കൊച്ചി: യുവ രാഷ്ട്രീയ നേതാവ് അശ്ലീല സന്ദേശമയച്ചെന്ന് നടി റിനി ജോര്‍ജിന്റെ വെളിപ്പെടുത്തല്‍. മോശം സമീപനമുണ്ടായെന്നും, പരാതിപ്പെട്ടിട്ടും നടപടി എടുത്തില്ലെന്നും നടി ആരോപിച്ചു. മൂന്നര വര്‍ഷം മുന്‍പാണ് തനിക്ക് ആദ്യമായി ദുരനുഭമുണ്ടായതെന്നും റിനി വ്യക്തമാക്കി. മാധ്യമങ്ങളോടായിരുന്നു നടിയുടെ പ്രതികരണം.

പാര്‍ട്ടി നേതാക്കളുടെ ഭാര്യമാര്‍ക്കും ഇയാളില്‍ നിന്ന് ദുരനുഭവമുണ്ടായി. എന്നോട് മോശമായി പെരുമാറിയതിന് ശേഷമാണ് അയാള്‍ ജനപ്രതിനിധിയായത്. എന്റെ പരാതികള്‍ പരിഗണിക്കാതെ അയാള്‍ക്ക് പുതിയ സ്ഥാനങ്ങള്‍ ലഭിച്ചു. 

പലതവണ ഉപദേശിച്ചു. വഴക്ക് പറഞ്ഞിട്ടും മാറ്റമുണ്ടായില്ല. പരാതി നല്‍കുമെന്ന് പറഞ്ഞപ്പോള്‍ എന്നെ പുച്ഛിച്ചു. പരാതികള്‍ അവഗണിച്ച് പദവികള്‍ നല്‍കുന്നത് കണ്ടാണ് ഞാന്‍ തുറന്ന് പറയുന്നത്. റീല്‍സ് കണ്ട് സ്ഥാനാര്‍ഥിയാക്കരുത്. അവര്‍ എന്താണെന്ന് നമ്മള്‍ മനസിലാക്കണം,' റിനി പറഞ്ഞു.

ALSO READ: സഞ്ജുവിന് ആ കഴിവുള്ളതിനാൽ ഏഷ്യ കപ്പിൽ നിന്നും ഒഴിവാക്കില്ല: സുനിൽ ഗവാസ്കർ 

സോഷ്യൽ മീഡിയ വഴിയാണ് യുവനേതാവുമായി താൻ പരിചയപ്പെട്ടതെന്ന് റിനി വെളിപ്പുടത്തി. തുടക്കം മുതൽ മോശം മെസേജുകൾ അയച്ച് ശല്യം ചെയ്തെന്നും, അയാൾ കാരണം മറ്റു ബുദ്ധിമുട്ടുകൾ ഇല്ലാത്തത് കൊണ്ടാണ് പരാതിയുമായി മുന്നോട്ട് പോകാത്തതെന്നും റിനി കൂട്ടിച്ചേർത്തു.

പരാതിയുള്ളവർ അതുമായി മുന്നോട്ടു പോകട്ടെ. നേതാവിൻറെ പേരോ ഏത് പ്രസ്ഥാനമാണെന്നോ വെളിപ്പെടുത്താൻ തയ്യാറല്ല. പറയേണ്ട സ്ഥലങ്ങളിൽ എല്ലാം പരാതി അറിയിച്ചിട്ടുണ്ട്. പക്ഷേ അതിനുശേഷവും അയാൾക്ക് സ്ഥാനമാനങ്ങൾ ലഭിച്ചു. പ്രമാദമായ പീഡനകേസുകളിൽ ഉൾപ്പെട്ട നേതാക്കൾക്ക് എന്തു സംഭവിച്ചുവെന്ന് ഈ നേതാവ് ചോദിച്ചു. ഇയാൾ ഉൾപ്പെട്ട പ്രസ്ഥാനം ഇനിയെങ്കിലും ഉത്തരവാദിത്തം കാണിക്കണം. ഹൂ കെയേഴ്സ് എന്ന് തന്നെയാണ് അയാളുടെ ഇപ്പോഴത്തെയും നിലപാട്. പേരു പറഞ്ഞാലും നീതി കിട്ടാൻ പോണില്ല,' റിനി വെളിപ്പെടുത്തി. 

actress rini george allegation against young politician in kerala