തിരുവനന്തപുരം: സ്വാതന്ത്ര്യദിനത്തിൽ അങ്കണവാടികളിൽ കുട്ടികൾക്ക് രാഖി കെട്ടി. വർക്കല താലൂക്ക് ചൈൽഡ് ഡെവല്പ്മെൻറ് പ്രോജക്ട് ഓഫീസറുടെ നിർദേശ പ്രകാരമാണ് വിവിധ അങ്കണവാടികളിൽ രാഖി കെട്ടിയത്. വർക്കല ബ്ലോക്കിന് കീഴിലെ അങ്കണവാടികളിൽ ബിജെപിയുടെ നഗരസഭാ കൗൺസിലർ ഉൾപ്പെടെയുള്ളവരാണ് കുട്ടികൾക്ക് രാഖി കെട്ടിയത്. സംഭവത്തിൽ വർക്കല താലൂക്ക് സിഡിപിസി ഓഫീസിൽ ഡിവൈഎഫ്ഐ പ്രതിഷേധിച്ചു. 

സ്വാതന്ത്ര്യദിനത്തിൽ കുട്ടികൾക്ക് രാഖികെട്ടണമെന്ന് സിഡിപിഒ ജ്യോതിഷ് ആണ് നിർദേശം നൽകിയത്. അങ്കണവാടി ടീച്ചർമാരുടെ വാട്സ്ആപ്പ് ഗ്രൂപ്പിലാണ് അഡീഷണൽ സിഡിപിഓ രാഖി നിർമിക്കാൻ നിർദേശം നൽകിയത്. വാട്സ്ആപ്പ് ഗ്രൂപ്പിൽ ശബ് സന്ദേശമായാണ് നിർദേശം നൽകിയത്. കുട്ടികൾ രാഖി കെട്ടുന്ന ഫോട്ടോ ഗ്രൂപ്പിൽ ഇടണമെന്നടക്കമാണ് അങ്കണവാടി വാട്സ്ആപ്പ് ഗ്രൂപ്പിലേയ്ക്ക് സിഡിപിഒ അയച്ച സന്ദേശത്തിൽ പറയുന്നത്. ഫോട്ടോയെടുത്തശേഷം കേന്ദ്ര സർക്കാരിൻറെ വെബ്സൈറ്റിൽ അപ്‍ലോഡ് ചെയ്യണമെന്നും നിർദേശത്തിൽ പറയുന്നു. ഇതിനു പുറമെ രാഖിയുടെ മാതൃകയും അയച്ചു കൊടുത്തു. 

സിഡിപിഒയുടെ നിർദ്ദേശ പ്രകാരം മിക്ക അങ്കണവാടികളിലും കുട്ടികൾക്ക് രാഖി കെട്ടി. ബിജെപിയുടെ നഗരസഭാ കൗൺസിലറാണ് കണ്ണമ്പ, ചാലുവിള അങ്കണവാടികളിൽ രാഖി കെട്ടിയത്. എന്നാൽ ഹർ ഘർ തിരംഗ പരിപാടിയുമായി ബന്ധപ്പെട്ട് സംസ്ഥാന സർക്കാർ സർക്കുലറിൽ രാഖി കെട്ടണമെന്ന നിർദ്ദേശമുണ്ടായിരുന്നില്ല. ഇത് ചൂണ്ടിക്കാട്ടിയാണ് ഡിവൈഎഫ്ഐ പ്രതിഷേധം നടത്തിയത്. സമരക്കാർ ഓഫീസിൻറെ ബോർഡിൽ ആർഎസ്എസ് എന്നെഴുതി പതിച്ചു. 

എന്നാൽ, കേന്ദ്ര സർക്കാർ ഉത്തരവിൽ പറയുന്നത് കുട്ടികൾ നിർമിച്ച രാഖി സൈനികർക്ക് നൽകാനായി പോസ്റ്റൽ മാർഗം അയക്കാൻ നിദേശം ഉണ്ടായിരുന്നു. ഇതിൻറെ മറവിലാണ് കുട്ടികളെ കൊണ്ട് രാഖി പരസ്പരം കെട്ടിച്ചതും ബിജെപി നഗരസഭാ കൗൺസിലർ എത്തി രാഖി കെട്ടി നൽകിയതും. അതേസമയം, സംസ്ഥാനത്ത് ഇത്തരത്തിലൊരു സംഭവം നടന്നിട്ടും സിഡിപിഒ ജ്യോതിഷിനെതിരെ സംസ്ഥാന സർക്കാർ നടപടിയെടുത്തിട്ടില്ല.