ബെംഗളൂരു: 27 വയസ്സുള്ള സോഫ്റ്റ്‌വെയർ എഞ്ചിനീയർ ശിൽപയുടെ മരണവുമായി ബന്ധപ്പെട്ട് ഭർത്താവ് പ്രവീൺ അറസ്റ്റിലായി. ശിൽപയുടെ ആത്മഹത്യയ്ക്ക് പിന്നാലെ അമ്മ ശാരദ നൽകിയ പരാതിയെ തുടർന്നാണ് പൊലിസ് പ്രവീണിനെ കസ്റ്റഡിയിലെടുത്തത്. മരണസമയത്ത് ശിൽപ ഗർഭിണിയായിരുന്നുവെന്നും, സ്ത്രീധനത്തിന്റേ പേരിലും, ശരീരപ്രകൃതിയുടെ പേര് പറഞ്ഞും പ്രവീണിന്റെ കുടുംബം ശിൽപയെ നിരന്തരം പീഡിപ്പിച്ചിരുന്നുവെന്നും പരാതിയിൽ ആരോപിക്കുന്നു.

ശിൽപയുടെ അമ്മ ശാരദയും സഹോദരി സൗമ്യയും ഗുരുതര ആരോപണങ്ങളാണ് പ്രവീണിന്റെ കുടുംബത്തിനെതിരെ ഉന്നയിച്ചത്. ആദ്യം ശിൽപയുടെ മരണം ഹൃദയാഘാതമാണെന്ന് അറിയിച്ചെങ്കിലും, പിന്നീട് ആത്മഹത്യയാണെന്ന് മാറ്റിപ്പറഞ്ഞുവെന്ന് കുടുംബം വെളിപ്പെടുത്തി. പൊലിസ് സ്ഥലത്തെത്തും മുമ്പ് പ്രവീൺ ഉൾപ്പെടെയുള്ള കുടുംബാംഗങ്ങൾ ശിൽപയുടെ മൃതദേഹം കട്ടിലിൽ കിടത്തി. ശിൽപയെ പ്രവീണും കുടുംബവും ചേർന്ന് കൊലപ്പെടുത്തിയതാണെന്നും ശാരദ ആരോപിച്ചു.

ശാരദയുടെ പരാതിയുടെ അടിസ്ഥാനത്തിൽ, ഭാരതീയ ന്യായ സംഹിതയിലെ സെക്ഷൻ 80 (സ്ത്രീധന മരണം), 1961-ലെ സ്ത്രീധന നിരോധന നിയമം എന്നിവ ചുമത്തി പ്രവീണിനെതിരെ കേസെടുത്ത് അറസ്റ്റ് ചെയ്തു.

ബുധനാഴ്ച ബെംഗളൂരുവിലെ ബിടിഎം ലേഔട്ടിലെ വീട്ടിൽ ശിൽപയെ മരിച്ച നിലയിൽ കണ്ടെത്തുകയായിരുന്നു. ശിൽപയും പ്രവീണും സോഫ്റ്റ്‌വെയർ എഞ്ചിനീയർമാരായിരുന്നു. 2022-ലാണ് ഇവർ വിവാഹിതരായത്, ഇവർക്ക് രണ്ട് വയസ്സുള്ള ഒരു മകൻ ഉണ്ട്. വിവാഹത്തിന് കഴിഞ്ഞ ഒരു വർഷത്തിന് ശേഷം പ്രവീൺ ജോലി ഉപേക്ഷിച്ച് പാനി പൂരി കട തുടങ്ങി. മകൻ ജനിച്ചതിന് ശേഷമാണ് ശിൽപ ജോലി രാജിവെച്ചത്.