സനാ: ഗസ്സയിൽ ആക്രമണം തുടരുന്നതിനിടെ യെമൻ തലസ്ഥാനമായ സനായിലും മിസൈൽ ആക്രമണം നടത്തി ഇസ്റാഈൽ. ഹൂതി വിമതരെ ലക്ഷ്യമിട്ടാണ് ഇസ്റാഈൽ സൈന്യം സനായിൽ വ്യോമാക്രമണം നടത്തിയത്. ഹൂതികളുടെ ഊർജ കേന്ദ്രങ്ങൾ ലക്ഷ്യമിട്ടായിരുന്നു ഇസ്റഈൽ ആക്രമണമെന്ന് ഹൂതി അനുകൂല മാധ്യമമായ അൽ മസിറ ടിവി റിപ്പോർട്ട് ചെയ്തു. സനായിലെ സൈനിക സമുച്ചയത്തിൽ സ്ഥിതി ചെയ്യുന്ന പ്രസിഡൻഷ്യൽ കൊട്ടാരവും തങ്ങൾ ലക്ഷ്യമിട്ടതായി ഇസ്റാഈൽ വെളിപ്പെടുത്തി.

ALSO READ: ഒരേ സമയം അനുരഞ്ജന ചർച്ചയ്ക്ക് ഉത്തരവിട്ടും കൂട്ടകുരുതി തുടർന്നും നെതന്യാഹു 

ഇസ്റാഈൽ ആക്രമണത്തിൽ രണ്ട് പേർ കൊല്ലപ്പെടുകയും 35 പേർക്ക് പരിക്കേൽക്കുകയും ചെയ്തതായി അൽ മസിറ റിപ്പോർട്ട് ചെയ്തു. ​ഗസ്സയിൽ ആക്രമണം തുടരുന്ന ഇസ്റാഈലിനെതിരെ ഹൂതികൾ ദിവസങ്ങൾക്ക് മുമ്പ് വ്യോമാക്രമണം നടത്തിയിരുന്നു. ഇതിന് പിന്നാലെയായിരുന്നു ഇസ്റാഈൽ ആക്രമണം. 

എന്നാൽ, ആക്രമണത്തിനെത്തിയ ഇസ്റാഈൽ യുദ്ധവിമാനങ്ങളെ തങ്ങളുടെ വ്യോമ പ്രതിരോധ സംവിധാനങ്ങൾക്ക് നിർവീര്യമാക്കാനും പിന്തിരിപ്പിക്കാനും കഴിഞ്ഞതായി ഹൂതി സൈനിക വക്താവിനെ ഉദ്ധരിച്ച് അൽ മസിറ റിപ്പോർട്ട് ചെയ്തു. ആക്രമണത്തിന് ശേഷം സനായിൽ തീയും പുകയും ഉയരുന്ന ദൃശ്യങ്ങൾ അൽ ജസീറയടക്കം വിവിധ അന്താരാഷ്ട്ര മാധ്യമങ്ങൾ പുറത്തുവിട്ടു. 

ALSO READ: ഇസ്റാഈലി കുടിയേറ്റ പദ്ധതിയെയും സൈനിക വ്യാപന നടപടികളെയും ശക്തമായി അപലപിച്ച് യു.എ.ഇ 

ഫലസ്തീനികൾക്ക് ഐക്യദാർഢ്യം പ്രഖ്യാപിച്ച് തങ്ങളുടെ സൈനിക നടപടികൾ തുടരുമെന്ന് ഹൂതികൾ ഞായറാഴ്ച വീണ്ടും വ്യക്തമാക്കി. “ഇസ്റാഈൽ ആക്രമണങ്ങൾ ഗസ്സയ്ക്ക് വേണ്ടിയുള്ള ഞങ്ങളുടെ പിന്തുണയെ തടയില്ല. എന്ത് ത്യാഗം സഹിച്ചാലും ഞങ്ങൾ മുന്നോട്ട് പോകും,” ഹൂതി ഉദ്യോഗസ്ഥൻ മുഹമ്മദ് അൽ ബുഖൈതി പ്രസ്താവനയിൽ പറഞ്ഞു. 

Israel has reportedly launched missile attacks targeting Houthi-controlled power plants in Yemen, escalating regional tensions amid ongoing conflict in the Middle East.