കൊച്ചി: സ്വകാര്യ ബസ്സുകളിലെ ഡ്രൈവർക്കും കണ്ടക്ടർക്കും ക്ലീനർക്കും പൊലിസ് ക്ലിയറൻസ് സർട്ടിഫിക്കറ്റ് നിർബന്ധമാണെന്ന് ഹൈക്കോടതി.  സംസ്ഥാന സർക്കാർ ഉത്തരവ് ചോദ്യം ചെയ്ത് ബസ് ഉടമകളും യൂണിയനുകളും ഉൾപ്പെടെയുള്ള നൽകിയ ഹര്ജി ഹൈക്കോടതി തള്ളുകയായിരുന്നു.  എതിർപ്പുകളെ തുടർന്ന് പുതിയ നിബന്ധനകൾ നടപ്പാക്കുന്നത് സർക്കാർ നിർത്തിവച്ചിരുന്നു.

കഴിഞ്ഞ രണ്ടു വർഷങ്ങൾക്കുള്ളിൽ സ്വകാര്യ ബസ്സുകൾ ഉൾപ്പെടെ 1017 അപകടങ്ങൾ കേരളത്തിൽ ഉണ്ടായെന്ന് വിധി പറഞ്ഞുകൊണ്ട് ജസ്റ്റിസ് സിപി മുഹമ്മദ് നിയാസ് വ്യക്തമാക്കി.  പൊതുജന സുരക്ഷയെ കരുതിയാണ് ഇത്തരത്തിലുള്ള നിബന്ധനങ്ങൾ കൊണ്ടുവന്നതെന്നും കേവലം നിയമങ്ങളിലെ സാങ്കേതികത്വം മാത്രം ചൂണ്ടിക്കാട്ടി ഈ കാര്യങ്ങൾ നടപ്പാക്കാതിരിക്കാനാവില്ലെന്നും കോടതി ചൂണ്ടിക്കാട്ടി. 

ഈ വർഷം ജനുവരിയിലാണ് പുതിയ മാർഗ്ഗനിർദ്ദേശങ്ങൾ പുറത്തുവന്നതെന്നും അവനടപ്പാക്കാൻ ആവശ്യമായ സമയവും അനുവദിച്ചിരുന്നുവെന്നും കോടതി പറഞ്ഞു. സംസ്ഥാനത്തെ ഗതാഗത വകുപ്പിന് ഇത്തരം നടപടികൾ സ്വീകരിക്കാൻ അധികാരമില്ലെന്ന വാദവും കോടതി തള്ളിക്കളഞ്ഞു.

പെർമിറ്റ് ഉടമകൾക്ക് തങ്ങളുടെ ജീവനക്കാർ ഗതാഗത നിയമങ്ങൾ പാലിക്കുന്നുണ്ടെന്ന് ഉറപ്പാക്കേണ്ട ഉത്തരവാദിത്വമുണ്ട്. ജീവനക്കാർക്ക് ഏതെങ്കിലും വിധത്തിലുള്ള ക്രിമിനൽ പശ്ചാത്തലം ഉണ്ടോ എന്നതും പ്രധാനപ്പെട്ട കാര്യമാണ്. പൊലിസ് വെരിഫിക്കേഷൻ നടത്തണം എന്നുള്ളത് നിയമപരമല്ലെന്ന വാദവും നിലനിൽക്കില്ലെന്ന് കോടതി അറിയിച്ചു.  പെർമിറ്റ് ഉടമകൾ ഗതാഗത മേഖലയിൽ പ്രവർത്തിക്കുമ്പോൾ അത് നിയമാനുസൃമാണെന്ന് ഉറപ്പാക്കേണ്ട നിയമപരമായ ഉത്തരവാദിത്വം സർക്കാരുകൾക്കുണ്ടെന്നും കോടതി വ്യക്തമാക്കി.