ഗസ്സ: ഗസ്സ സിറ്റി പിടിച്ചെടുക്കാനുള്ള നീക്കത്തിനിടെ ഇസ്‌റാഈല്‍ സൈന്യത്തിന്റെ ടാങ്കുകള്‍ ഗസ്സ സിറ്റിക്കരികില്‍. കനത്ത വ്യോമാക്രമണം നടത്തിയ ശേഷമാണ് കരയാക്രമണത്തിന് ടാങ്കുകള്‍ എത്തുന്നത്. അതേസമയം, യു.എസ് പ്രസിഡന്റ് ഡൊണാള്‍ഡ് ട്രംപിന്റെ അധ്യക്ഷതയില്‍ ഗസ്സ വിഷയം ചര്‍ച്ച ചെയ്യാന്‍ യോഗം ചേരുന്നുണ്ട്. പ്രസിഡന്റിന്റെ പ്രതിനിധി സ്റ്റീവ് വിറ്റ്‌കോഫാണ് ഗസ്സ വിഷയത്തില്‍ വൈറ്റ്ഹൗസില്‍ യോഗം ചേരുന്ന കാര്യം പറഞ്ഞത്. വിദേശകാര്യ സെക്രട്ടറി മാര്‍കോ റൂബിയോ യോഗത്തില്‍ പങ്കെടുക്കും. വാഷിങ്ടണില്‍ നേരത്തെ ഇസ്‌റാഈല്‍ വിദേശകാര്യ മന്ത്രി ഗിഡോയന്‍ സാര്‍ റൂബിയോയെ സന്ദര്‍ശിച്ചിരുന്നു.

ചൊവ്വാഴ്ച ടാങ്കുകള്‍ ഇബാദ് അല്‍ റഹ്മാന്‍ മേഖലയിലാണ് എത്തിയത്. ഗസ്സ സിറ്റിയുടെ വടക്കേ അറ്റത്തുള്ള പ്രദേശമാണിത്. ഇവിടെ സൈന്യം വീടുകള്‍ക്കും മറ്റും നേരെ ആക്രമണം നടത്തി. ഈ പ്രദേശത്തു നിന്ന് നിരവധി പേര്‍ ഒഴിഞ്ഞുപോയിട്ടുണ്ട്.

ഗസ്സയില്‍ 2 കുട്ടികള്‍ ഉള്‍പ്പെടെ 10 മരണം

ഗസ്സയില്‍ 24 മണിക്കൂറിനിടെ രണ്ടു കുട്ടികള്‍ ഉള്‍പ്പെടെ 10 പേര്‍ പട്ടിണി മൂലം കൊല്ലപ്പെട്ടു. ഗസ്സ ആരോഗ്യ മന്ത്രാലയത്തിന്റേതാണ് കണക്ക്. ഇതോടെ പട്ടിണി മൂലം മരിച്ചവരുടെ എണ്ണം 313 ആയി. ഇതില്‍ 119 പേര്‍ കുട്ടികളാണ്.

ഭക്ഷണത്തിന് കാത്തുനില്‍ക്കുന്നവരെ കൊലപ്പെടുത്തുന്നതും ഇസ്‌റാഈല്‍ സൈന്യം തുടരുകയാണ്. 8 ഫലസ്തീനികളെയാണ് ബുധനാഴ്ച ഭക്ഷണത്തിന് വരിനില്‍ക്കുമ്പോള്‍ വെടിവച്ചു കൊന്നത്. ബുധനാഴ്ച ഇസ്‌റാഈലിന്റെ ആക്രമണങ്ങളില്‍ ഗസ്സയില്‍ ആകെ കൊല്ലപ്പെട്ടത് 37 പേരാണ്.