തൃശൂര്‍: തൃശൂര്‍ ലോക്സഭാ മണ്ഡലത്തിലെ വോട്ട് കൊള്ളയില്‍ ബി.ജെ.പിക്കെതിരേ വീണ്ടും തെളിവുകള്‍.  ബിജെപി തൃശൂര്‍ ജില്ലാ വൈസ് പ്രസിഡന്റും പൂങ്കുന്നം കൗണ്‍സിലറുമായ ഡോ. വി ആതിരയുടെ മേല്‍വിലാസത്തില്‍ ജില്ലക്ക് പുറത്തുള്ള അഞ്ച് പേര്‍ക്ക് വോട്ട് ചേര്‍ത്തതിന്റെ തെളിവുകളാണ് ഇപ്പോള്‍ പുറത്തു വന്നിരിക്കുന്നത്.  മലപ്പുറം സ്വദേശിയായ ബി.ജെ.പി സംസ്ഥാന വൈസ് പ്രസിഡന്റ് ഉണ്ണികൃഷ്ണന്‍ മാസ്റ്റര്‍ ഉള്‍പ്പെടെ ഉള്ളവരുടെ ഐ.ഡി കാര്‍ഡില്‍ ആതിരയുടെ മേല്‍വിലാസമായ പള്ളിപറ്റ ഹൗസ് എന്നാണ് രേഖപ്പെടുത്തിയിരിക്കുന്നതെന്ന് റിപ്പോര്‍ട്ടുകള്‍ പറയുന്നു.

എന്നാല്‍ ആതിരയാണ് തൃശൂരില്‍ വീട് തരപ്പെടുത്തി തന്നതെന്നും അവരുടെ ബന്ധുക്കളുടെ വീട്ടില്‍ താമസിച്ചതിനാലാണ് ആ വിലാസം വന്നതെന്നുമാണ് ഉണ്ണികൃഷ്ണന്റെ വിശദീകരണം. തൃശൂര്‍ ലോകസഭാ മണ്ഡലത്തിന്റെ ചുമതലയുള്ളതിനാല്‍ കഴിഞ്ഞ ഒന്നര വര്‍ഷമായി താന്‍ ഇവിടെയാണ് താമസിക്കുന്നതെന്നും ഉണ്ണികൃഷ്ണന്‍ വിശദീകരിക്കുന്നു.  ആതിരയുടെ ഭര്‍ത്താവിന്റെ സഹോദരനും കാസര്‍കോട് സ്വദേശിയുമായ ആഷിഷിനും തൃശൂരില്‍ മറ്റൊരു വിലാസത്തില്‍ വോട്ട് ചേര്‍ത്തിട്ടുണ്ട്. 

ALSO READ: റഷ്യ..ചൈന...ട്രംപിന്റെ 'സമാധാന' നീക്കങ്ങളില്‍ തട്ടി സ്വര്‍ണം ഇന്നും താഴേക്ക്, നേരിയ കുറവ്;  ഒരാഴ്ചക്കിടെ കുറഞ്ഞത് 1500ഓളം

ആലത്തൂര്‍ മണ്ഡലത്തിന്റെ ഭാഗമായ വേലൂര്‍ പഞ്ചായത്തില്‍ ബി.ജെ.പി സ്ഥാനാര്‍ഥിയായി മത്സരിച്ച ഹരിദാസനും സുരേഷ് ഗോപിയുടെ ഡ്രൈവറായിരുന്ന അജയകുമാറും പൂങ്കുന്നം കാപ്പിറ്റല്‍ വില്ലേജ് ഫ്ളാറ്റില്‍ വോട്ടര്‍മാരാണ്. മലപ്പുറം സ്വദേശിയായ ബി.ജെ.പി സംസ്ഥാന ഉപാധ്യക്ഷന്‍ വി. ഉണ്ണികൃഷ്ണന്‍ തൃശൂരില്‍ വോട്ട് ചെയ്തു എന്ന ആരോപണവുമായി കോണ്‍ഗ്രസ് നേതാവ് സന്ദീപ് വാര്യര്‍ രംഗത്തെത്തി. പൂങ്കുന്നം, ശങ്കരംകുളങ്ങര ഫ്ളാറ്റുകളില്‍ 117 വ്യാജവോട്ടുകള്‍ ചേര്‍ത്തുവെന്നും പരാതിയുണ്ട്. ഒരിടത്തുമാത്രം വ്യാജവിലാസം നല്‍കി 79 പേരുകള്‍ ചേര്‍ത്തു. പൂങ്കുന്നത്തെ ഇന്‍ലാന്റ് ഉദയ നഗര്‍ അപ്പാര്‍ട്ട്‌മെന്റില്‍ നടത്തിയ പരിശോധനയിലാണ് വ്യാജ വോട്ട് ചേര്‍ത്തത് കണ്ടത്തിയത്. ഓരേ ഫ്‌ളാറ്റ് നമ്പര്‍ ഉപയോഗിച്ചും ഫ്‌ളാറ്റ് നമ്പര്‍ കൃത്യമായി രേഖപ്പെടുത്താതെയും നിരവധി പേരാണ് വോട്ടര്‍പട്ടികയില്‍ കയറിക്കൂടിയത്. കോട്ടയം സ്വദേശിയും സുരേഷ് ഗോപിയുടെ അനുയായിയുമായ ബിജു പുളിക്കകണ്ടത്തിലിനും ഭാര്യക്കും തൃശൂരില്‍ വോട്ടുള്ളതായി കഴിഞ്ഞ ദിവസം കണ്ടെത്തിയിരുന്നു. 

അതേസമയം, ലോക്സഭാ തെരഞ്ഞെടുപ്പിനു തൊട്ടുമുന്‍പ് കേന്ദ്ര സഹമന്ത്രി സുരേഷ് ഗോപി തൃശൂരിലേക്ക് വോട്ട് മാറ്റി ചേര്‍ത്തതില്‍ അന്വേഷണം പ്രഖ്യാപിച്ചിട്ടുണ്ട്. വോട്ടു മാറ്റിയത് നിയമവിരുദ്ധവും ക്രിമിനല്‍ ഗൂഢാലോചനയുമാണെന്ന് ചൂണ്ടിക്കാണിച്ച് കെ.പി.സി.സി രാഷ്ട്രീയ കാര്യ സമിതി അംഗം ടി.എന്‍ പ്രതാപന്‍ തൃശൂര്‍ സിറ്റി പൊലിസ് കമ്മിഷണര്‍ ആര്‍.ഇളങ്കോയ്ക്കു പരാതി നല്‍കിയിരുന്നു. പരാതി എ.സി.പിയുടെ നേതൃത്വത്തിലുള്ള സംഘം അന്വേഷിക്കും. തുടര്‍നടപടികളില്‍ നിയമപദേശം തേടുമെന്നും പൊലിസ് കമ്മിഷണര്‍ വ്യക്തമാക്കി. വിഷയത്തില്‍ സുരേഷ് ഗോപി ഇനിയും പ്രതികരിച്ചിട്ടില്ല.

ALSO READ: തൃശൂര്‍ വോട്ട് കൊള്ള: വ്യാജ വോട്ടറായി വോട്ടര്‍ പട്ടികയില്‍ ചേര്‍ത്തവരില്‍ സുരേഷ് ഗോപിയുടെ ഡ്രൈവറും

Fresh allegations surface against BJP in Thrissur Lok Sabha constituency as five non-local individuals were reportedly registered to vote using the address of BJP district vice president Dr. V. Athira. Among them is BJP state vice president Unnikrishnan Master, raising serious questions about voter list manipulation.