ന്യൂഡൽഹി: പുരാതന കാലഘട്ടത്തിൽ നിലനിന്നിരുന്ന സമയം കണ്ടെത്തുന്ന രീതികൾ ഗണിത ബിരുദ വിദ്യാർഥികൾക്കായുള്ള പാഠ്യപദ്ധതി ചട്ടക്കൂടിൽ ഉൾപ്പെടുത്തി യൂനിവേഴ്‌സിറ്റി ഗ്രാന്റ്‌സ് കമ്മിഷൻ (യു.ജി.സി). സൂത്ര അധിഷ്ഠിത ഗണിതം, ബീജഗണിതം, കാല ഗണന (സമയം കണക്കുകൂട്ടൽ), ശൂൽവ സൂത്രങ്ങളിൽനിന്നുള്ള ജ്യാമിതി പഠനങ്ങൾ തുടങ്ങിയവയാണ് ഗണിത ബിരുദ വിദ്യാർഥികൾക്കായുള്ള പാഠ്യപദ്ധതി ചട്ടക്കൂടിൽ ഉൾപ്പെടുത്താൻ യു.ജി.സി നിർദേശിച്ചിരിക്കുന്നത്. പുതിയ നീക്കത്തിനെതിരെ ഗണിതശാസ്ത്ര വിദഗ്ധർ വിമർശനവുമായി രംഗത്തെത്തി. 

പുതിയ ദേശീയ വിദ്യാഭ്യാസ നയം അടിസ്ഥാനമാക്കി കോഴ്‌സ് രൂപകൽപനയിലും സിലബസ് വികസനത്തിലും വഴക്കവും നവീകരണവും പ്രോത്സാഹിപ്പിക്കുന്നതിനുള്ള മാതൃകാ പാഠ്യപദ്ധതിയാകും ഇതെന്ന് യു.ജി.സി സെക്രട്ടറി മനീഷ് ജോഷി അവകാശപ്പെട്ടു. ഇതു വിവിധ പുരാതന ഇന്ത്യൻ ആശയങ്ങളിൽ ശ്രദ്ധ കേന്ദ്രീകരിക്കുന്നുവെന്നും അദ്ദേഹം പറഞ്ഞു. 
ബിരുദ പ്രോഗ്രാമുകൾക്കു കീഴിൽ അധിക കോഴ്സായി സൂത്ര അധിഷ്ഠിത ബീജഗണിതം, ഗണിതശാസ്ത്ര സൂത്രവാക്യങ്ങൾ ഉപയോഗിക്കുന്ന പുരാതന ഇന്ത്യൻ രീതി എന്നിവ പഠിപ്പിക്കാനാണ് നിർദേശിക്കുന്നത്.

പുരാതന ഇന്ത്യൻ പണ്ഡിതന്മാർ സൂര്യൻ, ചന്ദ്രൻ, നക്ഷത്രങ്ങൾ, ഭൂമിയുടെ ചലനം എന്നിവ ഉപയോഗിച്ച് സമയം കണക്കാക്കുന്ന കാലഗണന (പരമ്പരാഗത ഇന്ത്യൻ സമയസൂചന) എന്ന കോഴ്സും യു.ജി.സി നിർദ്ദേശിച്ചിട്ടുണ്ട്.യുഗങ്ങൾ, കൽപങ്ങൾ മുതൽ ബ്രഹ്‌മവർഷം വരെയുള്ള ഹിന്ദുവിശ്വാസത്തിന്റെ ഭാഗമായുള്ള സമയ ഘടനയും കരടിൽ വിശദീകരിക്കുന്നു. വിഷ്ണു വർഷം, ശിവ വർഷം തുടങ്ങിയ ഹിന്ദുവിശ്വാസ സമയ ചക്രങ്ങളെയും പരിചയപ്പെടുത്തുന്നുണ്ട്. ഹിന്ദുവിശ്വാസ പ്രകാരമുള്ള ആചാരങ്ങളിലും ഉത്സവങ്ങളിലും ഉപയോഗിക്കുന്ന ശുഭ മുഹൂർത്തങ്ങളെ എങ്ങനെ നിർണയിക്കുന്നു എന്നതിനെക്കുറിച്ച് പഠിപ്പിക്കണമെന്ന് പാഠ്യപദ്ധതി ചട്ടക്കൂടിന്റെ കരടിൽ ആവശ്യപ്പെടുന്നു. ജ്യോതിശാസ്ത്രം, പുരാണങ്ങൾ, സംസ്‌കാരം എന്നിവ ഗണിത കോഴ്സുമായി സംയോജിപ്പിക്കുന്നതാണ് പുതിയ ചട്ടക്കൂട് നിർദേശം.