കോഴിക്കോട്: ജന്മനാ അംഗവൈകല്യമുണ്ടെന്ന വ്യാജ ഭിന്നശേഷി സർട്ടിഫിക്കറ്റിൽ പ്രതിരോധ വകുപ്പിൽനിന്ന് വിരമിച്ചവർക്കടക്കം സർക്കാർ സർവിസിൽ നിയമനം.  വ്യാജ ഭിന്നശേഷി രേഖകൾ സൃഷ്ടിച്ചാണ് വിമുക്ത ഭടൻമാരടക്കമുള്ള ചിലർ സർക്കാർ സർവിസിൽ കയറിയതെന്നാണ് പരാതി ഉയർന്നിരിക്കുന്നത്. വ്യാജ സർട്ടിഫിക്കറ്റുകളുടെ മറവിൽ സംസ്ഥാനവ്യാപകമായി വിമുക്തഭടന്മാർക്ക് അനധികൃത നിയമനം ലഭിച്ചത് സംബന്ധിച്ച് മുഖ്യമന്ത്രിക്ക് പരാതിയും നൽകിയിട്ടുണ്ട്. അനധികൃതമായി സർവിസിൽ കയറിയവരുടെ വിവരങ്ങൾ സഹിതം വിമുക്തഭടന്മാരുടെയും കുടുംബത്തിന്റെയും ക്ഷേമത്തിനായി പ്രവർത്തിക്കുന്ന എക്‌സ് സർവിസ്‌മെൻ വെൽഫെയർ ആൻഡ് റിഹാബിലിറ്റേഷൻ അസോസിയേഷനാണ്  പരാതി നൽകിയത്. മെഡിക്കൽബോർഡിനെ സ്വാധീനിക്കാനും വ്യാജമായി സർട്ടിഫിക്കറ്റുകൾ തയാറാക്കി നൽകാനും വൻലോബി  പ്രവർത്തിക്കുന്നുണ്ടെന്നാണ്  വിവരം. 

പ്രതിരോധവകുപ്പിൽ ജോലിയിൽ പ്രവേശിക്കുന്നതിന് മുൻപ് ശാരീരികക്ഷമതാ പരിശോധന ഉൾപ്പെടെ കൃത്യമായി നടക്കുന്നുണ്ട്. വൈകല്യം ഇല്ലെന്ന് ഉറപ്പുവരുത്തി മാത്രമേ നിയമനം നൽകൂ. ഇത്തരക്കാർക്കാണിപ്പോൾ ജന്മനാ അംഗവൈകല്യമുണ്ടെന്ന സർട്ടിഫിക്കറ്റുകൾ ലഭിക്കുന്നതെന്നാണ് അസോസിയേഷൻ ആരോപിക്കുന്നത്. 

2020ന് ശേഷം പ്രതിരോധസേനകളിൽ നിന്ന് വിരമിച്ചവരിൽ ചിലരാണ് പി.എസ്.സി മുഖേനയുള്ള നാല് ശതമാനം ഭിന്നശേഷി സംവരണത്തിലൂടെ അനധികൃതമായി സർവിസിൽ കയറിയതെന്ന് ആരോപണമുള്ളത്. ജന്മനാ അംഗവൈകല്യം ബാധിച്ചവർക്ക് മാത്രമുള്ള ആനുകൂല്യമാണ് ഇവർ ദുരുപയോഗം ചെയ്യുന്നതെന്നും ചൂണ്ടിക്കാണിക്കപ്പെടുന്നു.  പ്രതിരോധ സേനയിൽ ജോലി ചെയ്യുന്ന സമയത്ത് ഏതെങ്കിലും തരത്തിലുള്ള അസുഖം മൂലമോ അപകടം മൂലമോ സർവിസിൽ നിന്ന് തിരികെ വന്നവർക്ക് പെൻഷനും മറ്റു ആനുകൂല്യങ്ങളും ആജീവനാന്തം കേന്ദ്രസർക്കാർ അനുവദിച്ചിട്ടുണ്ട്. ഇതിന് പുറമേ സൈനിക മെഡിക്കൽ ബോർഡിന്റെ പെൻഷൻ ആനുകൂല്യവും അധികമായി ലഭിക്കുന്നുണ്ട്. 

ഇത്തരത്തിൽ ആനുകൂല്യം ലഭിക്കുന്നവരാണ്  ജൻമനാ വൈകല്യമുണ്ടെന്ന ഭിന്നശേഷി സർട്ടിഫിക്കറ്റുകൾ വ്യാജമായി നിർമിച്ച് സംവരണത്തിലൂടെ വീണ്ടും സർക്കാർ ജോലിയിൽ പ്രവേശിക്കുന്നത്. ഇക്കാരണത്താൽ മറ്റുള്ള വിമുക്ത ഭടന്മാരുടെ അവസരമാണ് നഷ്ടപ്പെടുന്നതെന്നും ചൂണ്ടിക്കാണിക്കപ്പെടുന്നു. എൻ.സി.സി, സൈനിക ക്ഷേമം എന്നീ വകുപ്പുകളിലെ ക്ലർക്ക് തസ്തികയിൽ പി.എസ്.സി വഴി ഓരോ ജില്ലകളിൽ നിന്നും രണ്ട് മുതൽ നാലു പേർ വരെയാണ് ഭിന്നശേഷിക്കാർ എന്ന വിഭാഗത്തിൽ അനധികൃതമായി ജോലിയിൽ പ്രവേശിച്ചതെന്നാണ് പരാതിയിൽ പറയുന്നത്. എൽ.ഡി ടൈപ്പിസ്റ്റ്, ടൈപ്പിസ്റ്റ് ക്ലർക്ക് എന്നീ തസ്‌കിയിലേക്കും ലാസ്റ്റ് ഗ്രേഡ് സർവന്റ് ആയും നിരവധി അനർഹർ പി.എസ്.സി വഴി ജോലിയിൽ പ്രവേശിപ്പിച്ചിട്ടുണ്ട്. ചിലർക്ക് അഡ്വൈസ് മെമ്മോയും ലഭിച്ചിട്ടുണ്ട്.  അഞ്ച് വർഷത്തിനുള്ളിൽ ഇത്തരത്തിൽ നിയമനം നേടിയ ഭിന്നശേഷിക്കാർ എന്ന് അവകാശപ്പെടുന്നവരെ വീണ്ടും മെഡിക്കൽ പരിശോധനയ്ക്ക് വിധേയമാക്കണമെന്നും വിമുക്ത ഭടൻമാർ പരാതിയിൽ പറയുന്നു.