തിരുവനന്തപുരം: ബാങ്ക് ജോലിക്കായി വ്യാജ പൊലീസ് ക്ലിയറൻസ് സർട്ടിഫിക്കറ്റ് (പിസിസി) നിർമിച്ച് നൽകിയ യുവതിയെ മാറനല്ലൂർ പൊലീസ് അറസ്റ്റ് ചെയ്തു. ഊരൂട്ടമ്പലം അക്ഷയ സെന്ററിൽ ജോലി ചെയ്തിരുന്ന റസൽപുരം തേമ്പാമുട്ടം എള്ളുവിള വീട്ടിൽ എസ്. ചിഞ്ചു ദാസ് (34) ആണ് പിടിയിലായത്. 2023 മാർച്ച് 25-നാണ് കേസിനാസ്പദമായ സംഭവം നടന്നത്.

ഒരു സ്വകാര്യ ബാങ്കിൽ ജോലിക്കായി അപേക്ഷിച്ച യുവാവിന്, നിശ്ചിത തുക ഈടാക്കിയ ശേഷം ചിഞ്ചു വ്യാജ പിസിസി നൽകി. എന്നാൽ, ഈ സർട്ടിഫിക്കറ്റ് ബാങ്കിൽ സമർപ്പിച്ചപ്പോൾ, അതിന്റെ ആധികാരികതയിൽ സംശയം തോന്നിയ ബാങ്ക് അധികൃതർ പൊലീസിനെ വിവരമറിയിച്ചു. തുടർന്ന് നടത്തിയ പരിശോധനയിൽ സർട്ടിഫിക്കറ്റ് വ്യാജമാണെന്ന് തെളിഞ്ഞു.

യുവാവിന്റെ പരാതിയെ തുടർന്ന് പൊലീസ് കേസ് രജിസ്റ്റർ ചെയ്തു. അന്വേഷണത്തിൽ, ചിഞ്ചു കമ്പ്യൂട്ടറിൽ മുൻകൂട്ടി സേവ് ചെയ്ത സർട്ടിഫിക്കറ്റുകൾ ഫോട്ടോഷോപ്പ് ഉപയോഗിച്ച് എഡിറ്റ് ചെയ്ത്, ആവശ്യക്കാർക്ക് പണം വാങ്ങി നൽകിയിരുന്നതായി കണ്ടെത്തി. ഇതിനായി ഈടാക്കിയ തുക ചിഞ്ചുവിന്റെ ബാങ്ക് അക്കൗണ്ടിലേക്കാണ് ലഭിച്ചിരുന്നത്.

സംഭവത്തിന് ശേഷം ഒളിവിൽ പോയ ചിഞ്ചു, ഹൈക്കോടതിയിൽ മുൻകൂർ ജാമ്യത്തിനായി ശ്രമിച്ചെങ്കിലും അത് നിഷേധിക്കപ്പെട്ടു. ഇതുവരെ ഇവർക്കെതിരെ മറ്റ് പരാതികൾ ലഭിച്ചിട്ടില്ലെങ്കിലും, സമാനമായ മറ്റ് തട്ടിപ്പുകൾ നടത്തിയിട്ടുണ്ടോ എന്ന് പൊലീസ് അന്വേഷിച്ചുവരികയാണ്.

S. Chinju Das (34), an employee at the Ooruttambalam Akshaya Center, was arrested by Maranalloor Police for creating a fake police clearance certificate (PCC) for a bank job applicant. In March 2023, Chinju provided a forged PCC to a youth for a fee. Bank authorities, suspecting its authenticity, alerted the police, who confirmed the fraud. Investigations revealed Chinju used Photoshop to edit pre-saved certificates for clients. After going into hiding, her anticipatory bail plea was rejected by the High Court. Police are probing for similar frauds.