ന്യൂഡല്‍ഹി:  പ്രധാനമന്ത്രിയുടെ ബിരുദ സര്‍ട്ടിഫിക്കറ്റ് പരസ്യപ്പെടുത്തേണ്ടതില്ലെന്ന് ഡല്‍ഹി ഹൈക്കോടതി. മോദിയുടേത് ഉള്‍പെടെ 1978ലെ ഡിഗ്രിയുമായി ബന്ധപ്പെട്ട വിവരങ്ങളൊന്നും പുറത്തു വിടേണ്ടതില്ലെന്നാണ് കോടതി ഉത്തരവ്. ഡല്‍ഹി സര്‍വ്വകലാശാല വാദം ശരിവച്ച കോടതി വിവരാവകാശ കമ്മീഷന്റെ ഉത്തരവ് തള്ളി. 

അക്കാദമിക് റെക്കോര്‍ഡുകളോ ഡിഗ്രിയോ പരസ്യമാക്കേണ്ടതില്ലെന്നാണ് ജസ്റ്റിസ് സചിന്‍ ദത്തയുടെ ഉത്തരവ്. വിധിയുടെ കൂടുതല്‍ വിവരങ്ങള്‍ പുറത്തു വന്നിട്ടില്ല. ഹരജിക്കാര്‍ക്ക് സുപ്രിം കോടതിയെ സമീപിക്കാം.
 
പ്രധാനമന്ത്രി മോദിയുടെ അക്കാദമിക് രേഖകള്‍ വെളിപ്പെടുത്തുന്നതുമായി ബന്ധപ്പെട്ട് ഒരു പതിറ്റാണ്ടോളമായി നിയമപോരാട്ടം തുടരുകയാണ് - തെരഞ്ഞെടുപ്പ് സത്യവാങ്മൂലം പ്രകാരം പ്രധാനമന്ത്രി മോദി ഡല്‍ഹി സര്‍വകലാശാലയില്‍ നിന്ന് ബിഎ ബിരുദം നേടി എന്ന് പറയപ്പെടുന്ന 1978ലെ പരീക്ഷ പാസായ എല്ലാ വിദ്യാര്‍ത്ഥികളുടെയും രേഖയാണ് വിവരാകാശപ്രകാരം ആവശ്യപ്പെട്ടിരുന്നത്. 2016ലാണ് വിവരാകാശപ്രകാരമുള്ള രേഖ  ആവശ്യപ്പെടുന്നത്. ആക്ടിവിസ്റ്റ് നീരജ് കുമാറാണ് വിവരാവകാശ കമ്മീഷനെ സമീപിച്ചത്. 

എന്നാല്‍ സര്‍വ്വകലാശാല വിവരങ്ങള്‍ പങ്കുവെക്കാന്‍ സമ്മതിച്ചില്ല. മൂന്നാം കക്ഷിയുമായി ബന്ധപ്പെട്ട വിവരങ്ങള്‍ പങ്കിടുന്നതിനെതിരായ നിയമങ്ങള്‍ ഉദ്ധരിച്ചാണ് നിഷേധിച്ചത്. എന്നാല്‍ ചീഫ് ഇന്‍ഫര്‍മേഷന്‍ കമ്മീഷന്‍ (സിഐസി) ഈ യുക്തി അംഗീകരിച്ചില്ല. മാത്രമല്ല 2016 ഡിസംബറില്‍ പരിശോധനക്ക് അനുമതി നല്‍കാന്‍ ഡല്‍ഹി സര്‍വ്വകലാശാലയോട് ഉത്തരവിട്ടു.

ഒരു പൊതു വ്യക്തിയുടെ, പ്രത്യേകിച്ച് പ്രധാനമന്ത്രിയുടെ വിദ്യാഭ്യാസ യോഗ്യത സുതാര്യമായിരിക്കണമെന്ന് വിവരാവകാശ കമ്മീഷന്‍ (സിഐസി) ഈ  ഉത്തരവിനെ ന്യായീകരിച്ചു. ഈ വിവരങ്ങള്‍ അടങ്ങിയ രജിസ്റ്റര്‍ ഒരു പൊതു രേഖയായി കണക്കാക്കുമെന്നും സിഐസി അഭിപ്രായപ്പെട്ടു. ഈ ഉത്തരവിനെതിരെയാണ് സര്‍വ്വകലാശാല ഹൈക്കോടതിയെ സമീപിച്ചത്. 

നരേന്ദ്ര മോദി തങ്ങളുടെ പൂര്‍വ വിദ്യാര്‍ത്ഥിയാണെങ്കിലും നിലവില്‍ അദ്ദേഹം രാജ്യത്തിന്റെ പ്രധാനമന്ത്രിയാണ്. അതുകൊണ്ടുതന്നെ ബിരുദ സര്‍ട്ടിഫിക്കറ്റ് പൊതുജനങ്ങള്‍ക്ക് നല്‍കാനാവില്ല. രാഷ്ട്രീയ ലക്ഷ്യം മാത്രം പ്രതീക്ഷിക്കുന്നവരുടെ മുന്‍പില്‍ സര്‍ട്ടിഫിക്കറ്റ് പ്രദര്‍ശിപ്പിക്കാനാവില്ലെന്നും പ്രത്യേകിച്ച് അപരിചിതര്‍ക്ക് സര്‍ട്ടിഫിക്കറ്റ് പരിശോധിക്കാനാവില്ലെന്നും സര്‍വകലാശാലക്ക് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത കോടതിയില്‍ വാദിച്ചു.

അറിയാനുള്ള അവകാശത്തെക്കാള്‍ വലുതാണ് സ്വകാര്യതക്കുള്ള അവകാശമെന്നും ഡല്‍ഹി സര്‍വകലാശാല ചൂണ്ടിക്കാട്ടി. പ്രധാനമന്ത്രിക്കും സ്വകാര്യതയുണ്ട്. കേന്ദ്ര വിവരാവകാശ കമ്മീഷന്റെ ഉത്തരവ് തള്ളണമെന്നും തുഷാര്‍ മേത്ത ഹൈക്കോടതിയില്‍ വാദിച്ചു. സര്‍വകലാശാലയുടെ കൈവശം മോദിയുടെ ബിരുദ സര്‍ട്ടിഫിക്കറ്റുകള്‍ ഉണ്ട്. വേണമെങ്കില്‍ അത് കോടതിയില്‍ ഹാജരാക്കാം. എന്നാല്‍ അപരിചിതര്‍ക്ക് ഈ രേഖകള്‍ പരിശോധിക്കാന്‍ അനുവാദമില്ലെന്നും തുഷാര്‍ മേത്ത കോടതിയില്‍ വാദിച്ചു.

കോടതിയില്‍ പരിശോധനയ്ക്കായി രേഖകള്‍ സമര്‍പ്പിക്കാന്‍ സര്‍വകലാശാല തയ്യാറാകുമെന്നും എന്നാല്‍ അത് പരസ്യമാക്കരുതെന്നും തുഷാര്‍ മേത്ത കൂട്ടിച്ചേര്‍ത്തു. പബ്ലിസിറ്റിക്കായോ അല്ലെങ്കില്‍  രാഷ്ട്രീയ ലക്ഷ്യത്തോടെയോ ആണ് രേഖ ആവശ്യപ്പെടുന്നതെന്നും മേത്ത ചൂണ്ടിക്കാട്ടി. എന്നാല്‍ വിവരാവകാശ നിയമം അപേക്ഷകന്റെ വ്യക്തിത്വമോ ഉദ്ദേശ്യമോ പരിഗണിക്കുന്നില്ലെന്നാണ്  രേഖ തേടിയ ആക്ടിവിസ്റ്റുകള്‍ വാദിച്ചത്. 

ബിരുദം സംസ്ഥാനം നല്‍കുന്ന യോഗ്യതയാണെന്നും അത് ഒരു സ്വകാര്യ കാര്യമല്ലെന്നും അവര്‍ വാദിച്ചു.  പ്രധാനമന്ത്രിയുടെ വിദ്യാഭ്യാസ യോഗ്യതകള്‍ പൊതുതാല്‍പര്യമുള്ള കാര്യമാണെന്നും അവര്‍ കോടതിയില്‍ ചൂണ്ടിക്കാട്ടി. 

delhi high court rules that prime minister modi's 1978 degree details need not be made public. the court upheld delhi university’s argument and overturned the rti commission’s earlier order.