കൽപറ്റ: താമരശേരി ചുരം ഉടൻ ഉടനെത്തന്നെ ഗതാഗത യോഗ്യമാക്കണമെന്നും തുടർച്ചയായി താമരശ്ശേരി ചുരങ്ങളിൽ ഉണ്ടാവുന്ന മണ്ണിടിച്ചിൽ തടയുന്നതിനായുള്ള നടപടികൾ പഠിക്കുന്നതിനായി വിദഗ്ധ സമിതിയെ അടിയന്തരമായി അയക്കണമെന്നും കേന്ദ്ര മന്ത്രി നിതിൻ ഗഡ്കരിയോട് ആവശ്യപ്പെട്ട് എംപി പ്രിയങ്ക ഗാന്ധി.

ചുരം പാതയിൽ ഗതാഗതം തടസ്സപ്പെടുന്നത് വയനാട് ജില്ലയിലുള്ള ജനങ്ങൾക്ക് വലിയ ബുദ്ധിമുട്ടുണ്ടാക്കുന്നുണ്ടന്നും ആരോഗ്യ ആവശ്യങ്ങൾക്ക് ഉൾപ്പെടെയുള്ള കാര്യങ്ങൾക്ക് ജനങ്ങൾ പ്രധാനമായും ആശ്രയിക്കുന്നത് കസോഹൈക്കോട ജില്ലയെയാണെന്നും കോഴിക്കോട് ജില്ലയെ ബന്ധിപ്പിക്കുന്ന ഏക റോഡ് എന്ന നിലയിൽ വയനാട് ജില്ല ഒറ്റപ്പെടുന്ന സാഹചര്യം ചുരത്തിൽ ഗതാഗതം തടസ്സപ്പെടുന്നതിലൂടെ ഉണ്ടാകുന്നുവെന്നും പ്രിയങ്ക ഗാന്ധിയുടെ കത്തിൽ പറയുന്നു. 

കഴിഞ്ഞ ദിവസം ഹൈവേയിലുണ്ടായ മണ്ണിടിച്ചിലിന് പിന്നാലെ റോഡിലെ അവശിഷ്ടങ്ങൾ നീക്കം ചെയ്യേണ്ടി വന്നതിനാൽ താമരശ്ശേരി ചുരത്തിലൂടെയുള്ള ഗതാഗതം പൂർണമായും തടസ്സപ്പെടുത്തേണ്ടി വന്നിരുന്നു. നിലവിൽ മണ്ണിടിച്ചിൽ ഉണ്ടായ സ്ഥലത്ത് ഇനിയും മണ്ണിടിച്ചിൽ ഉണ്ടാവുമെന്ന ആശങ്കയുണ്ട്. നിലവിൽ ഗതാഗതം പൂർണമായും തടസ്സപ്പെട്ടിരിക്കുകയാണെന്നും കത്തിൽ പറയുന്നുണ്ട്. 

ഹൈവേയുടെ ഈ ഭാഗം പരിശോധിച്ചുകൊണ്ട് അപകട സാധ്യത വിലയിരുത്തുന്നതിനും യാത്രക്കാരുടെ സുരക്ഷക്കും കണക്ടീവിക്കും വേണ്ടി അടിയന്തരമായി വിദഗ്ധ സംഘത്തെ അയക്കണമെന്നും ഇത്തരം അടിയന്തര ഘട്ടങ്ങളിൽ ഉപയോഗിക്കാൻ സാധിക്കുന്ന രീതിയിൽ ബദൽ പാത ഒരുക്കുന്നതിനായുള്ള നടപടികൾ സർക്കാർ എത്രയും വേഗത്തിൽ പരിഗണിക്കണമെന്നും പ്രിയങ്ക ഗാന്ധി ആവശ്യപ്പെട്ടു.