ദുബൈ: ദുബൈയിലെ പ്രവാസി ഇന്ത്യക്കാരുടെ വിവിധ വിഷയങ്ങള്‍ സംബന്ധിച്ച് ഇന്ത്യന്‍ കോണ്‍സുല്‍ ജനറല്‍ സതീഷ് കുമാര്‍ ശിവനുമായി കൂടിക്കാഴ്ച നടത്തി ദുബൈ കെ.എം.സി.സി. വിവിധ പ്രശ്‌നങ്ങള്‍ക്ക് പരിഹാരം തേടി നിവേദനവും നല്‍കി. മൃതദേഹം നാട്ടിലെത്തിക്കുന്നതുമായി ബന്ധപ്പെട്ട് നടക്കുന്ന ചൂഷണം അവസാനിപ്പിക്കുന്നതിന് കര്‍ശന നടപടികള്‍ സ്വീകരിച്ചിട്ടുണ്ടെന്നും ദുബൈ കെ.എം.സി.സി ഉള്‍പ്പെടെയുള്ള അംഗീകൃത സംഘടനകളെയും അസോസിയേഷനെയും മാത്രം ആശ്രയിക്കണമെന്ന് പ്രവാസി ഇന്ത്യക്കാര്‍ക്ക് ബോധവത്കരണം നല്‍കുമെന്നും കോണ്‍സുല്‍ ജനറല്‍ പറഞ്ഞു. ദേര ബനിയാസില്‍ പ്രവര്‍ത്തിക്കുന്ന ദുബൈ കെ.എം.സി.സി ഓഫിസിലെ പാസ്‌പോര്‍ട്ട് സേവാ കേന്ദ്രം വഴി സ്വീകരിക്കുന്ന പാസ്‌പോര്‍ട്ട് സംബന്ധമായ അപേക്ഷകളുടെ എണ്ണം വര്‍ധിപ്പിക്കാനും കൂടുതല്‍ കൗണ്ടറുകള്‍ അവിടെ അനുവദിക്കാനും നിവേദനത്തിലൂടെ ആവശ്യപ്പെട്ടു.

ഓഗസ്റ്റ് 15ന് രാവിലെ 7.30ന് ദുബൈ കെ.എം.സി.സി ആസ്ഥാനത്ത് നടക്കുന്ന ദേശീയ പതാക ഉയര്‍ത്തല്‍, ദേശീയ ഗാനാലാപനം, സ്വാതന്ത്ര്യ ദിന സംഗമം എന്നിങ്ങനെ നടക്കുന്ന സ്വാതന്ത്ര്യ ദിനാഘോഷ പരിപാടികളെ കുറിച്ച് അറിയിക്കുകയും ചടങ്ങിലേക്ക് കോണ്‍സുലേറ്റ് പ്രതിനിധികളെ ക്ഷണിക്കുകയും ചെയ്തു. കെ.എം.സി.സി സംസ്ഥാന വൈസ് പ്രസിഡന്റ് മുഹമ്മദ് പട്ടാമ്പി, സെക്രട്ടറിമാരായ അഡ്വ. ഇബ്രാഹിം ഖലീല്‍, വി.കെ അഹമ്മദ് ബിച്ചി എന്നിവരാണ് കോണ്‍സുല്‍ ജനറലുമായി കൂടിക്കാഴ്ച നടത്തിയത്. വിവിധ പ്രവാസി പ്രശ്‌നങ്ങള്‍ ഏറ്റെടുത്ത് പരിഹരിക്കുന്നതിന് ഇന്ത്യന്‍ കോണ്‍സുലേറ്റുമായി സഹകരിക്കുന്ന ദുബൈ കെ.എം.സി.സിയെ കോണ്‍സുല്‍ ജനറല്‍ അഭിനന്ദിച്ചു.

Dubai KMCC discusses expatriate issues with Consul General