കോട്ടയം: പാമ്പാടിയിൽ ഉണ്ടായ വാഹനാപകടത്തിൽ മൂന്നു വയസുകാരൻ മരണമടഞ്ഞു. നിയന്ത്രണം വിട്ട കാർ സ്കൂൾ മതിലിലേക്കിടിച്ചുകയറിയതാണ് ദുരന്തത്തിന് കാരണമായത്. മരിച്ച കുഞ്ഞ് മല്ലപ്പള്ളി സ്വദേശികളായ ടിനു – മെറിൻ ദമ്പതികളുടെ മകൻ കീത്ത് തോമസാണ്. കുടുംബം ഡൽഹിയിൽ സ്ഥിരതാമസക്കാരാണ്. മെറിന്റെ സഹോദരിയുടെ കുഞ്ഞിന്റെ മാമോദീസാ ചടങ്ങിൽ പങ്കെടുത്ത് മടങ്ങവെയാണ് അപകടമുണ്ടായത്.

കാറിൽ രണ്ട് കുട്ടികളടക്കം ഏഴ് പേർ ഉണ്ടായിരുന്നുവെന്ന് പൊലീസ് അറിയിച്ചു. എങ്ങനെയാണ് വാഹനം നിയന്ത്രണം വിട്ടതെന്ന് വ്യക്തമല്ല. അപകടസമയത്ത് കുഞ്ഞ് സീറ്റിനടിയിലേക്ക് വീണുപോയതായാണ് പ്രാഥമിക വിവരം.

കാറിലുണ്ടായിരുന്ന ടിനു, മെറിൻ, മാത്യു, ശോശാമ്മ, ലൈസമ്മ, കിയാൻ എന്നിവർക്കും പരിക്കേറ്റിട്ടുണ്ട്. ഇവരെ ഉടൻ പാമ്പാടി താലൂക്ക് ആശുപത്രിയിൽ പ്രവേശിപ്പിച്ചു. കുട്ടിയുടെ മൃതദേഹം തെള്ളകത്തെ ഒരു സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്.

കാർ നിയന്ത്രണം വിട്ട് കുറ്റിക്കൽ സെന്റ് തോമസ് എൽ.പി. സ്കൂളിന്റെ മതിലിലേക്കിടിച്ചുകയറുകയായിരുന്നു. സംഭവസ്ഥലത്ത് വലിയ തിരക്കും ആശങ്കയും നിലനിന്നു. പൊലീസ് അന്വേഷണം ആരംഭിച്ചു.