ഡല്‍ഹി: രാജ്യതലസ്ഥാനത്ത് നിന്ന് എല്ലാ തെരുവ് നായ്ക്കളെയും ഷെല്‍ട്ടറുകളിലേക്ക് മാറ്റാനുള്ള സുപ്രിം കോടതിയുടെ ഉത്തരവിനെതിരേ മുന്‍ കേന്ദ്ര മന്ത്രിയും മൃഗാവകാശ പ്രവര്‍ത്തകയുമായ മനേക ഗാന്ധി. ഡല്‍ഹി, ഗുരുഗ്രാം, നോയിഡ, ഗാസിയാബാദ് എന്നിവിടങ്ങളിലെ പൊതുസ്ഥലങ്ങളില്‍ നിന്ന് എല്ലാ തെരുവ് നായ്ക്കളെയും ഉടന്‍ മാറ്റണമെന്ന് തിങ്കളാഴ്ചയാണ് സുപ്രിംകോടതി ഉത്തരവിട്ടിരുന്നത്.

എന്നാലിത് പ്രായോഗികമല്ലാത്ത നിര്‍ദേശമാണെന്നും മേഖലയുടെ പാരിസ്ഥിതിക സന്തുലിതാവസ്ഥയ്ക്ക് ഹാനികരമാണെന്നും മനേക ഗാന്ധി പ്രതികരിച്ചു. നായ്ക്കളെ മാറ്റിക്കഴിഞ്ഞാല്‍ കുരങ്ങുകളായിരിക്കും നിലത്തിറങ്ങുക. ഇത് തന്റെ സ്വന്തം വീട്ടില്‍ സംഭവിച്ചിട്ടുണ്ടെന്നും അവര്‍ പറഞ്ഞു. 1880കളില്‍ പാരീസില്‍ എന്താണ് സംഭവിച്ചതെന്നും മനേക ഗാന്ധി വിശദീകരിച്ചു. അവര്‍ നായ്ക്കളെയും പൂച്ചകളെയും ഒഴിവാക്കിയപ്പോള്‍, നഗരം എലികളാല്‍ നിറഞ്ഞെന്നാണ് മനേക ഗാന്ധി പറഞ്ഞത്.

1800കളില്‍ തെരുവ് നായ്ക്കള്‍ കാരണം പാരീസില്‍ പേവിഷബാധ വര്‍ധിക്കുന്നതായി കണ്ടെത്തിയിരുന്നു. പാരീസിലെ തെരുവുകളില്‍ നായകള്‍ അലഞ്ഞുതിരിഞ്ഞു നടന്നിരന്നു. തെരുവ് നായ്ക്കള്‍ ആരോഗ്യത്തിനും സുരക്ഷയ്ക്കും ഭീഷണിയാണെന്ന് ഭരണകൂടം അന്നു കണക്കാക്കി.

നായ്ക്കളെയും പൂച്ചകളെയും വലിയ തോതില്‍ കൊന്നൊടുക്കുകയും ചെയ്തു. പാരീസിനെ കൂടുതല്‍ സുരക്ഷിതമാക്കുക എന്നതായിരുന്നു ലക്ഷ്യം. എന്നാല്‍ തെരുവുകളില്‍ നായകളും പൂച്ചകളും ഇല്ലാതായതോടെ നഗരത്തില്‍ എലികളുടെ എണ്ണം പെട്ടെന്നു തന്നെ പെരുകിയെന്നും മനേക ഗാന്ധി.

നായപ്രേമികള്‍ക്കായി കുട്ടികളെ ബലിയര്‍പ്പിക്കാന്‍ കഴിയില്ലെന്ന് സുപ്രീംകോടതി

ഡല്‍ഹിയിലെയും എന്‍സിആര്‍ മേഖലയിലെയും എല്ലാ തെരുവ് നായ്ക്കളെയും ജനവാസ കേന്ദ്രങ്ങളില്‍ നിന്ന് മാറ്റി പാര്‍പ്പിക്കണമെന്നും ഈ നടപടി തടയുന്ന ഏതൊരു സംഘടനയും കര്‍ശനമായ നടപടി നേരിടേണ്ടിവരുമെന്നുമാണ് സുപ്രിം കോടതി വ്യക്തമാക്കിയത്.

നായകളുടെ കടിയേറ്റുള്ള മരണം കൂടി വരുന്ന സാഹചര്യത്തിലാണ് സുപ്രീം കോടതിയുടെ സുപ്രധാന ഉത്തരവ്. ജസ്റ്റിസ് ജെബി പര്‍ദിവാല, ജസ്റ്റിസ് ആര്‍ മഹാദേവന്‍ എന്നിവരടങ്ങിയ ബെഞ്ചാണ് കേസ് പരിഗണിച്ചിരുന്നത്. കേന്ദ്രത്തില്‍ നിന്നുള്ള വാദങ്ങള്‍ മാത്രമേ കേള്‍ക്കൂ എന്നും നായ പ്രേമികളുടെയോ മറ്റേതെങ്കിലും കക്ഷിയുടെയോ ഹരജികള്‍ ഈ വിഷയത്തില്‍ പരിഗണിക്കില്ലെന്നും കോടതി വ്യക്തമാക്കി.

പൊതുതാല്‍പ്പര്യത്തിന് വേണ്ടിയാണ് ചെയ്യുന്നത്. അതിനാല്‍, ഒരു തരത്തിലുള്ള വികാരങ്ങളും ഇതില്‍ ഉള്‍പ്പെടുത്തരുത്. എത്രയും വേഗം നടപടിയെടുക്കണമെന്നും ജസ്റ്റിസ് പര്‍ദിവാല ആവശ്യപ്പെട്ടു. രാജ്യ തലസ്ഥാനത്തെ എല്ലാ പ്രദേശങ്ങളില്‍ നിന്നും നായ്ക്കളെ പിടികൂടി ഷെല്‍ട്ടറുകളിലേക്ക് മാറ്റണമെന്നാണ് കോടതി ഉത്തരവിട്ടിരിക്കുന്നത്.

The Supreme Court of India has ordered the removal of all stray dogs from public places in Delhi, Gurugram, Noida, and Ghaziabad, citing rising incidents of dog attacks and deaths. The court warned that strict action would be taken against any organizations obstructing this move and stated it would consider only the central government’s arguments on the matter. Maneka Gandhi, animal rights activist and former Union Minister, strongly opposed the order, calling it impractical and harmful to ecological balance. She cited historical examples, including 1880s Paris, where the mass removal of dogs and cats led to a rat infestation.

The court emphasized that public safety, especially of children, must take priority over concerns from dog lovers.