സാവോപോളോ: ഫുട്‌ബോൾ ലോകത്ത് കരിയറിൽ ഏറ്റവും കൂടുതൽ മത്സരം കളിച്ച താരമെന്ന നേട്ടത്തിലെത്തിയിരിക്കുകയാണ് ബ്രസീലിയൻ ക്ലബായ ഫ്ലുമിനൻസെക്ക് വേണ്ടി കളിക്കുന്ന ഗോൾ കീപ്പർ ഫാബിയോ. ബ്രസീലിയൻ ഫുട്‌ബോൾ ലീഗ് സീരി എയിൽ ഫോർട്ടാലസയ്‌ക്കെതിരേ കഴിഞ്ഞ മത്സരത്തിൽ കളത്തിലിറങ്ങിയതോടെയാണ് ഫാബിയോ കരിയറിൽ 1,390 മത്സരങ്ങൾ എന്ന നാഴികക്കല്ല് പിന്നിട്ടത്. 

ഇതോടെ ഇംഗ്ലണ്ടിന്റെ മുൻ താരമായിരുന്ന പീറ്റർ ഷിൽട്ടണൊപ്പമെത്താനും താരത്തിന് കഴിഞ്ഞു. 44 വയസുകാരനായ ഫാബിയോയ്ക്ക് പ്രൊഫഷണൽ കരിയറിൽ താരത്തിന്റെ 28ാം വർഷമാണ്. കരിയറിൽ യൂണിയോ ബാൻഡെയ്‌റാന്റെ (30 മത്സരങ്ങൾ), വാസ്‌കോഡ ഗാമ (150), ക്രുസെയ്‌റോ (976), ഫ്ലുമിനെൻസ് (234) എന്നീ ക്ലബ്ബുകൾക്കായാണ് താരം കളിച്ചത്. 1,390 മത്സരങ്ങൾ കളിച്ച പീറ്റർ ഷിൽട്ടന്റെ നേട്ടം ഗിന്നസ് റെക്കോർഡിൽ  രേഖപ്പെടുത്തിയിട്ടുണ്ട്. 1966ൽ കരിയർ ആരംഭിച്ച ഷിൽട്ടൺ 1997ലാണ് വിരമിക്കുന്നത്.

ഷിൽട്ടണും ഫാബിയോക്കും ശേഷം ഫുട്‌ബോൾ ചരിത്രത്തിൽ ഏറ്റവും കൂടുതൽ മത്സരങ്ങൾ കളിച്ച താരം പോർച്ചുഗലിന്റെ ക്രിസ്റ്റ്യാനോ റൊണാൾഡോയാണ്. 1283 മത്സരങ്ങളാണ് റോണോയുടെ അക്കൗണ്ടിലുള്ളത്. 20ന് അമേരിക്ക ഡി കാലി ക്ലബിനെതിരേയുള്ള മത്സരത്തിൽ ഫാബിയോ കളത്തിലിറങ്ങിയാൽ ഷിൽട്ടണെ മറികടന്ന് ചരിത്രത്തിൽ ഏറ്റവും കൂടുതൽ മത്സരം കളിച്ച താരമെന്ന നേട്ടം സ്വന്തം പേരിൽ എഴിതിച്ചേർക്കാൻ ഫാബിയോക്ക് കഴിയും.

Goalkeeper Fabio who plays for Brazilian club Fluminense has achieved the feat of becoming the player with the most appearances in his career in world football