തിരുവനന്തപുരം: ഹരിതകർമസേനയുടെ ഇ-മാലിന്യ ശേഖരണ പദ്ധതിക്ക് നഗരസഭകളിൽ മികച്ച പ്രതികരണം. ഒരു മാസം മുമ്പ് ആരംഭിച്ച പദ്ധതിയിലൂടെ 33,945 കിലോ ഇ-മാലിന്യം ശേഖരിച്ചു. ആലപ്പുഴയാണ് ഏറ്റവും കൂടുതൽ ശേഖരണം നടത്തിയത് 12,261 കിലോ. നഗരസഭകളിൽ വിജയകരമായി നടപ്പാക്കുന്ന ഈ പദ്ധതി അടുത്ത മാസം മുതൽ സംസ്ഥാനത്തെ എല്ലാ പഞ്ചായത്തുകളിലേക്കും വ്യാപിപ്പിക്കും.

44 ഇനം ഇലക്ട്രോണിക്, ഇലക്ട്രിക്കൽ ഉപകരണങ്ങൾ അപകടകരമല്ലാത്തവയായി തരംതിരിച്ച്, കിലോ നിരക്കിൽ വില നൽകി ശേഖരിക്കുന്നു. ഇ-മാലിന്യം കൈമാറുന്ന വീടുകൾക്ക് ഇതുവരെ 2,63,818.66 രൂപ വരുമാനമായി ലഭിച്ചു. ശേഖരിക്കുന്ന ഉപകരണങ്ങൾ തരംതിരിച്ച്, ഉപയോഗപ്രദമായവ പുനരുപയോഗത്തിനായി മാറ്റിവയ്ക്കും. പുനഃചംക്രമണം സാധ്യമായവ അംഗീകൃത കമ്പനികൾക്ക് കൈമാറും. ഉപയോഗശൂന്യമായവ മാനദണ്ഡങ്ങൾ പാലിച്ച് ശാസ്ത്രീയമായി നിർമാർജനം ചെയ്യും.

സ്വകാര്യ സംഘടനകൾ ഈ മേഖലയിൽ പ്രവർത്തിക്കുന്നുണ്ടെങ്കിലും, ഹരിതകർമസേനയുടെ ഇ-മാലിന്യ ശേഖരണത്തിന്റെ പ്രത്യേകത ശാസ്ത്രീയ സംസ്കരണവും നിർമാർജനവും ഉറപ്പാക്കുന്നതാണ്.

ഇവ കൈമാറാം

ടിവി, റഫ്രിജറേറ്റര്‍, വാഷിംഗ് മെഷീന്‍, മൈക്രോവേവ് ഓവന്‍, മിക്‌സര്‍ ഗ്രൈന്‍ഡര്‍, ഫാന്‍, ലാപ്‌ടോപ്, കമ്പ്യൂട്ടര്‍, മോണിറ്റര്‍, മൗസ്, കീബോര്‍ഡ്, എല്‍.സി.ഡി മോണിറ്റര്‍, എല്‍.സി.ഡി/എല്‍.ഇ.ഡി ടെലിവിഷന്‍, പ്രിന്റര്‍, ഫോട്ടോസ്റ്റാറ്റ് മെഷീന്‍, അയണ്‍ ബോക്‌സ്, മോട്ടോര്‍, മൊബൈല്‍ ഫോണ്‍, ടെലിഫോണ്‍, റേഡിയോ, മോഡം, എയര്‍ കണ്ടീഷണര്‍, ബാറ്ററി, ഇന്‍വര്‍ട്ടര്‍, യു.പി.എസ്, സ്റ്റെബിലൈസര്‍, വാട്ടര്‍ ഹീറ്റര്‍, വാട്ടര്‍ കൂളര്‍, ഇന്‍ഡക്ഷന്‍ കുക്കര്‍, എസ്.എം.പി.എസ്, ഹാര്‍ഡ് ഡിസ്‌ക്, സി.ഡി ഡ്രൈവ്, പി.സി.ബി ബോര്‍ഡുകള്‍, സ്പീക്കര്‍, ഹെഡ്‌ഫോണുകള്‍, സ്വിച്ച് ബോര്‍ഡുകള്‍, എമര്‍ജന്‍സി ലാമ്പ് തുടങ്ങിയവ കൈമാറാം.

Haritha Karma Sena offers a hassle-free solution for disposing of old TVs, washing machines, and other e-waste. Instead of selling to scrap shops, residents can hand over their e-waste to the Sena, which collects, sorts, and recycles it scientifically, ensuring eco-friendly disposal and even providing income for households