രചരണം; വിശദീകരണവുമായി സെന്‍ട്രല്‍ ബാങ്ക്  

മത്സ്യബന്ധന മേഖലയിലെ ഭാവി പ്രതീക്ഷകള്‍

2028 ആകുമ്പോഴേക്കും ഒമാന്റെ മത്സ്യ ഉല്‍പാദനം 2,970 മെട്രിക് ടണ്ണിലെത്തുമെന്നാണ് പ്രതീക്ഷിക്കുന്നത്. 2023ല്‍ ഇത് ഏകദേശം 2,270 മെട്രിക് ടണ്ണായിരുന്നു. 2003 മുതല്‍, രാജ്യത്തിന്റെ മത്സ്യ വിതരണം വര്‍ഷം തോറും 38.1% ശതമാനമാണ് വര്‍ധിച്ചിട്ടുള്ളത്. 2028 ആകുമ്പോഴേക്കും മത്സ്യ ഉപഭോഗം 52,000 മെട്രിക് ടണ്ണായി ഉയരുമെന്ന് പ്രതീക്ഷിക്കുന്നു. 2023 ല്‍ ഇത് ഏകദേശം 50,000 മെട്രിക് ടണ്ണായിരുന്നു. 2023ല്‍, മത്സ്യ ഉപഭോഗത്തില്‍ ആഗോളതലത്തില്‍ 61ാം സ്ഥാനത്തെത്തായിരുന്നു ഒമാന്‍.

oman has announced a two-month ban on catching and selling king fish to protect marine resources and ensure sustainable fishing practices. violators will face legal action.