കൊല്ലം: ചവറ കുടുംബകോടതി ജഡ്ജി ഉദയകുമാറിനെതിരായ ലൈംഗികാതിക്രമണ പരാതിയിൽ അന്വേഷണം ആരംഭിച്ചു. പരാതിക്കാരിൽ നിന്നും വിവരം ശേഖരിക്കലാണ് ആദ്യ നടപടി. കൊല്ലം ചവറയിൽ വിവാഹമോചനക്കസിന് ഹാജരായ യുവതികളോട് അപമര്യാതയായി പെരുമാറിയെന്നാണ് കുടുംബകോടതി ജഡ്ജി ഉദയകുമാറിനെതിരെയുള്ള പരാതി. ജില്ല ജുഡീഷ്യറിയുടെ ചുമതലയുള്ള രജിസ്ട്രാർ ആണ് കേസ് അന്വേഷിക്കുന്നത്.  ജില്ലാ ജുഡീഷ്യറുടെ അന്വേഷണ റിപ്പോർട്ടിന്റെ അടിസ്ഥാനത്തിൽ ഓഗസ്റ്റ് 26ന് ഹൈക്കോടതി അഡ്മിനിസ്ട്രേറ്റീവ് കമ്മിറ്റി പരിഗണിക്കും. 

കേസിൽ ആദ്യഘട്ട നടപടിയായി ജഡ്ജിയെ മറ്റൊരു കോടതിയിലേക്ക് സ്ഥലം മാറ്റിയിരുന്നു.  ഹൈക്കോടതി ഇടപെട്ടുകൊണ്ടാണ് ജഡ്ജിയെ കൊല്ലം എംഎസിടിസി കോടതിയിലേക്ക് സ്ഥലം മാറ്റിയത്. അതേസമയം  ജഡ്ജിയുടെ നിയമനത്തിൽ കൊല്ലത്ത് ബാർ അസോസിയേഷനിൽ പ്രതിഷേധം പുകഞ്ഞു കൊണ്ടിരിക്കുകയാണ്.  കഴിഞ്ഞ 19നാണ് പരാതിയുമായി എത്തിയ വനിത കക്ഷിയോട് ജഡ്ജി അപമര്യാദയായി പെരുമാറിയതെന്നാണ് പരാതി. ജില്ല ജഡ്ജിക്ക് യുവതി നൽകിയ പരാതി ഹൈക്കോടതിയിലേക്ക് കൈമാറുകയായിരുന്നു. ഇതിന് പിന്നാലെ ഓഗസ്റ്റ് 20ന് ജഡ്ജിയെ സ്ഥലം മാറ്റുകയും ചെയ്തു.  പരാതിയിൽ ഹൈക്കോടതി അന്വേഷണം തുടരുകയാണ്.