കൊച്ചി: എറണാകുളം പറവൂരിലെ വീട്ടമ്മയുടെ ആത്മഹത്യയില്‍ പ്രതിയായ പൊലിസുകാരന്റെ മൂത്ത മകള്‍ കസ്റ്റഡിയില്‍. കേസില്‍ പ്രതിചേര്‍ക്കപ്പെട്ട പൊലിസ് ഉദ്യോഗസ്ഥന്‍ പ്രദീപിന്റെ മകളെയാണ് നാടകീയ സംഭവങ്ങള്‍ക്കൊടുവില്‍ പൊലിസ് കസ്റ്റഡിയിലെടുത്തത്. പ്രദീപിനും, ഭാര്യ ബിന്ദുവിനുമൊപ്പം മകളും വീട്ടമ്മയുടെ വീട്ടിലെത്തി ഭീഷണി മുഴക്കിയെന്നാണ് ആരോപണം. 

പുഴയില്‍ ചാടിമരിച്ച ആശയുടെ ആത്മഹത്യാ കുറിപ്പിന്റെ അടിസ്ഥാനത്തിലാണ് നടപടി. പൊലിസെത്തിയ സമയത്ത് മകള്‍ക്ക് കേസുമായി ബന്ധമില്ലെന്നും അകാരണമായി അറസ്റ്റ് ചെയ്യാന്‍ അനുവദിക്കില്ലെന്നും പറഞ്ഞ് ഇവരുടെ അഭിഭാഷകര്‍ പ്രശ്‌നമുണ്ടാക്കിയിരുന്നു. വൈകീട്ട് 7.30ഓടെ കലൂരിലുള്ള യുവതിയുടെ ഭര്‍ത്താവിന്റെ സ്ഥാപനത്തിലെത്തി കസ്റ്റഡിയിലെടുക്കാനായിരുന്നു തീരുമാനം. എന്നാല്‍ രാത്രി സ്ത്രീയെ കസ്റ്റഡിയിലെടുക്കണമെങ്കില്‍ മജിസ്‌ട്രേറ്റിന്റെ ഉത്തരവ് വേണമെന്ന് ചൂണ്ടിക്കാട്ടി അഭിഭാഷകര്‍ പ്രതിഷേധിച്ചു. ഇതോടെ പ്രത്യേക അനുമതി വാങ്ങിയാണ് പൊലിസ് പ്രതികളുടെ മകളെ കസ്റ്റഡിയിലെടുത്തത്. 

പറവൂര്‍ കോട്ടുവള്ളിയില്‍ പലിശക്ക് കടം കൊടുത്തവരുടെ ഭീഷണിയെ തുടര്‍ന്നാണ് ആശ പുഴയില്‍ ചാടി ജീവനൊടുക്കിയത്. സംഭവത്തില്‍ ആത്മഹത്യാ പ്രേരണ കുറ്റത്തിന് റിട്ടയര്‍ഡ് പൊലിസ് ഉദ്യോഗസ്ഥന്‍ പ്രദീപ് കുമാര്‍, ഭാര്യ ബിന്ദു എന്നിവര്‍ക്കെതിരെയാണ് കേസ് രജിസ്റ്റര്‍ ചെയ്തിട്ടുള്ളത്. ഇവരെ പിടികൂടാനായില്ലെന്നും, ഒളിവിലാണെന്നും പൊലിസ് അറിയിച്ചു. ആശയും ബിന്ദുവും തമ്മില്‍ ലക്ഷങ്ങളുടെ സാമ്പത്തിക ഇടപാട് നടന്നതായാണ് റിപ്പോര്‍ട്ട്. സംഭവത്തില്‍ പൊലിസ് അനാസ്ഥ ആരോപിച്ച് ആശയുടെ കുടുംബം രംഗത്തെത്തിയിരുന്നു. 

ALSO READ: വിദ്വേഷ പ്രസംഗം ആരോപിച്ച് കേസെടുത്ത് യുപി പൊലിസ് ജയിലിലടച്ചു; ഒടുവില്‍ ഹൈക്കോടതി കേസ് റദ്ദാക്കി, അബ്ബാസ് അന്‍സാരിയുടെ എംഎല്‍എ പദവി പുനഃസ്ഥാപിക്കും 

In connection with the suicide of a housewife in Paravur, Ernakulam, the elder daughter of the accused police officer has been taken into custody.