തിരുവനന്തപുരം: ലൈംഗിക ചൂഷണ ആരോപണങ്ങൾക്ക് പുറകെ വ്യാജ തിരിച്ചറിയൽ കാർഡ് കേസിലും രാഹുൽ മാങ്കൂട്ടത്തിൽ എംഎൽഎയ്ക്ക് കുരുക്ക്. കേസിൽ രാഹുലിനെ ക്രൈംബ്രാഞ്ച് ചോദ്യം ചെയ്യും. ശനിയാഴ്ച ഹാജരാകാൻ ആവശ്യപ്പെട്ട് രാഹുലിന് ക്രൈംബ്രാഞ്ച് നോട്ടിസ് അയച്ചു. യൂത്ത് കോൺഗ്രസ് സംഘടനാ തെരഞ്ഞെടുപ്പുമായി ബന്ധപ്പെട്ടാണ് വ്യാജ തിരിച്ചറിയൽ കാർഡ്. 

പ്രതികളുടെ ശബ്ദരേഖയിൽ രാഹുൽ മാങ്കൂട്ടത്തിലിൻ്റെ പേരുള്ളതാണ് അദ്ദേഹത്തിന് തിരിച്ചടിയായത്. ഇതോടെയാണ് കേസുമായി ബന്ധപ്പെട്ട് വീണ്ടും ഹാജരാകാൻ വിളിപ്പിക്കുന്നത്. മൂന്നാം പ്രതി അഭിനന്ദ് വിക്രമിൻ്റെ ഫോണിലെ ശബ്ദരേഖയിലാണ് രാഹുലിൻ്റെ പേര് പരാമർശിക്കുന്നത്. കേസിൽ ആകെ 7 പ്രതികളാണ് ഉള്ളത്.

വ്യാജ തിരിച്ചറിയൽ രേഖ കേസിൽ പൊലിസിൻറെ ആദ്യത്തെ ചോദ്യം ചെയ്യലിൽ രാഹുൽ മാങ്കൂട്ടത്തിൽ വ്യജ തിരിച്ചറിയൽ രേഖയുമായി ബന്ധപ്പെട്ട ആരോപണങ്ങൾ നിഷേധിച്ചിരുന്നു. അറസ്റ്റിലായ പ്രതികളുമായി ബന്ധമുണ്ട്. എന്നാൽ അവർ വ്യാജ രേഖയുണ്ടായതായി അറിയില്ല. അത്തരത്തിൽ ഉള്ള കള്ള വോട്ടുകൾ ലഭിച്ചിട്ടില്ലെന്നുമായിരുന്നു രാഹുലിൻറെ മൊഴി. നാല് മണിക്കൂർ നീണ്ട മൊഴിയെടുപ്പിലാണ് വ്യാജ തിരിച്ചറിയർ കാർഡിനെ കുറിച്ച് ഒന്നുമറിയില്ലെന്ന് രാഹുൽ മാങ്കൂട്ടത്തിൽ വിശദീകരിച്ചത്.