കൊച്ചി: പ്രതിപക്ഷ നേതാവ് മുഖ്യമന്ത്രിയാകാനുള്ള റിഹേഴ്സല്‍ നടത്തുകയാണെന്ന  എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്റെ പരിഹാസത്തിന് മറുപടി നല്‍കി വി.ഡി സതീശന്‍. തിളക്കമാര്‍ന്ന ഭൂരിപക്ഷത്തോടെ യു.ഡി.എഫ് അധികാരത്തില്‍ വരുമെന്നും അങ്ങനെ സംഭവിച്ചില്ലെങ്കില്‍ രാഷ്ട്രീയ വനവാസത്തിന് പോകുമെന്നും അദ്ദേഹം പറഞ്ഞു. 

വെള്ളാപ്പള്ളി ആര്‍ക്കുവേണ്ടിയാണ് സംസാരിക്കുന്നതെന്ന് എല്ലാവര്‍ക്കും അറിയാം. വെള്ളാപ്പള്ളിയുടെ വെല്ലുവിളി നേരത്തേ സ്വീകരിച്ചതാണ്. വര്‍ഗീയ പരാമര്‍ശങ്ങള്‍ നടത്തിയ വെള്ളാപ്പള്ളി ഗുരുദേവന്റെ പകര്‍പ്പാണെന്ന് പറഞ്ഞത് ആരാണെന്നും സതീശന്‍ ചോദിച്ചു.

കേരളം മുഴുവന്‍ കടല്‍പോലെ അലയടിച്ച് തനിക്കെതിരെ വന്നാലും തന്റെ നിലപാടില്‍ അണുവിട മാറ്റമുണ്ടാകില്ലെന്നും അദ്ദേഹം കൂട്ടിച്ചേര്‍ത്തു.  നിലപാടുകള്‍ എടുക്കുന്നവര്‍ക്ക് നേരെ വിമര്‍ശനങ്ങളുണ്ടാകും. വെള്ളാപ്പള്ളിയുടെ നിരന്തരമുള്ള വിമര്‍ശനം ചൂണ്ടിക്കാണിച്ച മാധ്യമപ്രവര്‍ത്തരോട് അദ്ദേഹം പറഞ്ഞു. തന്നെ ആരും ഭയപ്പെടുത്തുകയൊന്നും വേണ്ടെന്നും പ്രതിപക്ഷ നേതാവ് വി.ഡി.സതീശന്‍ വ്യക്തമാക്കി.

കസ്റ്റഡി മര്‍ദനവുമായി ബന്ധപ്പെട്ട ആരോപണങ്ങളില്‍ നിന്ന് മുഖ്യമന്ത്രി പിണറായി വിജയന്‍ ഒളിച്ചോടുകയാണെന്ന് അദ്ദേഹം കുറ്റപ്പെടുത്തി. ആഭ്യന്തര മന്ത്രികൂടിയായ മുഖ്യമന്ത്രിക്ക് മറുപടി പറയേണ്ട ബാധ്യതയുണ്ടെന്നും അദ്ദേഹം പറഞ്ഞു.

മേലുദ്യോഗസ്ഥര്‍ അറിഞ്ഞിട്ടും മര്‍ദനം മറച്ചുവെച്ചു. മനുഷ്യാവകാശത്തിന്റെ ലംഘനമാണ് നടന്നത്. ഒരു ഫേസ്ബുക്ക് പോസ്റ്റ് പോലും മുഖ്യമന്ത്രിയുടെ ഭാഗത്ത് നിന്നുണ്ടായില്ല. ഇതൊന്നും അറിയുന്നില്ലെങ്കില്‍ പിന്നെന്തിനാണ് പൊലിസിലെ ഇന്റലിജന്‍സ് സംവിധാനമെന്നും അദ്ദേഹം ചോദിച്ചു.  അറിഞ്ഞില്ലെങ്കില്‍ അതങ്ങ് പിരിച്ചുവിടുന്നതാകും നല്ലതെന്നും അദ്ദേഹം പരിഹസിച്ചു.

വി.ടി.ബല്‍റാമിനെ ഒരു സ്ഥലത്ത് നിന്നും പുറത്താക്കിയിട്ടില്ലെന്നും അദ്ദേഹം ഇപ്പോഴും കെപിസിസി ഉപാധ്യക്ഷനാണെന്നും കെപിസിസി സോഷ്യല്‍ മീഡിയ സെല്‍ ചെയര്‍മാന്‍സ്ഥാനത്തുനിന്ന് വി.ടി. ബല്‍റാം ഒഴിഞ്ഞത് സംബന്ധിച്ചുള്ള ചോദ്യത്തിന് മറുപടിയായി  വി.ഡി.സതീശന്‍ പറഞ്ഞു.

kerala opposition leader vd satheesan has responded to the sarcastic comment made by sndp general secretary vellappally natesan, escalating the ongoing political war of words.