ന്യൂഡല്‍ഹി: ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ വോട്ടര്‍ അധികാര്‍ യാത്രയ്ക്ക് നാളെ തുടക്കം. വോട്ടര്‍ പട്ടിക തീവ്ര പരിഷ്‌കരണം, വോട്ടര്‍ പട്ടികയിലെ ക്രമക്കേട് എന്നിവയടക്കമുയര്‍ത്തിയാണ് രാഹുലിന്റെ യാത്ര. വോട്ടുമോഷണത്തിനെതിരായ നേരിട്ടുള്ള പോരാട്ടത്തിന് ബിഹാറിന്റെ മണ്ണില്‍നിന്ന് തന്നെ തുടക്കം കുറിക്കുകയാണ് രാഹുല്‍.

നാളെ വോട്ടര്‍ അധികാര്‍ യാത്ര എന്ന പേരില്‍ ആരംഭിക്കുന്ന യാത്രയില്‍ ആര്‍ജെഡി നേതാവ് തേജസ്വി യാദവും രാഹുലിന് ഒപ്പം ഉണ്ടാകും. ഇന്ത്യാ സഖ്യത്തിലെ മറ്റു നേതാക്കളും പങ്കെടുക്കുന്നതാണ്. ബിഹാറിലെ സാസാരാമില്‍ നിന്ന് ആരംഭിക്കുന്ന യാത്ര വിവിധ ജില്ലകളിലൂടെയാണ് കടന്നു പോവുക. 30ന് അറയില്‍ ആണ് യാത്ര സമാപിക്കുക.

 സെപ്റ്റംബര്‍ ഒന്നാം തീയതി പട്‌നയില്‍ മെഗാ വോട്ടര്‍ അധികാര്‍ റാലിയും സംഘടിപ്പിക്കുന്നതാണ്. യുവാക്കളും തൊഴിലാളികളും കര്‍ഷകരും അടക്കം രാജ്യത്തെ എല്ലാ പൗരന്മാരോടും യാത്രയുടെ ഭാഗമാകാന്‍ രാഹുല്‍ ഗാന്ധി അഭ്യര്‍ഥിച്ചിട്ടുണ്ട്. നിയമസഭാ തെരഞ്ഞെടുപ്പിന് മാസങ്ങള്‍ മാത്രം അവശേഷിക്കേയാണ് രാഹുലിന്റെ യാത്ര.

ഇത് ഇന്ത്യ സഖ്യത്തിന് ശക്തി പകരും എന്നാണ് പ്രതീക്ഷിക്കുന്നത്. ഇതിനോടകം നിരവധി തവണ പ്രചാരണത്തിനായി ബിഹാറില്‍ എത്തിയ പ്രധാനമന്ത്രിയുടെ നീക്കത്തെയും പ്രതിരോധിക്കാമെന്നും കോണ്‍ഗ്രസ് കണക്കുകൂട്ടുന്നു.

Opposition leader Rahul Gandhi is set to begin his 'Voter Adhikar Yatra' (Voter Rights March) tomorrow, starting from Sasaram, Bihar. The campaign aims to highlight issues such as voter list manipulation, irregularities, and alleged voter fraud.