കൊച്ചി: ലൈംഗികാരോപണ കേസില്‍ റാപ്പര്‍ വേടന്‍ സമര്‍പ്പിച്ച മുന്‍കൂര്‍ ജാമ്യാപേക്ഷ പരിഗണിക്കുന്നത് ഹൈക്കോടതി നാളത്തേക്ക് മാറ്റി. വേടന്‍ സ്ഥിരം കുറ്റവാളിയാണെന്നും, സര്‍ക്കാരില്‍ സ്വാധീനമുള്ളയാളാണെന്നും പരാതിക്കാരി കോടതിയില്‍ പറഞ്ഞു. ജാമ്യാപേക്ഷയില്‍ കക്ഷിചേരാനുള്ള പരാതിക്കാരിയുടെ അപേക്ഷയും കോടതി അനുവദിച്ചു. 

ജസ്റ്റിസ് ബെച്ചു കുര്യന്‍ അധ്യക്ഷനായ ബെഞ്ച് പ്രതിഭാഗത്തിന്റെ പ്രാഥമിക വാദം കേട്ടു. തൃക്കാക്കര പൊലിസ് രജിസ്റ്റര്‍ ചെയ്ത ബലാത്സംഗ കേസിലാണ് വേടന്‍ മുന്‍കൂര്‍ ജാമ്യാപേക്ഷ നല്‍കിയത്. ജാമ്യ ഹരജിയെ എതിര്‍ത്ത് പൊലിസ് റിപ്പോര്‍ട്ട് സമര്‍പ്പിച്ചു. 

ജൂലൈ 31നാണ് യുവഡോക്ടറുടെ പരാതിയില്‍ വേടനെതിരെ തൃക്കാക്കര പൊലിസ് ബലാത്സംഗ കേസ് ചുമത്തിയത്. ഈ കേസിലാണ് മുന്‍കൂര്‍ ജാമ്യഹരജി തേടി വേടന്‍ ഹൈക്കോടതിയെ സമീപിച്ചത്. അതിനിടെ പുതുതായി രണ്ട് പെണ്‍കുട്ടികള്‍ വേടനെതിരെ സമാന പരാതിയുമായി രംഗത്തെത്തിയിട്ടുണ്ട്. 

2020ല്‍ അതിക്രമം നേരിട്ടെന്നാണ് ഒരു യുവതി പരാതിയില്‍ പറയുന്നത്. 2021ലാണ് രണ്ടാമത്തെ പരാതി. മുഖ്യമന്ത്രി പിണറായി വിജയനാണ് ഇരുവരും പരാതി നല്‍കിയത്. നിലവില്‍ കേരളത്തിന് പുറത്ത് പഠിക്കുന്ന പരാതിക്കാരികള്‍ മുഖ്യമന്ത്രിയുമായി കൂടിക്കാഴച്ചക്ക് സമയം ആവശ്യപ്പെട്ടിട്ടുണ്ട്. ലഭിച്ച പരാതികള്‍ ഡിജിപിക്ക് കൈമാറുമെന്നാണ് റിപ്പോര്‍ട്ട്.

ALSO READ: അമീബിക് മസ്തിഷ്‌ക ജ്വരം; രോഗം ബാധിച്ച മൂന്നുമാസം പ്രായമുള്ള കുഞ്ഞ് ഗുരുതരാവസ്ഥയില്‍ തുടരുന്നു

High Court will consider Anticipatory bail submitted by rapper vedan in sexual harassment case tomorrow