ഈ വർഷത്തെ ബാലൺ ഡി ഓർ നേടാൻ ഏറ്റവും കൂടുതൽ സാധ്യതയുള്ള താരങ്ങളിൽ മുൻ നിരയിലുള്ള താരമാണ് പിഎസ്ജിയുടെ ഫ്രഞ്ച് സൂപ്പർതാരം ഉസ്മാൻ ഡെമ്പലെ. ഡെമ്പലെ ഈ സീസണിൽ ഫ്രഞ്ച് ക്ലബ് പാരീസ് സെയ്ന്റ് ജെർമെയ്ന് വേണ്ടി മിന്നും പ്രകടനമാണ് നടത്തിയത്. പാരീസിന്റെ ഈ സീസണിലെ ചാമ്പ്യൻസ് ലീഗ് കിരീട നേട്ടത്തിൽ നിർണായകമായ പങ്കാണ് ഡെമ്പലെ വഹിച്ചത്. ഇപ്പോൾ സ്പാനിഷ് വമ്പന്മാരായ ബാഴ്‌സലോണയിൽ കളിക്കുന്ന സമയങ്ങളിൽ ലയണൽ മെസിക്കൊപ്പം കളിക്കളത്തിൽ പങ്കിട്ട നിമിഷങ്ങളെക്കുറിച്ച് സംസാരിക്കുകയാണ് ഡെമ്പലെ. മെസിയിൽ നിന്നും തനിക്ക് ധാരാളം ഉപദേശങ്ങൾ ലഭിച്ചിരുന്നുവെന്നാണ് ഫ്രഞ്ച് താരം പറഞ്ഞത്. ഫോർ ഫോർ ടുവിന് നൽകിയ അഭിമുഖത്തിൽ സംസാരിക്കുകയായിരുന്നു ഫ്രഞ്ച് താരം. 

''ബാഴ്സയിലെ ആദ്യ ദിവസം മുതൽ തന്നെ മെസിയുമായി എനിക്ക് വളരെ നല്ല ബന്ധമായിരുന്നു. എന്റെ ലോക്കർ അദ്ദേഹത്തിന്റെ അടുത്താണ് ഉണ്ടായിരുന്നത്. അദ്ദേഹം എനിക്ക് ഒരുപാട് ഉപദേശങ്ങൾ നൽകി. എന്താണ് നിങ്ങൾക്ക് വേണ്ടതെന്ന് നന്നായി അറിയുന്ന ഒരാളായിരുന്നു അദ്ദേഹം. അദ്ദേഹം കളിക്കളത്തിൽ ചെയ്ത കാര്യങ്ങൾ ഞാൻ കാണുകയും അതിൽ നിന്നും ഒരുപാട് കാര്യങ്ങൾ പഠിക്കുകയും ചെയ്തു. പത്താം നമ്പറിലോ ഒമ്പതാം നമ്പറിലോ കളിച്ചാലും അദ്ദേഹത്തിന്റെ പൊസിഷനിംഗ് അസാധാരണമായിരുന്നു. ചില സമയങ്ങളിൽ നാലോ അഞ്ചോ മിനിറ്റ് നേരങ്ങളിൽ അദ്ദേഹത്തെ കാണാൻ കഴിയില്ല. എന്നാൽ ബോൾ ലഭിച്ചാൽ എന്താണ് ചെയ്യേണ്ടതെന്ന് അദ്ദേഹത്തിന് കൃത്യമായി അറിയാം'' ഉസ്മാൻ ഡെമ്പലെ പറഞ്ഞു. 

ഫുട്ബോൾ കരിയറിൽ 95 മത്സരങ്ങളിലാണ് ഡെമ്പലെ മെസിക്കൊപ്പം  കളിക്കളത്തിൽ ഒരുമിച്ചു പന്തു തട്ടിയത്. ഇരുവരും ചേർന്ന് 15 ഗോളുകളാണ് നേടിയിട്ടുള്ളത്. 2023ലാണ് ഡെമ്പലെ ബാഴ്സലോണ വിട്ട് പാരീസിലേക്ക് കൂടുമാറിയത്. മെസി 2021ലുമാണ് പിഎസ്ജിയിൽ ചേർന്നത്. 

കഴിഞ്ഞ ചാമ്പ്യൻസ് ലീഗ് ഫൈനലിൽ ഇറ്റാലിയൻ വമ്പൻമാരായ ഇന്റർ മിലാനെ എതിരില്ലാത്ത അഞ്ച് ഗോളുകൾക്ക് തകർത്തുകൊണ്ട് പാരീസ് സെയ്ന്റ് ചരിത്രത്തിലെ ആദ്യ യുസിഎൽ കിരീടം സ്വന്തമാക്കിയത്.  ഫൈനൽ മത്സരത്തിൽ രണ്ട് അസിസ്റ്റുകൾ നേടിയാണ് ഡെമ്പലെ തിളങ്ങിയത്.ഇതോടെ 2018ന് ശേഷം ചാമ്പ്യൻസ് ലീഗിന്റെ ഫൈനലിൽ രണ്ട് അസിസ്റ്റുകൾ സ്വന്തമാക്കുന്ന ആദ്യ താരമായും ഡെമ്പലെ മാറി. 2018 ചാമ്പ്യൻസ് ലീഗ് ഫൈനലിൽ റയൽ മാഡ്രിഡിന്റെ ബ്രസീലിയൻ താരം മാഴ്സലോ ആയിരുന്നു ഇതിനുമുമ്പ് രണ്ട് അസിസ്റ്റുകൾ നേടിയിരുന്നത്. ആ സീസണിൽ ലിവർപൂളിനെ ഒന്നിനെതിരെ മൂന്ന് ഗോളുകൾക്കായിരുന്നു റയൽ മാഡ്രിഡ് പരാജയപ്പെടുത്തിയത്. 

ഈ സീസണിൽ 33 ഗോളുകളും 13 അസിസ്റ്റുകളും ആണ് ഡെമ്പലെ പാരീസിനൊപ്പം സ്വന്തമാക്കിയത്. ഇതിൽ ചാമ്പ്യൻസ് ലീഗിൽ എട്ട് ഗോളുകളും ആറ് അസിസ്റ്റുകളും താരം നേടിയിട്ടുണ്ട്.ഇതോടെ ചാമ്പ്യൻസ് ലീഗിന്റെ ഒരു സീസണിൽ ഏറ്റവും കൂടുതൽ ഗോൾ കോൺട്രിബ്യൂഷൻസ് സ്വന്തമാക്കുന്ന രണ്ടാമത്തെ ഫ്രഞ്ച് താരമായി മാറാനും ഡെമ്പലെക്ക് സാധിച്ചു. 14 ഗോൾ കോൺട്രിബ്യൂഷൻസ്  ആണ് ഈ സീസണിൽ താരം പാരീസിനു വേണ്ടി സ്വന്തമാക്കിയത്. 2021- 22 സീസണിൽ 17 കോൺട്രിബ്യൂഷൻസ് സ്വന്തമാക്കിയ കരിം ബെൻസിമയാണ് ഒന്നാം സ്ഥാനത്തുള്ളത്. 

Dembele is talking about the moments he shared on the pitch with Lionel Messi while playing for Spanish giants Barcelona