ബംഗളൂരു: ദുരൂഹതകൾ നിറഞ്ഞ ധർമസ്ഥല കേസിൽ നിർണായക വഴിത്തിരിവ്. ധർമസ്ഥല ആക്ഷൻ കൗൺസിൽ പ്രസിഡന്റ് മഹേഷ് ഷെട്ടി തിമരോടിക്കെതിരെ കേസിലെ പ്രധാന സാക്ഷിയായ ചിന്നയ്യ മൊഴി നൽകി. തലയോട്ടി നൽകിയത് തിമരോടിയാണെന്നും, അത് അദ്ദേഹത്തിന്റെ റബ്ബർ തോട്ടത്തിൽ നിന്ന് എടുത്തതാണെന്നുമാണ് ചിന്നയ്യ മൊഴി നൽകിയിരിക്കുന്നത്. പ്രത്യേക അന്വേഷണ സംഘം (എസ്.ഐ.ടി.) ഈ ഭാഗത്തെ മണ്ണ് ശേഖരിച്ച് തലയോട്ടിയിലെ മണ്ണുമായി താരതമ്യം ചെയ്യാനുള്ള പരിശോധന ആരംഭിച്ചു. എല്ലാ തെളിവുകളും ശേഖരിച്ച ശേഷം മഹേഷ് ഷെട്ടി തിമരോടിക്ക് നോട്ടീസ് നൽകാനാണ് അന്വേഷണ സംഘത്തിന്റെ തീരുമാനം. കൂടാതെ, കേസുമായി ബന്ധപ്പെട്ട് സുജാത ഭട്ടിനെ അറസ്റ്റ് ചെയ്യാൻ സാധ്യതയുണ്ടെന്നും സൂചനകൾ ഉണ്ട്.

സുജാത ഭട്ടിനെ എസ്.ഐ.ടി. തുടർച്ചയായ മൂന്നാം ദിവസവും ചോദ്യം ചെയ്തു വരുകയാണ്. ചോദ്യം ചെയ്യൽ പൂർത്തിയായാൽ അവരുടെ അറസ്റ്റ് രേഖപ്പെടുത്തുമെന്നാണ് അന്വേഷണ സംഘത്തിന്റെ നിലപാട്. കേസുമായി ബന്ധപ്പെട്ട് ചിന്നയ്യ ഉപയോഗിച്ചിരുന്ന ആറ് ഫോണുകൾ എസ്.ഐ.ടി. കണ്ടെടുത്തു. ഈ ഫോണുകൾ മഹേഷ് തിമരോടിയുടെയും അദ്ദേഹത്തിന്റെ സഹോദരൻ മോഹൻ ഷെട്ടിയുടെയും വീടുകളിൽ നിന്നാണ് കണ്ടെത്തിയത്. ഗൂഢാലോചന തെളിയിക്കുന്ന വീഡിയോകൾ ഈ ഫോണുകളിൽ ഉണ്ടെന്നാണ് എസ്.ഐ.ടി.യുടെ വാദം. ചിന്നയ്യയെ തിമരോടിയുടെ വീട്ടിലെത്തിച്ച് തെളിവെടുപ്പും നടത്തി.

ചിന്നയ്യയുടെ മൊഴിയിലെ വൈരുദ്ധ്യമാണ് കേസിൽ വഴിത്തിരിവായതെന്ന് പൊലിസ് വ്യക്തമാക്കി. നൂറുകണക്കിന് സ്ത്രീകളെ പീഡിപ്പിച്ച ശേഷം ധർമസ്ഥലയിൽ രഹസ്യമായി മറവു ചെയ്തതായി ചിന്നയ്യ ആദ്യം വെളിപ്പെടുത്തിയിരുന്നു. എന്നാൽ, അദ്ദേഹം ഹാജരാക്കിയ തലയോട്ടി ഒരു സ്ത്രീയുടേതല്ല, പുരുഷന്റേതാണെന്ന് ഫോറൻസിക് പരിശോധനയിൽ വ്യക്തമായി. ഇതിനിടെ, ചിന്നയ്യയുടെ ഭാര്യ അദ്ദേഹത്തിനെതിരെ രംഗത്തെത്തി. പബ്ലിസിറ്റി നേടാനാണ് ചിന്നയ്യ ഈ കോളിളക്കം സൃഷ്ടിക്കുന്നതെന്ന വെളിപ്പെടുത്തലുകൾ നടത്തിയതെന്നും, അദ്ദേഹത്തിന് മാനസിക പ്രശ്നങ്ങൾ ഉണ്ടെന്നും ഭാര്യ ആരോപിച്ചു.

2003-ൽ തന്റെ മകൾ അനന്യ ഭട്ടിനെ ധർമസ്ഥലയിൽ വെച്ച് കാണാതായെന്ന് പൊലിസിൽ പരാതി നൽകിയിരുന്ന സുജാത ഭട്ട്, ഇപ്പോൾ തനിക്ക് അനന്യ എന്ന മകളില്ലെന്ന് മൊഴി മാറ്റി. ഭീഷണിക്ക് വഴങ്ങിയാണ് താൻ പരാതി നൽകിയതെന്നും, യഥാർത്ഥത്തിൽ അത്തരമൊരു സംഭവം നടന്നിട്ടില്ലെന്നും സുജാത എസ്.ഐ.ടി.യോട് വെളിപ്പെടുത്തി.