റിയാദ്: സഊദി അറേബ്യയുടെ വിവിധ ഭാഗങ്ങളിൽ വരുന്ന ബുധനാഴ്ച വരെ കനത്ത മഴയ്ക്കും വെള്ളപ്പൊക്കത്തിനും സാധ്യതയെന്ന് സിവിൽ ഡിഫൻസ് മുന്നറിയിപ്പ് നൽകി. മക്ക, തായിഫ്, മൈസാൻ, അധം, അൽ-അർദിയാത്ത്, അൽ-ലൈത്ത്, അൽ-ഖുൻഫുദ, അൽ-ജുമും, അൽ-കാമിൽ, ബഹ്റ, അൽ-മുവൈഹ്, തുർബ, അൽ-ഖുർമ, റനിയ എന്നിവിടങ്ങളിൽ കനത്ത മഴ, ആലിപ്പഴ വർഷം, പൊടിക്കാറ്റ് എന്നിവ പ്രതീക്ഷിക്കുന്നതായി അധികൃതർ അറിയിച്ചു. 

ALSO READ: സഊദിയിൽ ഹജ്ജ് പെർമിറ്റ് അഴിമതി കേസിൽ 30 സർക്കാർ ജീവനക്കാർ അറസ്റ്റിൽ 

ജസാൻ, അസീർ, അൽ-ബാഹ, നജ്റാൻ മേഖലകളിലും കനത്ത മഴ ഉണ്ടാകുമെന്നാണ് സൂചന. റിയാദ്, മദീന മേഖലകളിൽ താരതമ്യേന മിതമായ തോതിലുള്ള മഴ പെയ്യുമെന്നാണ് പ്രതീക്ഷിക്കുന്നത്. താഴ്വരകൾ, വെള്ളപ്പൊക്ക സാധ്യതയുള്ള പ്രദേശങ്ങൾ, വെള്ളക്കെട്ടുകൾ എന്നിവിടങ്ങളിൽ നിന്ന് വിട്ടുനിൽക്കാനും ഇത്തരം സ്ഥലങ്ങളിൽ നീന്തുന്നത് ഒഴിവാക്കാനും സിവിൽ ഡിഫൻസ് ജനങ്ങളോട് ആവശ്യപ്പെട്ടു. 

ALSO READ: നഗര, ഗ്രാമീണ മേഖലകളിലെ ഫാക്ടറികൾക്കായുള്ള നിയമത്തിൽ മാറ്റംവരുത്തി സഊദി അറേബ്യ 

ഔദ്യോഗിക വാർത്തകൾ മാധ്യമങ്ങളിലൂടെയും സോഷ്യൽ മീഡിയ വഴിയും പിന്തുടരാൻ അധികൃതർ നിർദേശിച്ചു. കനത്ത മഴ മൂലം ഗതാഗത തടസ്സങ്ങൾ, റോഡുകളിൽ വെള്ളക്കെട്ട്, ചെറിയ തോതിലുള്ള മണ്ണിടിച്ചിൽ എന്നിവയ്ക്കും സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകുന്നു. അടിയന്തര സാഹചര്യങ്ങളിൽ സുരക്ഷിത സ്ഥാനങ്ങളിൽ തുടരാനും അനാവശ്യ യാത്രകൾ ഒഴിവാക്കാനും അധികൃതർ ജനങ്ങളോട് അഭ്യർഥിച്ചിട്ടുണ്ട്.

Saudi Arabia is expected to witness heavy rain and flooding until Wednesday, with authorities urging residents to stay cautious and follow safety guidelines.