പ്രവാചക പ്രഭു മുഹമ്മദ് മുസ്തഫ (സ)യുടെ ജന്മദിനം കൊണ്ട് അനുഗ്രഹീതമായ വിശുദ്ധ റബീഉല്‍ അവ്വല്‍ സമാഗതമാവുകയാണ്. മുസ്‌ലിം മത വിശ്വാസികള്‍ക്ക് സന്തോഷത്തിന്റെ നാളുകള്‍ ആണ് റബീഉല്‍ അവ്വല്‍. ഈ വര്‍ഷം 1500-ാ മതാണെന്ന സവിശേഷത കൂടിയുണ്ട്. സംസ്ഥാനത്തിനകത്തും പുറത്തുമായി സമസ്ത കേരള ജംഇയ്യത്തുല്‍ ഉലമയുടെ കീഴില്‍ വിപുലമായ ഒരുക്കങ്ങള്‍ നടന്നുകൊണ്ടിരിക്കുന്നു. സമസ്തയുടെ നൂറാം വാര്‍ഷികം എന്ന പ്രത്യേകതയും ഈ പ്രാവശ്യത്തെ നബിദിന ആഘോഷങ്ങള്‍ക്കുണ്ട്.

ഇതിന്റെ ഭാഗമായി ഈ വര്‍ഷം മുതല്‍ കോഴിക്കോട് കേന്ദ്രീകരിച്ചുകൊണ്ട് വിപുലമായ മീലാദ് ആഘോഷത്തിന് തുടക്കം കുറിക്കുകയാണ്. ഓഗസ്റ്റ് 24 ഞായറാഴ്ച വൈകുന്നേരം 4 മണിക്ക് കോഴിക്കോട് കോതി പാലത്തിന് സമീപത്ത് നിന്ന് റാലി ആരംഭിക്കും. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, സമസ്ത ജില്ലാ പ്രസിഡന്റ് എ.വി അബ്ദുറഹിമാന്‍ മുസ്‌ലിയാർ, ജന.സെക്രട്ടറി ഉമര്‍ ഫൈസി മുക്കം, സമസ്ത കേന്ദ്ര മുശാവറ അംഗം ഒളവണ്ണ അബുബക്കര്‍ ദാരിമി, ടി.പി.സി തങ്ങള്‍ തുടങ്ങിയവര്‍ നേത്യത്വം നല്‍കും. വിവിധ മഹല്ലുകളില്‍ നിന്ന് എത്തിച്ചേരുന്ന ആയിരങ്ങള്‍ റാലിയില്‍ അണിനിരക്കും. ദഫ് സ്‌കൗട്ട് സംഘങ്ങള്‍ റാലിയെ അനുഗമിക്കും.

വൈകുന്നേരം ആറുമണിക്ക് കോഴിക്കോട് ഫ്രാന്‍സിസ് റോഡിലെ സമസ്ത ആസ്ഥാനത്ത് റാലി സമാപിക്കും. പൊതുസമ്മേളനം സമസ്ത കേരള ജംഇയ്യത്തുല്‍ ഉലമ പ്രസിഡണ്ട് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. സ്വാഗതസംഘം ചെയര്‍മാന്‍ സയ്യിദ് മുഹമ്മദ് കോയ തങ്ങള ജമലുല്ലൈലി അധ്യക്ഷത വഹിക്കും. തുടര്‍ന്ന് മൗലിദ് പാരായണവും ഇഷ്‌ക്ക് മജ്ലിസും നടക്കും.